ދުނިޔެ / ވިޔަފާރި
ކްރިޕްޓޯ ތާރީޚުގެ އެންމެ ބޮޑު ވައްކަން: ބައިބިޓުން 1.5 ބިލިއަން ޑޮލަރުގެ ޑިޖިޓަލް އެސެޓް ވަގަށް ނަގައިފި

އިތީރިއަމް ފޮޓޯ:އިންޓަނެޓް
ދުބާއީގައި މައި އޮފީސް ޤާއިމުކޮށްފައިވާ ކްރިޕްޓޯކަރަންސީ އެކްސްޗޭންޖް ކަމުގައިވާ ބައިބިޓުން ހުކުރު ދުވަހު ހާމަކުރި ގޮތުގައި، ހެކަރުން ވަނީ 1.5 ބިލިއަން ޑޮލަރުގެ ޑިޖިޓަލް އެސެޓް ވަގަށް ނަގާފައެވެ. މިއީ ކްރިޕްޓޯ އިންޑަސްޓްރީގެ ތާރީޚުގައި ހިނގާފައިވާ އެންމެ ބޮޑު ވައްކަމެވެ.
ބައިބިޓުގެ ސީއީއޯ އަދި ބާނީ ބެން ޒޯ ވަނީ އޮންލައިން ޗެޓެއްގައި މި ހެކިންގ އާ ގުޅޭގޮތުން މުޚާތަބުކޮށް، ކަސްޓަމަރުންނަށް "ތބޭފުޅުންގެ ފައިސާ ރައްކާތެރިކަން" ޔަޤީންކޮށްދީފައެވެ.
ކުންފުނިން އެކްސް ގައި ހިއްސާކުރި ގޮތުގައި "މިއަދުގެ ހެކިންގގެ ވައްކަމުން އަސަރުކުރި ފަރާތްތަކަށް ރީފަންޑް ޕްރޮގްރާމެއް ފަށައިފި،ބައިބިޓުން ވަނީ އަޅުގަނޑުމެންގެ ކޮމިއުނިޓީ ރައްކާތެރިކުރުމަށް ވަޢުދުވެ، މިކަމުގެ އަސަރުކުރި ހުރިހާ ބައިބިޓް ކްރިޕްޓޯ ބޭނުންކުރާ ފަރާތްތަކަށް ފުރިހަމައަށް ބަދަލު ދިނުމަށް ނިންމާފަ"
ކުންފުނިން ބުނާ ގޮތުގައި، ހަމަލާދިން ފަރާތްތަކުން ވަނީ މުޢާމަލާތެއް ކުރިއަށްދަނިކޮށް ސެކިއުރިޓީ ޕްރޮޓޮކޯލްތަކަށް ނުފޫޒު ފޯރުވައި، އެސެޓްތައް ނޭނގޭ އެޑްރެހަކަށް ބަދަލުކޮށްފައެވެ. މިކަމުގެ ސަބަބުން އީތަރިއަމް ރައްކާކޮށްފައި ހުރި އޮފްލައިން "ވޮލެޓް" އަކަށް ގެއްލުން ލިބި، ހުކުރު ދުވަހުގެ ހެނދުނު ހެކަރުން ވަނީ 400,000 އިތީރިއަމް ވަގަށް ނަގާފައެވެ.
އިތީރިއަމް އަކީ ބިޓްކޮއިންއަށް ފަހު މާކެޓް ވެލިއުގެ ގޮތުން ދެވަނައަށް އެންމެ ބޮޑު ކްރިޕްޓޯކަރަންސީއެވެ. ހެކިންގ ގެ ފަހުން ހުކުރު ދުވަހު އީތަރިއަމްގެ އަގު ހުރީ 2,641.41 ޑޮލަރުގައެވެ. މިއީ ގާތްގަނޑަކަށް 4 އިންސައްތައިގެ ދަށްވުމެކެވެ.
ޒޯ ވިދާޅުވި ގޮތުގައި ބައިބިޓުގައި ކްލައެންޓުންގެ 20 ބިލިއަން ޑޮލަރުގެ އެސެޓް ހުރެއެވެ. އަދި އަނބުރާ ނުލިބޭ އެއްވެސް ފައިސާއެއް ވާނަމަ، އެ ފައިސާ ކުންފުނީގެ ޓްރެޜަރީ ނުވަތަ ޕާޓްނަރުންގެ ފަރާތުން ނަގާ ބްރިޖް ލޯނެއްގެ ޒަރީޢާއިން ހަމަޖައްސާނެކަމަށް ވަޢުދުވެވަޑައިގެންނެވިއެވެ.
މި ހަމަލާ ދިން ފަރާތްތައް އަދި ނޭނގުނު ނަމަވެސް، މި ވައްކަމުގެ ބޮޑުމިނުން ކުރީގެ ރެކޯޑު ވަނީ ފަހަނައަޅާ ގޮސްފައެވެ. ކުރީގެ ރެކޯޑަކީ 2022 ވަނަ އަހަރު ރޮނިން ނެޓްވޯކުން 620 މިލިއަން ޑޮލަރުގެ އީތިރިއަމް އަދި ޔޫއެސްޑީ ކޮއިން ވަގަށް ނެގުމެވެ. މި ހަމަލާ ދިން ކަމަށް ތުހުމަތުކުރެވެނީ އުތުރު ކޮރެއާގެ ލަޒަރަސް ގްރޫޕަށެވެ.
2018 ވަނަ އަހަރު އުފެދުނު ބައިބިޓުގެ އިންވެސްޓަރުންގެ ތެރޭގައި، ޕިޗްބުކުން ބުނާ ގޮތުގައި، ޑޮނަލްޑް ޓްރަމްޕްގެ ފާހަގަކޮށްލެވޭ އެހީތެރިއެއް ކަމަށްވާ ޕީޓަރ ތީލް ހިމެނެއެވެ.
މި ހާދިސާއަކީ ކްރިޕްޓޯކަރަންސީ މާކެޓަށް ބޮޑު ގުޑުމެއް ގެނެސްދިން ކަމެކެވެ. އަދި މިފަދަ ބޮޑެތި ވައްކަންތަކުން ކްރިޕްޓޯ އިންޑަސްޓްރީގެ ސަލާމަތާއި ރައްކާތެރިކަމާމެދު ސުވާލު އުފެދި، އިންވެސްޓަރުންގެ އިތުބާރަށް އަސަރުކުރުމުގެ ފުރުސަތު އޮތް ކަމެކެވެ.
ބައިބިޓުން މިހާރު ވަނީ މި މައްސަލަ ތަޙްޤީޤުކުރުމަށް ކަމާބެހޭ ފަރާތްތަކާއެކު މަސައްކަތް ފަށާފައެވެ. އަދި ކުންފުނިން ބުނާ ގޮތުގައި، ވަގަށް ނެގުނު ފައިސާ އަނބުރާ ހޯދުމަށް އަވަސް ފިޔަވަޅުތަކެއް އަޅަމުންދެއެވެ. ނަމަވެސް، މިފަދަ ބޮޑު އަދަދެއްގެ ޑިޖިޓަލް އެސެޓް އަނބުރާ ހޯދުމަކީ ގޮންޖެހުންތަކެއް ހުރި ކަމެއް ކަމަށް ކްރިޕްޓޯ އިންޑަސްޓްރީގެ މާހިރުން ފާހަގަކުރެއެވެ.
މި ހާދިސާއާ ގުޅިގެން، ދުނިޔޭގެ އެހެން ބޮޑެތި ކްރިޕްޓޯ އެކްސްޗޭންޖްތަކުންވެސް ވަނީ އެފަރާތްތަކުގެ ސެކިއުރިޓީ ފިޔަވަޅުތައް ހަރުދަނާކުރަމުންދާ ކަމަށް ބަޔާން ނެރެފައެވެ. އަދި ކްރިޕްޓޯކަރަންސީ ބޭނުންކުރާ ފަރާތްތަކަށް އިތުރު ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފައިވެއެވެ.