Ads by Exprox

ޚަބަރު

ބަނޑިދޫގެ ތަރައްޤީއަށް ބޭނުންވާ ކަންކަމާއި ގުޅޭގޮތުން ރައީސުލްޖުމްހޫރިއްޔާ މަޝްވަރާކުރައްވައިފި

ބަނޑިދޫގެ ތަރައްޤީއަށް ބޭނުންވާ ކަންކަމާއި ގުޅޭގޮތުން ރައީސުލްޖުމްހޫރިއްޔާ މަޝްވަރާކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބަނޑިދޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިތުރުން، މުއައްސަސާތަކުގެ އިސްވެރިންނާއި ބައްދަލުކުރެއްވުން|ފޮޓޯ: ރައީސް އޮފީސް

ޙައްވާ ޒައިބާ މުޙައްމަދު

ޙައްވާ ޒައިބާ މުޙައްމަދު

24 ފެބްރުއަރީ 2025، 05:53

24 ފެބްރުއަރީ 2025، 05:53

ދ. ބަނޑިދޫގެ ތަރައްޤީއަށް ބޭނުންވާ ކަންކަމާއި ގުޅޭގޮތުން މަޝްވަރާކުރެއްވުމަށް މިއަދު މެންދުރުފަހު ބަނޑިދޫ ސްކޫލުގައި ވަނީ ބައްދަލުވުމެއް ބާއްވާފައެވެ.

މި ބައްދަލުވުމުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބަނޑިދޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިތުރުން، މުއައްސަސާތަކުގެ އިސްވެރިންގެ ކަންބޮޑުވުންތައް އަޑުއައްސަވާފައެވެ.

މި ބައްދަލުވުމުގައި ބަނޑިދޫ ކައުންސިލުން ވަނީ އެރަށުގައި ބޮޑުވެފައިވާ ރަށްގިރުމުގެ މައްސަލައާއި ގުޅިގެން ކުރިމަތިވެފައިވާ ދަތިތައް ހިއްސާކުރައްވައި، ރަށުގެ ބިމުގެ ދަތިކަން ހުރިކަން ފާހަގަކުރައްވައި،  އެކަމަށް ޙައްލެއް ހޯއްދަވާދެއްވުމަށް އެދިވަޑައިގެންފައެވެ. ހަމަ އެހެންމެ، ސްކޫލަށް ބޭނުންވާ ވަޞީލަތްތަކާއި ސްކޫލުގެ ޖާގައިގެ ދަތިކަމަށް ހައްލެއް ހޯއްދަވައިދެއްވުމަށް ކައުންސިލުން ވަނީ ރައީސްގެ އަރިހުގައި ދަންނަވާފައެވެ. މީގެ އިތުރުން، ރަށުގެ ތަރައްޤީއަށް އެކި މަޝްރޫޢުތައް ހިންގުމަށް ރަށާ ކައިރީގައި އޮތް ކަންނެއްފަރު ރަށުގެ އިޚުތިޞާޞްގެ ތެރޭގައި ހިމަނުއްވައި ދެއްވުމަށް ކައުންސިލުން ވަނީ އެދިވަޑައިގެންފައެވެ.

މި ބައްދަލުވުމުގައި، ބަނޑިދޫ ޞިއްޙީ މަރުކަޒުގެ އިސް ބޭފުޅަކު ވަނީ އެރަށުގެ ޞިއްޙީ މަރުކަޒަށް އެކްސްޓެންޝަން އިމާރާތެއް ބޭނުންވާކަމުގައި ފާހަގަކުރައްވާފައެވެ. އަދި ބަނޑިދޫގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެންބަރުން ވަނީ މި ސަރުކާރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ދެއްވާ އެއްބާރުލުމާއި އެހީތެރިކަމާއި އަހަންމިއްޔަތުކަން ފާހަގަކުރައްވާ އެކަމަށް ޝުކުރު ދަންނަވާފައެވެ. މީގެ އިތުރުން، އެ ކޮމިޓީގެ މެންބަރުންގެ މަސައްކަތްތައް ކުރިއަށްގެންދިއުމަށް އެކަށީގެންވާ ޖާގައެއް ނެތްކަން ފާހަގަކުރައްވައި އެކަމަށް ހައްލެއް ހޯއްދަވާދެއްވުމަށް ރައީސްގެ އަރިހުގައި ވަނީ އެދިވަޑައިގެންފައެވެ. 

މި ބައްދަލުވުމުގައި ރައީސުލްޖުމްހޫރިއްޔާ ވިދާޅުވީ، ބަނޑިދޫގެ ކައުންސިލުން ފާހަގަކުރެއްވި މައްސަލަތަކަށް ޙައްލު ހޯއްދެވުމަށް މަސައްކަތް ކުރައްވާނެ ކަމަށެވެ. ހަމަ އެހެންމެ، ބައްދަލުވުމުގައި ބައިވެރިވެވަޑައިގެންނެވި ވަޒީރުން ވަނީ، އެރަށުގެ ތަރައްޤީއަށް ކުރައްވަމުން ގެންދަވާ މަސައްކަތްތަކާ ގުޅޭ އެންމެ ފަހުގެ މަޢުލޫމާތުތައް ކައުންސިލާއި ޙިއްޞާކުރައްވާފައެވެ.

މި ލިޔުން ކިޔާލުމުން

Ads by MSS