ސްރީލަންކާގެ ހޮސްޓެލްއެއްގައި ޕެސްޓިސައިޑް ވިހަވެ ދެ ފަތުރުވެރިން މަރުވެއްޖެ

ސްރީލަންކާގެ ވެރިރަށް ކޮލޮމްބޯގައި ހުންނަ މިރަކަލް ކޮލޮމްބޯ ސިޓީ ހޮސްޓެލްގައި ގޮދަޑީގައި އަޅާ މަކުނު މަަރަން ބޭސް ޖެހުމުގެ ސަބަބުން ދެ ފަތުރުވެރިން މަރުވެއްޖެކަމަށް ބްރިޓިޝް ނޫސް އޭޖެންސީ ޕީއޭ މީޑިއާއިން ރިޕޯޓުކޮށްފިއެވެ. މި ހާދިސާގައި މަރުވެފައިވަނީ އިނގިރޭސިވިލާތުގެ ޑާބީ ސިޓީއަށް ނިސްބަތްވާ 24 އަހަރުގެ އެބޮނީ މެކިންޓޮޝް އާއި ޖަރުމަނުގެ 26 އަހަރުގެ ނަޑީން ރަގޫސްއެވެ.

ސްރީލަންކާ ފުލުހުންގެ ތަރުޖަމާނު ބުއްދިކާ މަނަތުންގާ ވިދާޅުވިގޮތުގައި، ހޮސްޓެލްގެ ކޮޓަރިއެއްގެ އެނދުގައި އުޅޭ ކުދި މަކުނުތަކެއް ނައްތާލުމަށް ބޭސް ޖެހުމަށްފަހު މި ދެ ފަތުރުވެރިން ބަލިވިއެވެ. އެބޮނީ މެކިންޓޮޝް ހޮސްޕިޓަލަށް ގެންދެވުނީ ފާއިތުވި ހޮނިހިރު ދުވަހުއެވެ.

މި ދެ ފަތުރުވެރިންނަށް ޕެސްޓިސައިޑްގެ ވިހައިގެ އަސަރުކޮށްފައިވޭތޯ ތަޙުޤީޤުކުރަމުންދާ ކަމަށް މަނަތުންގާ ވިދާޅުވިއެވެ. އެބޮނީގެ މަރުގެ ސަބަބު ދެނެގަތުމަށް ޕޯސްޓްމޯޓަމް ހަދާނީ އޭނާގެ އާއިލާ ސްރީލަންކާއަށް އާދެވުމުން ކަމަށްވެސް އޭނާ ވިދާޅުވިއެވެ. މިހާރު ބަންދުކޮށްފައިވާ ހޮސްޓެލް އަލުން ހުޅެވޭނީ އެއަށްފަހުގައެވެ.

އެބޮނީގެ އާއިލާއިން ބުނެފައިވަނީ، އޭނާ ސްރީލަންކާއަށް ދަތުރުކުރީ ޖެނުއަރީ 28 ވަނަ ދުވަހު، ދެކުނު އޭޝިއާގެ ޤައުމުތަކަށް ދަތުރުކުރުމުގެ ހުވަފެން ހާސިލުކުރުމަށް ކަމަށެވެ. އެހެންނަމަވެސް، ފެބްރުއަރީ 1 ވަނަ ދުވަހު އޭނާ ކުއްލިއަކަށް މަރުވެފައިވާކަމުގެ ހިތާމަވެރި ޚަބަރު ލިބުނު ކަމަށް އާއިލާއިން ބުނެފައިވެއެވެ.

މި ހާދިސާއާ ގުޅިގެން ބްރިޓިޝް ސަރުކާރުގެ ފޮރިން، ކޮމަންވެލްތު އެންޑް ޑިވެލޮޕްމަންޓް އޮފީހުން ބުނެފައިވަނީ، އެބޮނީގެ އާއިލާއަށް އެހީތެރިކަން ފޯރުކޮށްދެމުންދާ ކަމަށާއި، ސްރީލަންކާގެ ކަމާބެހޭ ފަރާތްތަކާ ގުޅުން ބަހައްޓަމުންދާ ކަމަށެވެ. އެބޮނީގެ އާއިލާއިން ސްރީލަންކާއަށް ދަތުރުކުރުމަށް ފައިސާ ހޯދުމަށް ގޯފަންޑްމީ ޕޭޖެއް ވަނީ ހުޅުވާފައެވެ.