ޚަބަރު
މަސްތުވާތަކެއްޗާއެކު ވެލިދޫއިން ދެ މީހަކު ހައްޔަރުކޮށްފި

މަސްތުވާތަކެއްޗާއެކު ވެލިދޫއިން ހައްޔަރުކުރި ދެ މީހުން---
ނ އަތޮޅު ވެލިދޫގައި ފުލުހުން ހިންގި އޮޕަރޭޝަނެއްގައި މަސްތުވާތަކެއްޗާއެކު ދެ މީހުން ހައްޔަރުކޮށްފިއެވެ.
މި އޮޕަރޭޝަންގައި ފުލުހުންގެ ބެލުމުގެ ދަށަށް ގެންދިޔައީ ނ. ވެލިދޫ، ހުދުއަސުރުމާގެ، އަބްދުއްލަތީފް މޫސާ (47އ) އާއި، ނ. ވެލިދޫ، ނެދުންގެ، މުހައްމަދު މާއިދު (28އ)އެވެ.
ފުލުހުން ހާމަކޮށްފައިވާ ގޮތުގައި މި އޮޕަރޭޝަން ހިންގާފައިވަނީ މި މަހުގެ 20ވަނަ ދުވަހެވެ. އަދި މި އޮޕަރޭޝަންގެ ތެރެއިން އެމީހުން ދިރިއުޅޭތަން ބަލާފާސްކުރިއިރު، މަސްތުވާތަކެތިކަމަށް ޝައްކުކުރެވޭ އެއްޗެހި ފެނިފައިވާކަމަށް ހާމަކޮށްފައިވެއެވެ.
މި ދެ މީހުންގެ އަތުން ފެނުނު މަސްތުވާތަކެތީގެ ޖުމްލަ ބަރުދަނުގައި 440.7 ގްރާމް ހުރިކަމަށް ވެސް ފުލުހުން ވަނީ މަޢުލޫމާތު ދީފައެވެ.
މި މައްސަލައިގައި ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރިކުރުމުން، އަބްދުއްލަތީފް 32 ދުވަހަށް އަދި މާއިދު 5 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.