ޞިއްޙީ ވުޒާރާގެ ހުއްދަ ނެތި ހިންގާ ޙިޖާމާ ކްލިނިކެއްގެ މައްސަލަ ފުލުހުން ބަލަނީ!

ޞިއްޙީ ވުޒާރާގެ ހުއްދައާއި ނުލައި ހުޅުމާލޭގައި ހިންގާ ޙިޖާމާ ކްލިނިކެއްގެ މައްސަލަ ފުލުހުން ބަލަންފަށައިފިއެވެ. 

ދިވެހި ފުލުހުންގެ ޚިދުމަތުން ބުނެފައިވަނީ ޞިއްޙީ ވުޒާރާ އިން ހުއްދަ ނުނަގައި ހުޅުމާލޭގައި ހިންގާ ޙިޖާމާ ކްލިނިކެއްގެ މައްސަލަ ބަލައިދިނުމަށް އެވުޒާރާއިން އެދިފައިވާތީ އެމައްސަލަ ފުލުހުން ބަލަމުންދާ ކަމަށެވެ. 

"ފަރުދުން" ނޫހުން ބެލި ބެލުމުން އެނގިފައިވާ ގޮތުގައި ފުލުހުން ބަލަމުންދަނީ ހުޅުމާލޭގައި ހިންގަމުންދާ ފަޒީސް ޙިޖާމާ ކްލިނިކްގެ މައްސަލައެވެ. 

މި ސެޕްޓަމްބަރު މަހުގެ 11 ވަނަ ދުވަހު ވެސް ޞިއްޙީ ވުޒާރާއިން ވަނީ އެވުޒާރާގެ ހުއްދަ ނެތި ހިންގާ ތަންތަނުގެ މައްސަލަ އާއި ގުޅިގެން ނޫސްބަޔާނެއް ނެރެފައެވެ. 

އެބަޔާނުގައި ބުނެފައިވަނީ ދިވެހިރާއްޖޭގައި އެއްެވެސް ބާވަތެއްގެ ޞިއްޙީ ޚިދުމަތެއް ދޭންވާނީ ޞިއްޙީ ޚިދުމަތް ދިނުމުގެ ޤާނޫނުގެ 11، 12 އަދި 14 ގައި ވާގޮތުގެ މަތިން ކަމަށެވެ. 

އެގޮތުން ޞިއްޙީ ޚިދުމަތް ދޭ ތަންތަން ހިންގަންވާނީ، އެތަންތަން ރަޖިސްޓަރ ކޮށް، އޮޕަރޭޓިންގ ލައިސެންސް ހޯދުމަށްފަހުގައި ކަމަށެވެ. 

މިހާރަކަށް އައިސް އޯލްޓަނޭޓިވް ބޭސްފަރުވާގެ ޚިދުމަތް ޚާއްޞަ ކޮށް ދިވެހި ބޭހާއި، ޙިޖާމާގެ ޚިދުމަތް ދެމުންދާކަން ފާހަގަވެފައިވާ ކަމަށް ޞިއްޙީ ވުޒާރާއިން ވަނީ ފާހަގަކޮށްފައެވެ.

އަދި ލައިސެންސް ނެތި މިފަދަ ޞިއްޙީ ޚިދުމަތް ދިނުމަކީ ކުށެއް ކަމުގައިވާތީ މިފަދަ ފަރާތްތަކާ ދޭތެރޭ ޞިއްޙީ ޚިދުމަތް ދިނުމުގެ ޤާނޫނުގެ ދަށުން ފިޔަވަޅުއަޅާނެ ކަމަށްެވެސް އެވުޒާރާއިން ވަނީ ބުނެފައެވެ.

ފަޒީސް ޙިޖާމާ ކްލިނިކްގެ މައްސަލާގައި ޞިއްޙީ ވުޒާރާއިން މީގެކުރިން ބުނެފައިވަނީ ރަޖިސްޓްރީކޮށް، އޮޕަރޭޓިން ލައިސެންސް ލިބެންދެން އެ ތެރަޕީގެ ޚިދުމަތްތައް ހުއްޓާލުމަށް އެ ކްލިނިކްގެ ވެރިޔާ ފަޒީލާ އުސްމާނަށް އަންގާފައިވާ ކަމަށެވެ. އެއާ ޚިލާފަށް މަސައްކަތްކުރާނަމަ ޤާނޫނުގެ ދަށުން ފިޔަވަޅު އަޅާނެ ކަމުގެ އިންޒާރު އެވުޒާރާއިން ދީފައިވާކަމަށްވެސް  ބުނެފައެވެ.

އަދި ފަޒީލާގެ ޙިޖާމާ ޚިދުމަތް ޕްރޮމޯޓް ކުރަން ސޯޝަލް މީޑިއާގައި ކޮށްފައިވާ އިޝްތިހާރުތަކަކީ އެވުޒަރާގެ ހުއްދަ ލިބިގެން ނޫނީ ކުރެވޭނެ ކަމަކަށް ނުވާތީ އެ އިޝްތިހާރުތައް ނެގުމަށް ވެސް އަންގާފައިވާއިރު މީސްމީޑިއާގައި އޭނާ އާއްމު ކުރާ ބަލި މީހުންގެ މެޑިކަލް ރިޕޯޓުތަކުގެ މައުލޫމާތަކީ އެންމެ ރައްކާތެރި އަދި ސައްހަ މަޢުލޫމާތުކަން ކަށަވަރު ނުވާތީ އެ ރިޕޯޓުތައް ނެގުމަށް ވެސް އެވުޒާރާއިން ވަނީ އަންގައިފައެވެ.