ދުނިޔެ
އެމެރިކާއަށް ކުރިމަތިިވެފައިވާ ބިހުގެ ދަތިކަން ޙައްލުކުރުމަށް ތުރުކީގެ އެހީއަށް އެދިއްޖެ

ތުރުކީގެ ކުކުޅު ބިސް ފާމެއް ފޮޓޯ:އިންޓަނެޓް
މިދިޔަ އަހަރުން ފެށިގެން އެމެރިކާގައި ފެތުރެމުންދާ ދޫނި ރޯގާގެ ސަބަބުން އެ ގައުމުގެ ބިސް އުފެއްދުންތެރިކަން ވަނީ ބޮޑުތަނުން ދަށްވެފައެވެ. މިކަމުގެ ސަބަބުން އެމެރިކާގެ ވިޔަފާރިތަކުން ވަނީ ބިސް އިމްޕޯޓް ކުރުމަށް ތުރުކީގައި އެދިފައެވެ.
ތުރުކީގެ ބިސް އުފައްދާ މަރުކަޒީ ޔޫނިއަންގެ ޗެއަރމަން އިބްރާހިމް އަފްޔޯން ވިދާޅުވި ގޮތުގައި މިއަހަރު އެމެރިކާއަށް 420 މިލިއަން ބިސް އެކްސްޕޯޓް ކުރުމަށް ވަނީ ރޭވިފައެވެ. މިއީ މިހާތަނަށް އެމެރިކާއަށް އެކްސްޕޯޓް ކުރެވޭ އެންމެ ގިނަ އަދަދެވެ.
2022 ވަނަ އަހަރުން ފެށިގެން އެމެރިކާގައި ފެތުރުނު ދޫނި ރޯގާގެ ސަބަބުން 140 މިލިއަނަށްވުރެ ގިނަ ބިސް އަޅާ ދޫނި ވަނީ މަރުވެފައެވެ. މީގެ ތެރެއިން 17 މިލިއަން ދޫނި މަރުވެފައިވަނީ 2023 ވަނަ އަހަރުގެ ނޮވެމްބަރު އަދި ޑިސެމްބަރު މަހުގެ ތެރޭގައެވެ. މިކަމުގެ ސަބަބުން ބިހުގެ އަގު ވަނީ އުފުލިފައެވެ.
އެމެރިކާގެ ލޭބަރ ސްޓެޓިސްޓިކްސް ބިއުރޯއިން ބުނާ ގޮތުގައި މިދިޔަ މަހު ބޮޑު ސައިޒުގެ ބިސް ކާޓަނެއްގެ އަގު ވަނީ 4.95 ޑޮލަރަށް އަރާފައެވެ. މިކަމުގެ ސަބަބުން ކޮސްޓްކޯ އަދި ޓްރޭޑަރ ޖޯސް ފަދަ ބޮޑެތި ސްޓޯރުތަކުން ވަނީ ކަސްޓަމަރުންނަށް ގަނެވޭނެ ބިހުގެ އަދަދު މަދުކޮށްފައެވެ. އަދި ވޭފަލް ހައުސްއިން ވަނީ ބިހަކަށް 50 ސެންޓުގެ އިތުރު އަގެއް ނަގަން ފަށާފައެވެ.
އެމެރިކާގެ އެގްރިކަލްޗަރ ޑިޕާޓްމަންޓުން ލަފާކުރާ ގޮތުގައި މިއަހަރު ބިހުގެ އަގު އިތުރު 20 އިންސައްތަ އިތުރުވާނެއެވެ. ޖެނުއަރީ މަހު ބިހުގެ އަގު ވަނީ 15.2 އިންސައްތަ އިތުރުވެފައެވެ. އަދި މިދިޔަ އަހަރާ އަޅާބަލާއިރު ބިހުގެ އަގު ވަނީ 53 އިންސައްތަ އިތުރުވެފައެވެ.
އެމެރިކާގެ ފާމް ބިއުރޯ ފެޑެރޭޝަނުން ބުނާ ގޮތުގައި އެމެރިކާއަށް ބިސް އިމްޕޯޓް ކުރެވެނީ ހަމައެކަނި ތުރުކީންނެވެ. ނަމަވެސް މާހިރުން ބުނާ ގޮތުގައި މި އިމްޕޯޓްތަކުން އެމެރިކާގެ ބިހުގެ ދަތިކަމަށް ބޮޑު ލުޔެއް ނުލިބޭނެއެވެ.
އެމެރިކާގެ ބިހާ ބެހޭ ބޯޑުން ބުނާ ގޮތުގައި އެވްރެޖްކޮށް އެމެރިކާގައި އަހަރަކު 7.5 ބިލިއަން ބިސް އުފައްދައެވެ. ނަމަވެސް މިއަހަރު މި އަދަދު ދަށްވާނެ ކަމަށް ބެލެވެއެވެ. ސަބަބަކީ ދޫނި ރޯގާގެ ސަބަބުން އިތުރު ދޫނިތައް މަރުވަމުންދާތީއެވެ.