ނޭޕާލް ބަލިކޮށް ރާއްޖޭގެ ބާސްކެޓު ޓީމު ފައިނަލަށް

ސާބާ ވިމެންސް ޗެމްޕިއަންޝިޕްގައި ނޭޕާލް ބަލިކޮށް ރާއްޖޭގެ އަންހެން ބާސްކެޓުބޯޅަ ޓީމު މުބާރާތުގެ ފައިނަލުން ޖާގަ ހޯދައިފިއެވެ.

މި މެޗަށް ނޭޕާލް ނިކުތީ، އެ ޓީމުން އިންޑިއާއާ ދެކޮޅަށް ކުޅުނު ފުރަތަމަ މެޗުން 113-32 ޕޮއިންޓުން ބަލިވެފައިވުމުން، މުބާރާތުގައި އިތުރަށް ކުރިޔަށް ދިއުމަށް ކޮންމެހެން ރާއްޖޭގެ ޓީމު ބަލިކުރަންޖެހޭނެކަން އެނގިގެނެވެ. ނަމަވެސް ރާއްޖެއިން ވަނީ 53-46 ޕޮއިންޓުން ނޭޕާލް ބަލިކޮށް، އެ ޓީމު މުބާރާތުން ކަޓުވާލާފައެވެ.

ނޭޕާލާ ދެކޮޅަށް ރާއްޖެއިން ކުޅުނު މެޗުގެ ފުރަތަމަ ދެ ކުއާޓާ ނިމުނުއިރު ރާއްޖެ އޮތީ 26-15 ޕޮއިންޓުން ކުރީގައެވެ. ނަމަވެސް ތިންވަނަ ކުއާޓާ ނޭޕާލުން ނިންމާލީ އެއް ޕޮއިންޓުގެ ލީޑެއްގައެވެ.

އެހެންކަމުން ފަހު ކުއާޓާގައި ރާއްޖޭގެ ޓީމުން އިތުރަށް ކުޅުން ރަގަޅުކޮށް މެޗު ކާމިޔާބުކުރިއެވެ. 

މި މެޗުގައި ރާއްޖޭގެ ޓީމަށް އެންމެ ގިނަ ޕޮއިންޓު ހޯދައިދިނީ 19 ޕޮއިންޓު ސްކޯރކުރި ރައިފާ އިބްރާޙިމްއެވެ. އަދި އިސްރާއު އަބްދުލްޝުކޫރު (އިއްކޮ) 15 ޕޮއިންޓު ސްކޯރކުރިއިރު، ވެޓެރަން ކުޅުންތެރިޔާ އައިމިނަތު ޝިއުރާ އަބްދުލްބާރީ ވަނީ 11 ޕޮއިންޓު ސްކޯރކޮށްފައެވެ.

ފައިނަލު މެޗުގެ ކުރިން ރާއްޖެ އާއި އިންޑިއާ ގްރޫޕް ސްޓޭޖުގައި ބައްދަލުކުރާ މެޗު އޮންނާނެއެވެ. އެ މެޗު ކުޅެން ހަމަޖެހިފައިވަނީ މިއަދެވެ.

އޭގެ ފަހުން ފައިނަލް މެޗު ކުޅުމަށް ހަމަޖެހިފައިވަނީ ބުދަ ދުވަހެވެ.

މިއީ މި މުބާރާތް ބާއްވާ ތިންވަނަ ފަހަރެވެ. އަދި މިފަހަރުގެ މުބާރާތުގައި ސްރީ ލަންކާ ނުކުޅުމަށް ނިންމުމުން، މުބާރާތުގައި ވާދަކުރަމުން އަންނަނީ ތިން ޓީމެވެ.

މި މުބާރާތުގެ ފައިނަލަށް ރާއްޖެ ދަތުރު މިކުރީ އަލަށެވެ. އަދި 2016 ވަނަ އަހަރާއި 2022ގައި އޮތް މުބާރާތުގައި ރާއްޖެއިން ވަނީ ބްރޯންޒް މެޑަލް ހޯދާފައެވެ.