އެންވިޑިއާއިން "ސައިން ލެންގުއޭޖް" ދަސްކުރުމަށް އޭއައި ބޭނުންކޮށްގެން އައު ޕްލެޓްފޯމެއް ތަޢާރަފުކޮށްފި

ބުރާސްފަތި ދުވަހު އެންވިޑިއާއިން އެމެރިކަން ސައިން ލެންގުއޭޖް (އޭއެސްއެލް) ދަސްކުރުމަށް އާޓިފިޝަލް އިންޓެލިޖެންސް (އޭއައި) ބޭނުންކޮށްގެން "ސައިންސް" ނަމަކަށް ކިޔާ އައު ޕްލެޓްފޯމެއް ތަޢާރަފުކޮށްފިއެވެ. މި ޕްލެޓްފޯމަކީ އެމެރިކަން ސޮސައިޓީ ފޮރ ޑެފް ޗިލްޑްރަން އަދި ހެލޯ މަންޑޭ ކްރިއޭޓިވް އޭޖެންސީއާ ގުޅިގެން ތައްޔާރުކޮށްފައިވާ ޕްލެޓްފޯމެކެވެ.

"ސައިންސް" ޕްލެޓްފޯމުގައި ހިމެނެނީ އިޝާރާތްތައް ދައްކައިދޭ ތްރީޑީ އެވަޓާރއެކެވެ. މި ޕްލެޓްފޯމް ބޭނުންކުރާއިރު ކެމެރާ އޮންކޮށްގެން އިޝާރާތްތައް ދަސްކުރުމަށްފަހު އޭއައި ޓޫލްއަކުން ފީޑްބެކް ދެއެވެ. މި ވަގުތު މި ޕްލެޓްފޯމުގައި 100 އިޝާރާތް ހިމެނިފައިވާއިރު، އެ އަދަދު 1،000 އަށް އިތުރުކުރުމަށް އެންވިޑިއާއިން އުންމީދުކުރެއެވެ.

"ސައިންސް" އަކީ ނުކުޅެދުންތެރިކަން ހުންނަ މީހުންނަށާއި އުމުރުން ދުވަސްވީ މީހުންނަށް އެހީތެރިވުމަށް ޓަކައި އޭއައި ބޭނުންކޮށްގެން ތައްޔާރުކުރެވޭ އެސިސްޓިވް ޓެކްނޮލޮޖީގެ އެއް މިސާލެވެ. މީގެ އިތުރުން މެޓާ، ގޫގުލް އަދި އޯޕަންއޭއައި ފަދަ ކުންފުނިތަކުން ވެސް ލޯފަން މީހުންނަށް އެހީތެރިވާ ފީޗަރތައް ތަރައްޤީކޮށްފައިވެއެވެ.

އެމެރިކަން ސައިން ލެންގުއޭޖަކީ އެމެރިކާގައި އިނގިރޭސި އަދި ސްޕެނިޝް ބަހަށްފަހު އެންމެ ގިނައިން ބޭނުންކުރާ ތިންވަނަ ބަހެވެ. މި ޕްލެޓްފޯމް ހިލޭ ބޭނުންކުރެވޭނެއެވެ. އަދި އޭއެސްއެލް ބޭނުންކުރާ ފަރާތްތަކަށް މި ޕްލެޓްފޯމުގައި ނެތް އިޝާރާތްތަކުގެ ވީޑިއޯ އަޕްލޯޑްކުރުމުގެ ފުރުސަތު ވެސް ލިބިގެންދާނެއެވެ.

އެމެރިކަން ސޮސައިޓީ ފޮރ ޑެފް ޗިލްޑްރަންގެ އެގްޒެކެޓިވް ޑައިރެކްޓަރ ޗެރީ ޑައުލިންގ ވިދާޅުވީ، ގިނަ ބީރު ކުދިން އުފަންވަނީ އަޑުއިވޭ މައިންބަފައިންނަށް ކަމަށާއި، "ސައިންސް" ފަދަ ޓޫލްތައް ބޭނުންކޮށްގެން އޭއެސްއެލް ދަސްކުރުމުން 6 މަހާއި 8 މަހާ ދެމެދުގެ ކުޑަކުދިންނާ މުވާސަލާތުކުރުމުގެ ފުރުސަތު ލިބިގެންދާނެ ކަމަށެވެ.