ކުޅިވަރު ޤާނޫނަށް ގެންނަން ބޭނުންވާ އިސްލާހުތަކާ ގުޅިގެން ވޮލީ ކޮމިއުނިޓީއާއެކު މަޝްވަރާކޮށްފި

ކުޅިވަރު ޤާނޫނަށް ގެންނަން ބޭނުންވާ އިސްލާހުތަކާ ގުޅިގެން، ވޮލީބޯލް އެސޯސިއޭޝަން އޮފް ދަ މޯލްޑިވްސް (ވީއޭއެމް) އާއި ވޮލީ ކޮމިއުނިޓީއާއެކު މަޝްވަރާ ބައްދަލުވުމެއް ބާއްވައިފިއެވެ.

ސޯޝަލް ސެންޓަރުގައި ބޭއްވި މި ބައްދަލުވުމުގައި ވީއޭއެމްގެ އެގްޒެކެޓިވް ކޮމިޓީގެ ބޭފުޅުންނާއި، ކުރީގެ ތަޖުރިބާކާރު ވޮލީ ކުޅުންތެރިންގެ އިތުރުން ކޯޗުންނާއި، ރެފްރީން އަދި އޮފިޝަލުން ބައިވެރިވެވަޑައިގަތެވެ.

މި ބައްދަލުވުމާ ގުޅިގެން ވީއޭއެމްއިން ހާމަކޮށްފައިވާ ގޮތުގައި، ބައްދަލުވުން ވަރަށް ކާމިޔާބެވެ. އެގޮތުން މި ބައްދަލުވުމުގެ ސަބަބުން ގިނަ ޚިޔާލުތަކެއް ލިބިފައިވާކަމަށާއި، ކުޅިވަރު ޤާނޫނަށް ގެންނަންޖެހޭ ތަފާތު ގިނަ އިސްލާހުތަކެއް މި ބައްދަލުވުމުގެ ސަބަބުން ފާހަގަވެގެން ދިޔަކަމަށެވެ.

ރައްޔިތުންގެ މަޖިލީހުންވަނީ ކުޅިވަރު ޤާނޫނަށް ގެންނަން ފެންނަ އިސްލާހުތަކާއި ގުޅޭގޮތުން ޚިޔާލު ހުށަހެޅުމަށް ކުޅިވަރު އެސޯސިއޭޝަންތަކަށް ހުޅުވާލާފައެވެ. އެސޯސިއޭޝަންތަކުން ޤަބޫލުކުރާ ގޮތުގައި މިފުރުސަތުގެ ސަބަބުން ކުޅިވަރު އިތުރަށް ތަރައްޤީވެ އައު ހަރުފަތަކަށް ދިއުމަށް ބާރަކަށް ވެގެންދާނެއެވެ.