އެފްޕީއޭ އިން ލާމަރުކަޒީ ޤާނޫނު އިނގިރޭސި ބަހަށް ތަރުޖަމާ ކުރަނީ

ޤާނޫނު ނަންބަރު: 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) އިނގިރޭސި ބަހަށް ތަރުޖަމާ ކޮށްދޭނެ ފަރާތެއް ހޯދަން ފެމިލީ ޕްރޮޓެކްޝަން އޮތޯރިޓީ (އެފްޕީއޭ) އިން އިޢުލާންކޮށްފިއެވެ.

އެފްޕީއޭ އިން މިއަދު ކުރި އިޢުލާނުގައި ބުނެފައިވަނީ އެ އޮތޯރިޓީން ކުރަމުންދާ މަސައްކަތްތަކާ ގުޅިގެން ލާމަރުކަޒީ ޤާނޫނާއި، އެ ޤާނޫނަށް މިހާތަނަށް ގެނެވިފައިވާ އިޞްލާޙުތައް، ދިވެހި ބަހުން އިނގިރޭސި ބަހަށް ތަރުޖަމާކޮށްދޭނެ ފަރާތެއް ހޯދުމަށް ބޭނުންވާ ކަމަށެވެ.

އެފްޕީއޭއިން ވިދާޅުވީ، އަމިއްލަ ފަރުދަކަށް ވެސް، ނުވަތަ ވިޔަފާރިއަކަށް ވެސް މި މަސައްކަތާ ހވާލުވުމަށް ކުރިމަތި ލެވިދާނެކަމަށާއި، މި މަސައްކަތަށް ކުރިމަތިލުމުގެ މިންގަނޑަކީ، މަދުވެގެން އެމްއެންކިއުއެފް ލެވެލް 7 ގެ ސަނަދެއް އޮތް ފަރާތެއް ކަމަށްވުމެވެ.

އިނގިރެސިބަހަށް ތަރުޖަމާކޮށްދޭ ފަރާތުގެ މަސައްކަތް ފުރިހަމަވާއިރު ތަރުޖަމާ ކުރެވިފައިވާ ލިޔުމުގެ ފެންވަރު ފެތެންވާނެ މިންގަނޑު:

• ތަރުޖަމާ ކުރުމަށް ހަވާލުކުރެވޭ ލިޔުމުގެ އަސްލާއި އެއްގޮތަށް، އަސްލާއި ޚިލާފު މާނައެއް ދޭހަ ވެދާނެ ފަދަ އެއްވެސް އުނި އިތުރެއް ނުވާހެން ތަރުޖަމާ ކުރެވިފައި ހުރުން.
• ތަރުޖަމާ ކުރެވިފައިވާ ލިޔުން އޮންނަ ބަހުގެ ގަވާއިދާއި ހަމަތަކަށް ފެތޭ، އަދި ލިޔުމުގެ ކުށް ނުހިމެނޭ ފަދަ ރަނގަޅު ފެންވަރަކަށް ތަރުޖަމާ ކުރެވިފައި ހުރުން.
• ތަރުޖަމާކުރުމަށް ހަވާލު ކުރެވޭ ލިޔުމުން ދޭހަކޮށްދޭން ބޭނުންވާ ކަންކަން ސާފު ބަހުން އަދި އާންމުންނަށްވެސް ފަސޭހައިން ދޭހަވާ ފަދަ ފެންވަރަކަށް ތަރުޖަމާ ކުރެވިފައި ހުރުން. މިގޮތުން ޓެކްނިކަލް ބަސްތައް އެއް ބަހުރުވައިން އަނެއް ބަހުރުވައަށް ސީދާ ތަރުޖަމާ ކުރެވެން ނެތް ނަމަ، އެ ބަސްތަކުގެ މާނަ ފަސޭހައިން ދޭހަވާ ފަދަ ގޮތަކަށް ތަފްސީލު ކޮށްދެވިފައި އޮތުން.
  

މާރިޗު 4 ވަނަ ދުވަހުގެ 10:00 ގެ ކުރިން އެފްޕީއޭ އިން ވަނީ މި މަސައްކަތާ ގުޅޭ އެއްވެސް ސުވާލެއް އޮތްނަމަ،  އެ އޮތޯރިޓީއަށް އީމެއިލްކުރުމަށް އަންގަވާފައެވެ. މި މަސައްކަތުގެ އަންދާސީ ހިސާބު ހުށަހެޅުން އޮންނާނީ މާރިޗު 6 ވަނަ ދުވަހުގެ 11:30 ގައި އެ އޮތޯރިޓީގައެވެ.