ޗައިނާގެ ކުންފުންޏަކުން މުވައްޒަފުން ކައިވެނިކޮށް ދަރިންހޯދަން މަޖުބޫރުކުރުމުން ސަރުކާރުން އެކަން ހުއްޓުވައިފި

ޗައިނާގެ ޝަންޑޯންގ ޕްރޮވިންސްގައި ހިންގާ ކުންފުންޏަކުން އެ ކުންފުނީގެ މުވައްޒަފުންނަށް ކައިވެނި ކުރުމަށް މަޖުބޫރުކޮށް ނެރުނު އިޢުލާނެއް ސަރުކާރުން ބާޠިލުކޮށްފިއެވެ. ސައުތު ޗައިނާ މޯނިންގ ޕޯސްޓުން ރިޕޯޓުކުރި ގޮތުގައި، ޝަންޑޯންގ ޝުންޓިއަން ކެމިކަލް ގްރޫޕް ކޯ. ލިމިޓެޑްއިން އެ ކުންފުނީގެ 1،200 އަށްވުރެ ގިނަ މުވައްޒަފުންނަށް ނޯޓިސް ދީފައިވެއެވެ. މި ނޯޓިސްގައި ވަނީ މުވައްޒަފުން ރަނގަޅަށް މަސައްކަތްކޮށް، އާއިލާ ބިނާކުރުމަށް އަންގާފައެވެ.

މި ނޯޓިސްގައި ވަނީ 28 އަހަރާއި 58 އަހަރާ ދެމެދުގެ ކައިވެނި ނުކުރާ މުވައްޒަފުންނާއި ވަރިވެފައިވާ މުވައްޒަފުން މިއަހަރުގެ ސެޕްޓެމްބަރު މަހުގެ ނިޔަލަށް ކައިވެނިކޮށް އާއިލާ ބިނާކުރުމަށް އަންގާފައެވެ. އަދި މާރިޗު މަހުގެ ނިޔަލަށް ކައިވެނި ނުކުރާ މުވައްޒަފުން އަމިއްލައަށް  ސިޓީއެއް ލިޔުމަށާއި، ޖޫން މަހުގެ ނިޔަލަށް ކައިވެނި ނުކުރާ މުވައްޒަފުންގެ "އިވެލުއޭޝަނެއް" ހެދުމަށްފަހު، ސެޕްޓެމްބަރު މަހުގެ ނިޔަލަށްވެސް ކައިވެނި ނުކުރާ މުވައްޒަފުން ވަޒީފާއިން ވަކިކުރާނެ ކަމަށް ބުނެފައިވެއެވެ.

ކުންފުނިން ބުނި ގޮތުގައި މި ފިޔަވަޅު އަޅަނީ "މަސައްކަތްތެރިކަމާއި، ހެޔޮކަމާއި، ވަފާތެރިކަމާއި، މައިންބަފައިންނަށް ކިޔަމަންތެރިވުމާއި، އަދި ތެދުވެރިކަމުގެ" ރޫހާއި ސަގާފީ އަގުތައް ކުރިއެރުވުމަށެވެ.

މި ޚަބަރު ފެތުރުމާއެކު، ޗައިނާގެ ސޯޝަލް މީޑިއާ ބޭނުންކުރާ ފަރާތްތަކުން މި ނިންމުމާ ދެކޮޅަށް އަޑުއުފުލައި، ކުންފުނިން ގިނަ ގާނޫނުތަކާ ޚިލާފުވެފައިވާ ކަމަށް ބުނެފައިވެއެވެ.

"ކުންފުނީގެ ގަވާއިދުތައް ގާނޫނުތަކާއި އިޖުތިމާޢީ އަޚްލާގަށްވުރެ މަތިވެގެން ނުވާނެ،" އެއް ޔޫސަރ ކޮމެންޓުކުރިއެވެ. އަނެއްބައި މީހުން ފާހަގަކުރި ގޮތުގައި ޗައިނާގެ ކައިވެނީގެ ގާނޫނުން ކައިވެނިކުރުމުގެ މިނިވަންކަން ކަށަވަރުކޮށްދެއެވެ.

"މި ބުއްދި ނެތް ކުންފުނިން އަމިއްލަ ކަންކަމަށް އަޅާލައި، މުވައްޒަފުންގެ އަމިއްލަ ދިރިއުޅުމާ ދުރުހެލިވާންވީ،" އަނެއް ޔޫސަރއެއް ބުނެފައިވެއެވެ.

މި މައްސަލަ ބޮޑުވެގެން ދިޔުމާއެކު، އެ ސަރަހައްދުގެ ހިއުމަން ރިސޯސަސް އަދި ސޯޝަލް ސެކިއުރިޓީ ބިއުރޯއިން އިސްލާހު އަމުރެއް ނެރެ، ކުންފުނީގެ ނޯޓިސް ބާޠިލުކޮށްފައިވެއެވެ.