ރައީސުލްޖުމްހޫރިއްޔާ ބަނޑިދޫ އިސްރަށްވެހިންނާއި ބައްދަލުކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދ. ބަނޑިދޫގެ އިސްރަށްވެހިންނާއި ބައްދަލުކުރައްވައިފި އެވެ. އެމަނިކުފާނު އެރަށުގެ އިސްރަށްވެހިންނާއި ބައްދަލުކުރައްވާފައިވަނީ، މިއަދު މެންދުރުފަހު ބަނޑިދޫ ސްކޫލުގައި ބޭއްވެވި ބައްދަލުވުމެއްގައެވެ.

މި ބައްދަލުވުމުގައި، ބަނޑިދޫގެ އިސްރަށްވެހިން ވަނީ އެބޭފުޅުންގެ ކަންބޮޑުވުންތައް ރައީސް އާއި ޙިއްސާކުރައްވާފައެވެ. އެގޮތުން، އެބޭފުޅުންނަށް ދަތިވާ ކަންކަމާއި މިވަގުތު އެންމެ ބޭނުންފުޅުވާ ކަންކަން ވެސް ވަނީ ރައީސްގެ އަރިހުގައި ދަންނަވާފައެވެ. މީގެ ތެރޭގައި، އެ ރަށުގެ ބިން ހިއްކުމުގެ މަސައްކަތް ކޮށްދެއްވުމަށް އެބޭފުޅުން ވަނީ ރައީސްގެ އަރިހުން އެދިވަޑައިގެންފައެވެ. މީގެ އިތުރުން ބަނޑިދޫގެ އިސްރަށްވެހިން ވަނީ، އެރަށުގެ ތަރައްޤީއަށް ސަރުކާރުން ކުރައްވާ މަސައްކަތްތަކަށް ފުރިހަމަ އެއްބާރުލުން ދެއްވާނެކަމުގެ ޔަޤީންކަން ރައީސްއަށް ދެއްވާފައެވެ. 

މި ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު ވަނީ، ބަނޑިދޫގެ އިސްރަށްވެހިން ބޭނުންވާ ކަންކަމަށް ޙައްލު ހޯއްދަވާ ދެއްވާނެކަމަށް ވިދާޅުވެފައެވެ. އެގޮތުން، އެރަށުގެ އިސްރަށްވެހިން ބޭންނުންވާ ގޮތަށް ބިން ހިއްކުމުގެ ކަންކަމާއި، ލޭންޑް ޔޫސް ޕްލޭނަށް ބަދަލު ގެންނަ އިރު ރައްޔިތުންގެ ޚިޔާލާ އެއްގޮތަށް މިނިސްޓްރީއާވެސް ވާހަކަދެއްކުމަށްފަހު ކުރިއަށްގެންދިއުމަށް މަޝްވަރާކުރައްވާނެކަމުގައި ރައީސުލްޖުމްހޫރިއްޔާ ވަނީ ވިދާޅުވެފަ އެވެ. 

ރައީސުލްޖުމްހޫރިއްޔާ ވިދާޅުވީ، ބަނޑިދޫގެ އިސްރަށްވެހިންގެ ކަންބޮޑުވުންތަކަށް ވަރަށް ބޮޑު އަހަންމިއްޔަތުކަމެއް ދެއްވައިގެން ރަނގަޅު ޙައްލެއް ހޯއްދެވުމަށް މަސައްކަތް ކުރައްވާނެ ކަމަށެވެ.