މަސްތުވާތަކެތީގެ މައްސަލާގައި ހޯރަފުށިން މީހަކު ހައްޔަރުކޮށްފި!

މަސްތުވާ ތަކެތިީގެ ވިޔަފާރި ކުރަމުންދިޔަ މައްސަލާގައި ހއ ހޯރަފުށިން ދިވެއްސެއް ހައްޔަރުކޮށްފިއެވެ.

މިމައްސަލާގައި ދިވެހި ފުލުހުންގެ ޚިދުމަތުން ހައްޔަރުކޮށްފައިވަނީ ހއ. ހޯރަފުށި / ރަތްބަގީޗާގެ، އަޙްމަދު ޝީބާން (42އ) އެވެ.

އެމީހާ ހައްޔަރުކޮށްފައިވަނީ ހޯރަފުށި ޕޮލިސް ސްޓޭޝަނާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި ކަމަށް ފުލުހުން ވަނީ ބުނެފައެވެ. 

މި ސެޕްޓެމްބަރު މަހުގެ 21 ވަނަ ދުވަހު ހިންގި މި އޮޕަރޭޝަނުގައި، އޭނާ ދިރިއުޅޭ ކޮޓަރި ކޯޓު އަމުރެއްގެ ދަށުން ބަލައިފާސްކުރިއިރު މަސްތުވާތަކެތިކަމަށް ބެލެވޭ ތަކެތި ފެނިފައިވާ ކަަމަށް ފުލުހުން ވަނީ ބުނެފައެވެ. 

 މި ތަކެތީގެ ވަގުތީ ބަރުދަނީ 50.6 ގްރާމް ކަމަށާއި، މީގެ އިތުރުން، މަސްތުވާތަކެތި ވިއްކައި ވިޔަފާރިކުރަން ގެންގުޅޭ ކަމަށް ބެލެވޭ ތަކެއްޗާއި ފައިސާ ވެސް ފެނިފައިވާ ކަމަށް ފުލުހުން ވަނީ ބުނެފައެވެ.

މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވާ ކަމަށާއި، މި މައްސަލަ ހޯރަފުށި ޕޮލިސް ސްޓޭޝަނުން ގެންދަނީ ތަހުޤީޤު ކުރަމުންކަމަށްވެސް ފުލުހުން ވަނީ ބުނެފައެވެ.