ރިޕޯޓް
ސަރުކާރުގެ ރޯދަ ހަދިޔާ: ރާއްޖޭގައި މިހާތަނަށް ހިލޭ ބަހާ އެންމެ އަގުހުރި އަދި އެންމެ ބޭނުންތެރި ހަދިޔާ

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ފޮޓޯ:ރައީސް އޮފީސް
މި އަހަރުގެ ރަމަޟާން މަހުގެ ރޯދަ ހަދިޔާގެ ގޮތުގައި ރާއްޖޭގެ ކޮންމެ ގޭބިސީއަކަށް ސަރުކާރުން ހަދިޔާ ކުރާ މަސްދަޅު ކޭސްތައް މިދިޔަ ބުރާސްފަތި ދުވަހު ވަނީ ބަހަން ފަށާފައެވެ. މާލޭގައި ދިރިއުޅޭ ގިނަ ބަޔަކު މަސްދަޅު ކޭސްތައް ބެހުމަށް ހަމަޖެހިފައިވާ ސަރަހައްދުތަކަށް ޖަމާވިއެވެ. އެ ކޭސްތައް ބަހަން ފެށުމުގެ ގަޑިއިރެއްހާ އިރު ކުރިން ފެށިގެން މާލެ، ހުޅުމާލެ، އަދި ވިލިމާލެ އެކި ސަރަހައްދުތަކުގައި ކިއޫ ހަދަން ފެށިއެވެ.
މިއީ ބަރަކާތްތެރި ރަމަޟާން މަހަކާ ދިމާކޮށް ސަރުކާރަކުން މިހާތަނަށް ރާއްޖޭގައި ހިލޭ ބަހާ އެންމެ ބޮޑު އަދި ބޭނުންތެރި ހަދިޔާއެވެ. ރަމަޟާން މަހު އެންމެ ގިނައިން ގޭބިސީތަކުގައި ބޭނުންކުރާ އެކައްޗަކީ ހަމަޔަގީނުން ވެސް މަސްދަޅެވެ. ދިވެހިންނަށް މަސްދަޅާ ނުލައި އުޅުމަކީ އުނދަގޫކަމެކޭ ބުނުން ގޯހަކަށް ނުވާނެއެވެ. އެހެންވެ، ރައްޔިތުންނަން ލުޔެއް ދިނުމުގެ ގޮތުން ރައީސް ޑރ. މުހައްމަދު މުއިއްޒު، މިދިޔަ ނޮވެމްބަރު މަހު ނިންމެވީ ރާއްޖޭގެ ކޮންމެ ގޭބިސީއަކަށް މަސްދަޅު ކޭހެއް ދިނުމަށެވެ.
ރައީސް ޑރ. މުއިއްޒުގެ ރިޔާސީ ދައުރުގެ ފުރަތަމަ އަހަރު ރާއްޖޭގެ ހުރިހާ ގޭބިސީއަކަށް ދިނީ 10 ކިލޯ ފުށާއި 10 ކިލޯ ހަނޑުލެވެ. ދިވެހިންނަށް ކާޑުގެ ބާވަތްތައް ހަދިޔާ ކުރާތީ ދިވެހިންގެ އަގަކީ "އެންމެ 10 ކިލޯ" ކަމަށް ބުނެ، ވަރަށް ގިނަ ބަޔަކު ސަރުކާރަށް ފާޑު ވެސް ކިއެވެ. ކޮންމެއަކަސް، ރައީސް ޑރ. މުއިއްޒު ބޭނުންފުޅުވީ މިދިޔަ އަހަރުގެ ރަމަޟާން މަހާ ދިމާކޮށް ދިން ރޯދަ ހަދިޔާ އަށް ވުރެ ރަނގަޅު ހަދިޔާއެއް ދިވެހި ހުރިހާ ރައްޔިތުންނަށް ހަމަހަމައަށް ދެއްވުމަށެވެ. މީގެއިތުރުން ފެނާއި ކަރަންޓުންވެސް ވަނީ ކޮންމެ ގެއަކަށް ޑިސްކައުންޓް ދެއްވާފައެވެ.
މިފަހަރުގެ ރަމަޟާންމަހަށް ރޯދަ ހަދިޔާގެ ގޮތުގައި ސަރުކާރުން މަސްދަޅުކޭސް ބަހަން ފެށުމާ ގުޅިގެން އިދިކޮޅު ފަރާތްތަކުންވަނީ އެކަމަށް ވަރަށްބޮޑަށް ފާޑުކިޔައި ބަރުދަނެއްނުވާ ވާހަކަތައް ދައްކަން ފަށާފައެވެ. އެގޮތުން ސަރުކާރުން ރައްޔިތުންނަށް މަސްދަޅުކޭސް ހަދިޔާގެ ގޮތުގައި ބަހަނީ، ކުރިއަށްއޮތް ރަމަޟާންމަހު ކަރަންޓް ބިލްތައް ބޮޑުކުރުމުގެ ނިޔަތުގައިކަން އިދިކޮޅަށް ނިސްބަތްވާ ބައެއް ފަރާތްތަކުން ވަނީ ބުނެފައެވެ
އަޅުގަނޑު އެކަން އިއުލާންކޮށް އެކަން އެގޮތުގަ ފަށާއިގަތީ، ފުރަތަމަ ކޮން ވާހަކައެއްތޯ ދެކެވުނީ، މަސްދަޅުކޭހުން ވަކިވަރަކަށް މަސް މަދުކޮށްފައޭ އަޅުގަނޑުމެން ދެނީ، އެކަން ދެން ހަގީގަތަކަށް ނުވި، އެކަން ފަޅާއަރައިފި، ދެން މަސްދަޅުގެ މަތިގަނޑު ނެއްޓޭގޮތަކަށް ނޫނޭ ހުރީކީ ފަސޭހައިން އެކަން ވެސް އެދޮގުވެސް ދޮގެއްކަން ރައްޔިތުންނަށް އެނގިއްޖެ، ދެން މަސްދަޅުކޭސްތައް ބަހަނީ، ބެހުމުގަ މާލޭގަ ފުރަތަމަ ފެށިއިރު ދަތިތަކެއް ދިމާވި އެކަމުގައިވެސް ރައްޔިތުންގެ ތެރޭގައި ނުތަނަވަސްކަން އުފައްދަން މަސައްކަތް ކުރި، މިހާރުދައްކާ ވާހަކައަކީ ރައްޔިތުންނަށް ކޮންމެ ގޭބިސީއަކަށް މަސްދަޅުކޭހެއް ދީގެން ސަރުކާރުން މިކުރި ހަރަދު ފޫބައްދަންވެގެން ފެންބިލާ ކަރަންޓުބިލުންނޭ އެބައި އަތުލާނީ، މިބިރު އުފައްދަނީ މިހާރު، އަޅުގަނޑު ދަންނަވާލަން ބޭނުންވަނީ، އަޅުގަނޑު މިވާހަކަ ކުރިންވެސް ވާނީ ދަންނަވާފަ، މިދިޔަ އަހަރުގެ 8 ޑިސެމްބަރުގަ އަޅުގަނޑު އއ މަތިވެރީގައި ރައްޔިތުންނާއި ބައްދަލުކުރަމުން އެޖަލްސާގަ އަޅުގަނޑު ދެންނެވިން ކުރީ ރަމަޞާން މަހުގަ ދިން ގޮތަށް މިފަހަރުވެސް ރަމަޞާންމަހު ކަރަންޓު ބިލުންނާއި ފެންބިލުން ޑިސްކައުންޓް އަޅުގަނޑުމެން ދޭނަމޭ
ރައީސް މުޢިއްޒު
މާލޭގެ ކޮންމެ ގޭބިސީއަކަށް ވެސް މަސްދަޅު ކޭހެއް ދިނުމަށް ހަމަޖެހިފައިވާ އިރު، ކޮންމެ ކޭހެއްގައި 48 މަސްދަޅު ހިމެނެއެވެ. މިއީ 1،000ރ. ގެ މަސްދަޅެވެ. ހަމަޔަގީނުން ވެސް ދެތިން މެމްބަރުން ހިމެނޭ އާއިލާއަކަށް ނަމަ، މި މަސްދަޅު ކޭސް، މުޅި ރޯދަ މަހު ބޭނުން ކުރެވޭނެއެވެ.
މަސްދަޅުގެ ބޭނުންތެރިކަން އެނގި ތިބެ، ގިނަ ބަޔަކު މިދިޔަ ބުރާސްފަތި ދުވަހުގެރޭ ގެއިން ނުކުތީ ކިތަންމެ ގިނައިރަކު ކިއޫގައި ތިބެން ޖެހުނު ކަމުގައި ވިޔަސް، ކޭހެއް ހިފައިގެން ނޫނީ ނުދާނެ ކަމަށް ބުނެއެވެ. އެއާއެކު، ދެން ފެނުނީ މަސްދަޅު ބަހާ ތަންތަން ތޮއްޖެހުނު މަންޒަރެވެ. ސަރުކާރުން އެންމެ ފަހުން ނިންމީ އެރޭ ކިއޫއަށް އެރި އެންމެންނަށް މަސްދަޅު ކޭސް ދިނުމަށެވެ. އެއްވެސް މީހަކު ހުސް އަތާ ގެއަށް ދާކަށް ނުޖެހުނެވެ.
ދޮޅުގަޑިއިރު ހުރެފިން ކިއުގައި، އެކަމު ވަރަށް އުފަލުން މިދަނީ ގެއަށް. ކިތަންމެ އިރަކު ހުރެގެންވެސް މަސްދަޅު ކޭހެއް ރޯދައަށް ލިބުމަކީ ވަރަށް އުފާކުރާކަމެއް، އަސްލު އަޅުގަނޑުމެނަށް މިއީވެސް ހާދަ ބޮޑު އެއްޗެކޭ، މިވެސް ސަރުކާރުން ހަދިޔާ ނުކުރިނަމަ ހަމަ އަތުގަ ހުރި ކުޑަ ފައިސާ ކޮޅުން މަސްދަޅުވެސް ގަންނަން ޖެހޭނީ
އަލީ މުފީދު، ހިޔާ ފްލެޓް 10 އެއްގެ ކިއުގައި ހުރި ފަރާތެއް
މާލެ ސަރަހައްދުގައި މަސްދަޅު ކޭސް ބެހި ގޮތަށް ބަލާއިރު، އެންމެ ގިނަ އިން މަސްދަޅު ކޭސް ބެހީ މިފްކޯގެ އޮފީސް ހުންނަ ގޯތިތެރޭގައެވެ. ދެވަނަ އަށް އެންމެ ގިނަ އަދަދަކަށް މަސްދަޅު ކޭސް ބެހީ އެމްޓީސީސީ ސޯމިލް ސަރަހައްދުގައެވެ. ތިން ވަނައަށް އެންމެ ގިނަ އިން ބެހީ ހުޅުމާލެ ދެވަނަ ފިޔަވަހީގެ ހިޔާ ޓަވަރު 10 އިންނެވެ.
މަސްދަޅު ބެހުމުގެ ކަންކަމާއި މެދު ބައެއް ފަރާތްތަކުން ފާޑު ކިއުއްވަމުން ގެންދަވާއިރު ވިސްނާލަން ޖެހޭ ކަމަކީ ކަމެއްގަ ހުރި ދަތިތަކާއި ގޮންޖެހުން އެނގޭނީ އެކަމެއް ފެށުމުންނެވެ. މަސްދަޅު ބެހުމުގައިވެސް މިފަދަ އެކި ކަންކަމާ ކުރިމަތިވާނެއެވެ. ސަބަބަކީ މަސްދަޅު ބަހަނީ އެންމެ ގެއަކަށް ނުވަތަ ދެގެއަކަށް ނޫނެވެ. މުޅި ރާއްޖެއަށެވެ. ރަށްރަށާއި ހިލާފަށް މާލޭސިޓީއަކީ ތޮށްޖެހުމާއި މީހުން ގިނަވުމުން މިފަދަ ކަންކަމުގައި ތަފާތު ގިނަ ދަތިތަކާއި ކުރިމަތި ވުން އެކަށީގެންވާ މާހައުލެކެވެ.
ނަމަވެސް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީން މަސްދަޅު ކޭސް ރައްޔިތުންނަށް ފޯރުކޮށްދިނުމުގައި ވީ އެންމެ ލުއިފަސޭހަ އިންތިޒާމުތައް ހަމަޖައްސައި ދިނުމުގެ ގޮތުން ވަކި އިންތިޒާމުތަކެއް ހަމަޖައްސާފައިވެއެވެ. އެގޮތުން މި ދުވަސްވަރަކީ ވަރަށް ހޫނު ގަދަ ދުވަސްވަރެއް ކަމުން މަސްދަޅު ބެހުން ކުރިއަށް ގެންދާނީ ހަމައެކަނި ރޭގަނޑު ވަގުތުތަކުގައި ކަމަށް ވެސް މިނިސްޓްރީން ވިދާޅުވިއެވެ.
މީގެއިތުރުން ކިއޫގައި ގިނަ ވަގުތު ހޭދަކުރަން ނުޖެހޭނެހެން އޮންލައިން ނިޒާމެއްގެ ތެރެއިން ޓޯކަން ނެގޭނެ އިންތިޒާމު ހަމަޖައްސާ މި ނިޒާމުގެ ތެރެއިން ވަކި ރެޔަކަށް، ވަކި މަރުކަޒަކުން ޓޯކަން ނެގޭނެ އިންތިޒާމް ވެސް ހަމަޖައްސަވާ މިނިސްޓްރީން ވަނީ ރައްޔިތުންނަށް މިކަން ވީއެންމެ ފަސޭހައެއް ކޮށްދެއްވާފައެވެ.
މިނިސްޓްރީން ވިދާޅުވެފައިވަނީ ހުރިހާ ގޭބިސީއަކަށް މަސްދަޅު ކޭސް ދޫކުރެވެން ދެން މި މަސައްކަތް ކުރިއަށް ގެންދާނެ ކަމަށެވެ. އަދި ފޯނު ފަދަ ތަކެތި ބޭނުން ކުރުމަށް ދަތިތަކެއް ހުރެދާނެ މީހުންނަށް ވެސް ދައްޗެއް ނެތި ކަންކަންކުރިއަށް ގެންދެވޭނެ އިންތިޒާމު ހަމަޖައްސާނެ ކަމުގެ ޔަޤީންކަން މިނިސްޓްރީން ދެއްވިއެވެ. އެގޮތުން އެފަދަ ދަތިކަމެއް އޮތް މީހަކު ނަމަ، މަސްދަޅު ދޫކުރެާ މަރުކަޒަކަށް ގޮސް، އެ ތަނުގައި ތިބި މުވައްޒަފުންގެ އެހީތެރިކަން ހޯދޭނެ ކަމަށް ވެސް މިނިސްޓްރީން ވިދާޅުވިއެވެ.
ދައްތައަކަށް ނޭގޭނެ ތިފޯނުން ނަންބަރު ނަގާ ފޮޓޯ ނަގާކަށް، ދައްތަވެސް އެކަމު ހަމަ މިތަނަށް ގަަޑިއަށް އައިސް މިކުދިންގެ އެހީތެރިކަމާއެކު މަސްދަޅުކޭސް ނަގައިގެން މިދަނީ، ވަރަށް ފަސޭހަ ވަރަށް ހިތްހަމަޖެހޭ، ވަރަށް އުފަލުން މިދަނީ ގެއަށް، ރައީސް މުޢިއްޒުއަށް އަދި ސަރުކާރަށް ފަށްފަށުން ޝުކުރު އަދާކުރަން، ހާދަހާ ހެވޭ އެކުދިން
މަރިޔަމް ޖަމީލާ ، ސޯޝަލް ސެންޓަރުގައި ހުރި ދައްތައެއް
މަސްކޭސް ލިބުމުގަ އެއްވެސް ދައްޗެއް ނާންނާނެ، ސްޓޮކެއް ހުސްނުވާނެ، އެ އިންތިޒާމް ވަރަށް ބަރާބަރަށް ރޭވިގެން ކުރިއަށް މިދަނީ
ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީގެ އޮފިޝަލް
މި ރޯދަމަހު މަސްދަޅު ކޭސް ގޭގެ އަށް ބަހާއިރު، މިދިޔަ އަހަރުގެ ރޯދަމަހު ސަރުކާރުން ވަނީ 82،000 ގޭބީސީއަކަށް 1.6 މިލިއަން ކިލޯގެ ކާޑުގެ ބާވަތްތައް ހިލޭ ދީފައެވެ. ކޮންމެ ގެއަކަށް ވެސް ދިނީ 10 ކިލޯ ފުށާއި 10 ކިލޯ ހަނޑުލެވެ. އަދި ކަރަންޓާއި ފެނުގެ ބިލުން 142 މިލިއަން ރުފިޔާގެ ޑިސްކައުންޓް ދީފައިވެއެވެ.
މިއީ މިހާތަނަށް ރޯދަމަހަށް ސަރުކާރުން ރައްޔިތުންނަށް އެންމެ ގިނަ ލުއި ހޯއްދަވައިދެއްވި ސަރުކާރެވެ. މިދިޔައަހަރުގެ ރޯދަމަސްވެސް ރައްޔިތުންނަށް ކަންކަން ލުއިކޮށްދެއްވިއެވެ. ރަމަޟާންމަހުގެ ފަހު 10 ގެ ދުވަސްތަކުގައި ސަރުކާރު ބަންދުކުރައްވަން ނިންމެވީ، ރޭއަޅުކަމަށް ފުރުޞަތުދެއްވައި، މި ދުވަސްތަކުގައި އެންމެ ހެނދުނާ އޮފީހަށް ދިއުމުގެ ބުރަ ލުއިކޮށްދެއްވުމަށްކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވިއެވެ.
ކާޑުގެ ބާވަތްތައް އަދި މަސްދަޅުކޭސް ފަދަ އަގުހުރި ރޯދަ ހަދިޔާ ސަރުކާރުން ވަނީ ރައްޔިތުންނަށް ބައްސަވާފައެވެ. އަދި ރޯދަމަހު ކަރަންޓާއި ފެނުގެ ބިލުތަކަށް ލުޔެއް ދެއްވުމުގެ ގޮތުން، މިއަހަރުވެސް ކުރީއަހަރެކޭ އެއްފަދައިން ބިލްތަކުން ޑިސްކައުންޓެއް ދެއްވައި ވަކި މިންވަރެއް މަޢާފްކޮށްދެއްވާނެކަންވެސް ރައީސުލްޖުމްހޫރިއްޔާ ވަނީ އިޢުލާންކުރައްވާފައެވެ. މިހުރިހާ ކަމަކަށް ބަލާއިރު މިއީ ހަމަ ޔަޤީނުންވެސް ރައްޔިތުމީހާގެ އިހުސާސްތައް ދެނެގަނެ ރައްޔިތުންނަށް އޯގާތެރި ސަރުކާރެކެވެ.