ދ. ބަނޑިދޫގައި އޭޓީއެމްގެ ޚިދުމަތް ރަސްމީކޮށް ފައްޓަވައިދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދ އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، މިއަދު އެ އަތޮޅު ބަނޑިދޫއަށް ވަޑައިގެން، އެ ރަށުގައި ރަސްމީކޮށް އޭޓީއެމްއެއްގެ ޚިދުމަތް ފައްޓަވައިދެއްވައިފިއެވެ.

މިއީ ރާއްޖޭގެ ހުރިހާ ރަށެއްގެ ރައްޔިތުންނަކީ މާލީ ގޮތުން ބާރުވެރި ބަޔަކަށް ހެއްދެވުމަށް ސަރުކާރުން މިދިޔަ އަހަރުގެ ނޮވެންބަރުމަހު ފެއްޓެވި މަސައްކަތެކެވެ. އަދި މިއީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެއް ވެސް މެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑިރެކްޓަރ މުޙައްމަދު ޝަރީފް ވިދާޅުވީ، ބަނޑިދޫގައި ޤާއިމްކުރެވުނު ސެލްފް ސާރވިސް އެޓީއެމްއާއެކު، އެ ރަށުގެ ރައްޔިތުންނަށް ބޭންކިންގެ ގިނަ ޚިދުމަތްތަކެއް މިހާރު ރަށުގައި ތިބެގެން ލިބިލައްވާނެކަމަށެވެ.

މިއަދު ހަމައެކަނި ހުޅުވިގެން މިދަނީ އޭޓީއެމްއެއް ނޫން، ބޭންކިން ސާރވިސް މި ރަށުގައި ތިއބަވައިގެން މި ރަށުގެ ރައްޔިތުންގެ ލިބޭނެ މަގު ފަހިވެގެން މިދަނީ.

މުޙައްމަދު ޝަރީފް ވިދާޅުވިއެވެ.

މި ޚިދުމަތް ފައްޓަވާ ދެއްވުމުގެ ގޮތުން ރައީސުލްޖުމްހޫރިއްޔާ ވަނީ އެ އެ ޓީއެމްއިން ފައިސާ ނަންގަވާފައެވެ.

ބަނޑިދޫގެ އިތުރުން، މިއަދު ހެނދުނު އެ އަތޮޅުގެ މާއެނބޫދޫގައި ވެސް އޭޓީއެމް ސެންޓަރެއްގެ ޚިދުމަތް ރައީސުލްޖުމްހޫރިއްޔާ ވަނީ ފައްޓަވާ ދެއްވާފައެވެ. އަދި އިއްޔެ ކުޑަހުވަދޫއަށް ވަޑައިގެން، އެ ރަށުގައި ބީއެމްއެލްގެ ބްރާންޗެއް އުޅުމުގެ އިމާރާތުގެ ބިންގާ ވެސް ވަނީ އަޅުއްވާފައެވެ. މީގެ އިތުރުން، މި އަހަރުގެ ތެރޭގައި ކުޑަހުވަދޫގައި ޑޮލަރު އޭޓީއެމްއެއްގެ ޙިދުމަތް ޤާއިމްކުރައްވާނެކަމަށް ވެސް ވިދާޅުވިއެވެ.