ޗެމްޕިއަންސް ޓްރޮފީ: އެންމެ ފަހުގެ ޗެމްޕިއަން ޕާކިސްތާން މުބާރާތުން ކަޓައިފި

އައިސީސީ ޗެމްޕިއަންސް ޓްރޮފީގެ ގްރޫޕް-އޭގައި އިއްޔެ ބަނގުލަދޭޝްގެ މައްޗަށް ފަސް ވިކެޓުން ނިއުޒީލޭންޑު ކުރިހޯދުމުން، މުބާރާތް މި ފަހަރު ބާއްވާ ޕާކިސްތާނަށް މުބާރާތުން އަލްވަދާއު ކިޔަން ޖެހިއްޖެއެވެ.

ޕާކިސްތާނުގެ ރަވަލްޕިންޑީ ކްރިކެޓް ސްޓޭޑިއަމްގައި އިއްޔެ ކުޅުނު މެޗުގައި ޓޮސް ދިމާވެގެން ބަނގުލަދޭޝްއިން ނިންމީ ކުޅެން އަރާށެވެ. އެގޮތުން ބަނގުލަދޭޝްއަށް ހެދިފައިވަނީ 237 ލަނޑެވެ.

އެ ޓީމަށް އެންމެ ގިނަ ލަނޑު ހަދައިދިނީ 77 ލަނޑު ހެދި ނަޖްމުލް ހުސެއިން ޝަންޓޯ އާއި 45 ލަނޑު ހެދި ޖާކިރު ޢަލީއެވެ. 

ޖަވާބުގައި ކުޅެންއެރި ނިއުޒީލޭންޑަށް ނުތަނަވަސްކަން ގެނުވީ، ކުރީގޮޅު ބަނގުލަދޭޝްއިން ދެ ވިކެޓު ނެގުމުންނެވެ. ނަމަވެސް އެ ޓީމުގެ ރަޗިން ރަވިންދްރާގެ 112 ލަނޑާއި ޓޮމް ލަތަމްގެ 55 ލަނޑާއެކު، 46.1 އޯވަރުގެ ތެރާގައި ނިއުޒީލެންޑުން މެޗު ކާމިޔާބުކުރިއެވެ.

މި މެޗުގައި ނިއުޒީލޭންޑަން އެންމެ ގިނަ ލަނޑު ހަދައިދިން ރަޗިންއަކީ، އެ ޓީމުގެ ކެޕްޓަން މިޗެލް ސެންޓްނަރ ބަލިވުމުގެ ސަބަބުން ކުޅެން ނެރުނު ކުޅުންތެރިއެކެވެ.

މި ނަތީޖާއާއެކު ގްރޫޕް-އޭ އިން މުބާރާތުން ކަޓާނީ ޕާކިސްތާނާއި ބަނގުލަދޭޝްއެވެ. މި ދެ ޓީމަށް ވެސް ވަނީ އިންޑިއާ އާއި ނިއުޒީލެންޑާ ދެކޮޅަށް ކުޅުނު މެޗުން ނާކާމިޔާބާ ކުރިމަތިލާން ޖެހިފައެވެ. 

ޕާކިސްތާނަކީ މި މުބާރާތް އެންމެ ފަހުން ކާމިޔާބުކުރި ޓީމެވެ. 2017ގައި ކުޅުނު މި މުބާރާތުގެ ފައިނަލުގައި ޕާކިސްތާނުން ކުރި ހޯދީ ވާދަވެރި އިންޑިއާގެ މައްޗަށެވެ.

އަދި މި ފަހަރުގެ ޗެމްޕިއަންސް ޓްރޮފީއަކީ، 1996 ވަނަ އަހަރަށްފަހު ޕާކިސްތާނުގައި އައިސީސީގެ ފިރިހެން ޕްރޮފެޝަނަލް މުބާރާތެއް ބާއްވާ ފުރަތަމަ ފަހަރުވެސް މެއެވެ.