ރައްޔިތުންގެ އަޑުއަހައި ކަންކަން ކޮށްދިނުމަކީ ސަރުކާރުގެ ފަލްސަފާ: ރައީސް މުޢިއްޒު

ސަރުކާރުގެ ފަލްސަފާއަކީ ރައްޔިތުންގެ އަޑު އަހައިގެން ކަންކަން ކޮށްދިނުންކަމަށާއި، އެގޮތުން ރައްޔިތުން ބޭނުންވާ ކަންކަން އެނގިވަޑައިގަންނަވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ދ. ބަނޑިދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ބަނޑިދޫގެ ރައްޔިތުންނާ ބައްދަލުކުރެއްވުމުގައި ރައީސް މުޢިއްޒު ވަނީ އެރަށުގެ ތަރައްޤީއަށް ސަރުކާރުން ސަމާލުކަންދޭނެކަމުގެ ޔަޤީންކަން ދެއްވާފައެވެ. އެގޮތުން މަސްވެރިކަމުގެ ސިނާއަތް ކުރިއެރުވުމަށް އެއްބާރުލުން ދެއްވާނެކަމަށާއި، ބަނޑިދޫގައި ބިންގާ އެޅި އައިސްޕްލާންޓުގެ މަސައްކަތް އަވަހަށް ނިންމަވާނެކަމަށް ވިދާޅުވިއެވެ.

ޓޫރިޒްމް ބޭނުމަށް ކަނޑައަޅާފައިވާ ސަރަހައްދު އެގޮތުގައި ބޭއްވުމަށް، މޫދަށް އެރޭ ސަރަހައްދު ރީތިކޮށް ބޭއްވުމަށް. އެކަން ހިމެނޭގޮތަށް ލޭންޑު ޔޫސް ޕްލޭންގައި ފާހަގަކޮށްދެއްވީމަ ވަރަށް ސާފު ކިހިނެއްކަން މަސައްކަތްކުރަންވީ. އެ މަސައްކަތް ނިންމެވީމަ އަޅުގަނޑު ސަރުކާރުގެ ކަމާބެހޭ ފަރާތްތަކާއެކު އެ ލޭންޑްޔޫސް ޕްލޭންގައި ކުލަ ޖެއްސުމަށް ހަގީގަތަކަށް ހަދައިދިނުމުގެ މަސައްކަތް ކޮށްދޭނަން. އެކަމުގެ ނަތީޖާއަކީ އަމަލީގޮތުން ބިން ހިއްކި މަސައްކަތް ކުރެވޭތަންތަން ބަދަލުކުރެވޭގޮތަށް މިއަހަރު ނުގެންދެވޭނަމަ އެންމެ ލަސްވެގެން އަންނަ އަހަރު ގެންގޮސް ނިންމަދޭނަން

ރައީސުލްޖުމްހޫރިއްޔާ 

ރައްޔިތުންގެ އެންމެ ބޮޑު އެދުމަކީ ފަޅުތެރެއިން ބިން ހިއްކުންކަމަށް ފާހަގަކުރައްވައި، އެންމެ ލަސްވެގެން އަންނަ އަހަރު އެރަށުގެ ބިން ހިއްކާނެކަމަށް ރައީސް ވިދާޅުވިއެވެ. މީގެ އިތުރުން، ބަނދަރުގެ ބޭރު ތޮށި ޖާގަ އިތުރުކޮށްދިނުމުގެ މަޝްރޫޢު އަންނަ އަހަރުގެ ބަޖެޓުގެ ތެރެއިން ކުރިއަށް ގެންދަވާނެކަމަށްވެސް ވިދާޅުވިއެވެ.

ތަޢުލީމީ އަދި ޞިއްޙީ ދާއިރާގެ ތަރައްޤީއަށްވެސް ސަމާލުކަން ދެއްވާނެކަމަށް ރައީސް ވިދާޅުވިއެވެ. އެގޮތުން ކްލާސްރޫމް އިތުރުކޮށް، މަލްޓިޕާޕަސް ހޯލާއި ލެބޯޓްރީ ޤާއިމްކުރުމާއި، ޞިއްޙީ މަރުކަޒަށް ޖާގަ އިތުރުކޮށް ވަސީލަތްތައް ހަމަކޮށްދޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.