ދ. މީދޫ ސިއްޙީ މަރުކަޒުގެ އައު އިމާރާތް ރައީސުލްޖުމްހޫރިއްޔާ ހުޅުވައިދެއްވައިފި

ދ. މީދޫ ސިއްޙީ މަރުކަޒުގެ އައު އިމާރާތް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހުޅުވައިދެއްވައިފިއެވެ.

މިރަށުގެ ސިއްޙީ މަރުކަޒުގެ އައު އިމާރާތް ހުޅުވާފައިވަނީ ރައީސުލްޖުމްހޫރިއްޔާ ޑރ. މުޙައްދު މުޢިއްޒު ދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު މީދޫއަށް ވަޑައިގެންނެވެ. 

މި އިމާރާތް ހުޅުވުމަށްފަހު ރައީސް ވަނީ އައު އިމާރާތް ބައްލަވާލައްވާފަ އެވެ. މި އިމާރާތުން ލިބޭނެ ޚިދުމަތްތަކުގެ ތެރޭގައި އާންމު ސިއްޙަތުގެ ޚިދުމަތްތަކާއި، ދުންފަތުގެ އިސްތިޢުމާލު ކުރާ ފަރާތްތަކަށް ބޭނުންވާ ތަފާތު ފަރުވާތައް ހިމެނެއެވެ. މީގެ އިތުރުން ގައިންގައިން ނާރާ ބަލިތަކަށް ފަރުވާ ދިނުމަށް ހާއްސަ ކްލިނިކެއް ވަނީ ޤާއިމްކުރެވިފައެވެ. އަދި މާބަނޑު މީހުންނަށް ދޭ ފަރުވާތައް ދިނުމަށް ހާއްސަ ކްލިނިކެއްގެ އިތުރުން ކުޑަކުދިންގެ ބަލިތަކަށް ފަރުވާދިނުމަށް ވެސް ހާއްސަ ކްލިނިކެއް އައު އިމާރާތުގައި ވަނީ ޤާއިމް ކުރެވިފައެވެ.

މީދޫގެ ސިއްޙީ މަރުކަޒަކީ މިވަގުތު 2 ޑޮކްޓަރުންނާއި އެކު މަސައްކަތް ކުރަމުންދާ ތަނެކެވެ. މީދޫގެ ސިއްޙީ މަރުކަޒުން ވިދާޅުވީ އައު އިމާރާތާއެކު މިހާރު ދިމާވެފައިވާ ޖާގައިގެ ދަތިކަމަށް ޙައްލެއް ލިބިގެންދާނެ ކަމަށެވެ. މި މަރުކަޒަކީ 24 ގަޑިއިރު ޚިދުމަތް ދެމުން އަންނަ މަރުކަޒެކެވެ.