ޚަބަރު
ރިނބުދޫގެ ރައްޔިތުން ބޭނުންވާ މަޝްރޫޢުތައް މިއަހަރު ނިންމާނެކަމުގެ ޔަޤީންކަން ރައީސް ދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރިބުދޫ ރައްޔިތުންނާއި އެކު ފޮޓޯ:ރައީސް އޮފީސް
ދ. ރިނބުދޫގެ ރައްޔިތުން ބޭނުންވާ މަޝްރޫޢުތައް މިއަހަރު ކުރިއަށްގެންގޮސް ރައްޔިތުން އެދޭ ނަތީޖާ ނެރެދޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ރިނބުދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ސަރުކާރުގެ ހުރިހާ ސިޔާސަތެއްގެ އަމާޒުހުރީ ނަތީޖާ ނެރުމަށްކަމަށެވެ.
ރިނބުދޫގެ ރައްޔިތުން ބޭނުންވާ އެންމެ މުހިންމު އެއްކަމަކީ ސްކޫލުގެ ޖާގައިގެ ދަތިކަން ހައްލުކުރުންކަމަށް ރައީސް ފާހަގަކުރެއްވިއެވެ. މިކަމަށް ޙައްލު ހޯދުމަށް ކުރިއަށް އޮތް ދެމަސްދުވަހުގެތެރޭގައި 6 ކްލާސްރޫމާއި ކޮމްޕިއުޓަރ ރޫމާއި ލައިބްރަރީ ހިމެނޭ މަޝްރޫޢެއް މެއި މަހުގެތެރޭގައި ފަށްޓަވާނެކަމަށް ރައީސް ވިދާޅުވިއެވެ.
މީގެ އިތުރުން، ރިނބުދޫގައި މިހާރު ހުރި މިސްކިތް ބައުވެފައިވާތީ، މިއަހަރުގެ ޖުލައި މަހު 500 މީހުންގެ ޖާގައިގެ އައު މިސްކިތެއް އެރަށުގައި ތަރައްޤީކޮށްދެއްވާނެކަމަށް ރައީސް ވިދާޅުވިއެވެ. އަދި ސިއްޙީ މަރުކަޒުގެ ޖާގައިގެ ދަތިކަމާއި މުވައްޒަފުންގެ ދަތިކަން ހައްލުކޮށްދެއްވާނެކަމަށްވެސް ވިދާޅުވިއެވެ.
ކުޅިވަރުގެ ދާއިރާއަށް އަލިއަޅުއްވާލައްވާ ރައީސް ވަނީ ފިޓްނަސް ރެކްރިއޭޝަން ސެންޓަރެއް ރިނބުދޫގައިވެސް ތަރައްޤީކުރަން މިއަހަރު ފަށްޓަވާނެކަމަށް ވިދާޅުވެފައެވެ.
ރަށުން ބަދަލުވެފައިވާ މީހުންގެ ގޯތިތަކުގެ މައްސަލާގައި ހުރިހާ ރައްޔިތުންގެ ހައްގު ހިމާޔަތްވާ ގޮތަށް އަލުން ލޭންޑުޔޫސް ޕްލޭން ހަދައި މައްސަލައަށް ދާއިމީ ހައްލެއް ގެނެސްދެއްވާނެކަމަށް ރައީސް ވިދާޅުވިއެވެ. އަދި ރިނބުދޫގެ މަޝްހޫރު އަތްތެރި މަސައްކަތް ކުރިއެރުވުމަށް މޯލްޑިވްސް ކޮލިފިކޭޝަން އޮތޯރިޓީން ސެޓްފިކެޓް ލިބޭނެގޮތަށް މަސައްކަތް ދަސްކޮށްދޭނެ މަރުކަޒެއް ޤާއިމްކުރުމަށް ވިސްނާވަޑައިގަންނަވާކަމަށްވެސް ރައީސް ވިދާޅުވިއެވެ.
ރައީސް ވަނީ މިއަހަރުގެ ތެރޭގައި މި ހުރިހާ މަޝްރޫޢުއެއް ނިންމުމަށް މަސައްކަތްކުރައްވާކަމަށާއި، އެއްވެސް މަޝްރޫޢުއެއް ނުހުއްޓޭނެކަމަށާއި، ނިމެންދެން ކުރިއަށްދާނެކަމުގެ ޔަޤީންކަން ދެއްވާފައެވެ.