ޒިންމާދާރު ކަމާއި އެކު ބަސް ދަތުރުގެ ޚިދުމަތް ބޭނުން ކުރާށެވެ!

ޢާންމު ދަތުރުފަތުރު ކުރުމުގެ ނިޒާމުގެ ތެރެއިން، ގްރޭޓާރ މާލޭ ސަރަހައްދުގައި މިހާރު އެންމެ ގިނަ ބަޔަކު ބޭނުން ކުރާ ޚިދުމަތަކީ އެމް.ޓީ.ސީ.ސީ ފޯރުކޮށް ދޭ ބަހުގެ ޚިދުމަތެވެ. ބަހުގެ ޚިދުމަތަކީ ވަރަށް ގިނަ ބަޔަކު އެ ޚިދުމަތަކަށް ބަރޯސާވާ ޚިދުމަތެކެވެ. އަގު ހެޔޮ ކަމާއި އެކު މާލެ ހުޅުލެ އަދި ހުޅުމާލޭގެ ފޭސް 1 އަދި 2 ކަށް ދަތުރުތައް ކުރާ އަދަދު ދަނީ ދުވަހަކަށް ވުރެ ދުވަހެއް އިތުރުވަމުންނެވެ. 

ޚިދުމަތުގެ ފެންވަރު ހިފެހެއްޓުމަށް ގިނަ މަސައްކަތްތަކެއް ކުރެވެއެވެ. މިފަދަ ޚިދުމަތެއް ރައްޔިތުންނަށް ދިނުމަށްޓަކައި، ބަހުގެ ޚިދުމަތް ދިނުމުގެ މަސައްކަތް ކުރައްވާ ފަރާތްތަކުން 24 ގަޑި އިރު ކެނޑިނޭޅި ބުރަ މަސައްކަތްތަކެއް ކުރައްވައެވެ. އޭގެ ތެރެއިން އެންމެ ފާހަނގަކޮށް ލެވެނީ ބަހުގެ ސާފުތާހިރު ކަމަށް އަހަންމިއްޔަތުކަން ދީގެން ކުރެވޭ ގިނަ މަސައްކަތްތަކެވެ. ކޮންމެ ދުވަހަކަށް އިރު އުދަރެހުން އެރުމުގެ ކުރިން ބަސްތައް ސާފުކުރުމާއި، ބަހުގެ ހުރި މައްސަލަތައް ދަނެގަތުމާއި، ހައްލުކުރަން ޖެހޭ ކަންކަމަކީ ފަރުދާގެ ފުރަގަހުން ގިނަ ބަޔަކު ކުރާ ބުރަ މަސައްކަތްތަކެވެ. 

ސާފުތާހިރު ކަމަކީ ވަކި ބަޔަކަށް ޚާއްސަ ކަމެއް ނޫނެވެ. ތަނެއް ރީތިކޮށް އޮތިއްޔާ އެންމެނަށް ވެސް ރީއްޗެވެ. ނަމަވެސް މަދު ބަޔަކު ކުރާ ކަމެއްގެ ސަބަބުން ރީތި އެތައް ކަމެއް ހަޑިވެގެން ދެއެވެ. އަދި މަދު ބަޔަކު ކުރާ އަމަލެއްގެ ސަބަބުން ގިނަ ބައެއްގެ އަގު ވެއްޓި ދިއުމީވެސް ވާ ކަންކަމެވެ. 

މި ފަހަކުން އައިސް ފާހަނގަކޮށްލެވޭ ވަރަށް ނޭދެވޭ ކަންތައްތަކެއް ބަހުގައި ދަތުރުކުރާ ފަރާތްތަކުން ކޮށްފައި ހުންނަ ކަމީ ވަރަށްވެސް ހިތާމަވެރި ކަމެކެވެ. ބަހުގެ ސީޓް ތަކުގެ ފަހަތުގައި ލިޔެފައި ހުންނަ ލިޔުންތަކާއި ކުރެހުންތަކަކީ އާންމު މިންގަނޑާއި ޚިލާފް ކަންކަމެވެ. ބަހުގެ ޚިދުމަތް ދޭ ފަރާތްތަކުން ހަފްތާއަކު އެއް ފަހަރު ކަހަލަ ގޮތަކަށް މި ސީޓްތަކުގެ ފަހަތުގައި އަލުން ދަވާދު ލައި ހަދައެވެ. ނަމަވެސް މިކަންތައް ތަކުރާރުކޮށް ކުރާ ބަޔަކު ހަމަ ކުރަނީއެވެ. ހިތާމަޔަކީ މިފަދަ އަމަލުތަކުގެ ފަހަތުގައި ތިބި ކަމަށް އެންމެ ބޮޑަށް ޝައްކު ކުރެވެނީ ސްކޫލްތަކުގެ ދަރިވަރުންގެ މައްޗަށެވެ. ލިޔެފައި ހުންނަ ލިއުންތަކުން އެކަމަށް ހެކި ދެއެވެ. އަދި އާންމުކޮށް ބޭނުންކޮށްފައި ހުންނަ ގަލަމާއި މާކަރާއި ޓިޕެކްސްއިން އެކަން އިތުރަށް ޔަޤީނާއި ގާތެވެ. 

މީ ހިތާމަވެރި ކަމެކެވެ. މީ އަޅުގަނޑުމެންގެ މުސްތަޤްބަލާއި ހަވާލުވާން އޮތް ޖީލުގެ އަމަލުތައް ބައްޓަން ވެފައި އޮންނަން ޖެހޭނެ ގޮތެއް ނޫނެވެ. ދަރިވަރުން ވެސް ދަންނަން ޖެހޭ ހަޤީޤަތެއް އެބަ އޮތެވެ. ބެލެނިވެރިންނާއި މުދައްރިސުންގެ ޒިންމާވެސް މިކަމުގައި އެބަ އޮތެވެ. ބަހަކީ ވަކި ބަޔަކަށް ޚާއްސަ ޚިދުމަތެއް ނޫނެވެ. އެއީ އެންމެންގެ ދަތުރުފަތުރު ކުރުމުގެ ނިޒާމެވެ.

 ތިމާ ބަހުން ދަތުރުކޮށް ނިމި މަންޒިލަށް ވާޞިލުވިޔަސް، ހަމަ އެ ސީޓްގައި ތިބެ އެތައް ބަޔަކު ދުވާލުގެ ބާކީ އޮތް ވަގުތު ތަކުގައި ދަތުރު ކުރާނެކަން ދަންނަން ޖެހެއެވެ.

 ތުއްތު ކުދިންނާއި ބޮޑެތި މީހުންނާއި މުސްކުޅިންގެ އިތުރުން ޚާއްސަ އެހީއަށް ބޭނުންވާ ފަރާތްތަކުން ބޭނުން ކުރާ ބަހެއްކަން ދަނެ ތިމާ ބަހުން ފައިބަގެން ދާއިރު، އަނެކާއަށްވެސް ހިތްހަމަ ޖެހިލައިގެން ދަތުރު ކުރެވޭނެ ފަދަ ގޮތަކަށް އޮތް މާހައުލެއް ކަމުގައި ބަހުގެ މާހައުލު ހެދުމީ އަމިއްލަ ޒިންމާއެކެވެ.