ޚަބަރު
ޕީއެންސީގެ ބައެއް މެންބަރުން މިއަދުގެ ވޯޓުގައި ބައިވެރިނުވާކަމަށް ބުނާ ވާހަކަ ދޮގުކޮށްފި

ފަލާހު/ ފޮޓޯ: މަޖިލިސް
މިއަދު ރައްޔިތުންގެ މަޖިލީހުގައި ނެގުނު ވޯޓުގައި ޕީއެންސީގެ މެމްބަރުންތަކެއް ބައިވެރިނުވާ ކަމަށް ދެކެވެމުންދާ ވާހަކަތައް އެ ޕާޓީގެ ޕީޖީ ލީޑަރު އިބްރާހީމް ފަލާހު ދޮގުކުރައްވައިފިއެވެ.
ސޯޝަލް މީޑިއާގައި ޕީއެންސީގެ 11 މެންބަރަކު ވިޕްލައިނާ ހިލާފުވެފައިވާކަމަށް ބުނެ ފެތުރެމުންދާ ވާހަކައަކީ ދޮގު ވާހަކައެއްކަމަށް ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފަލާހު ވިދާޅުވެއްޖެއެވެ.
ފަލާހު ދެއްވި މަޢުލޫމާތުގައި 11 މެންބަރުންގެ ތެރެއިން 9 މެމްބަރުން މިވަގުތު ތިއްބެވީ ޕާޓީގެ މަސައްކަތްތަކުގައި ދަތުރުމަތީގައި ކަމަށް ވިދާޅުވިއެވެ. ހަމައެހެންމެ، މިއަދުގެ ޖަލްސާއަށް ހާޒިރުވެވަޑައިގެންނެވި 2 މެމްބަރަކު ވޯޓުގައި ބައިވެރިވެވަޑައިނުގަތް ސަބަބު ބެއްލެވުމުގެ މަސައްކަތް ޕީޖީ ލީޑަރޝިޕުން ކުރައްވަމުންދާ ކަމަށްވެސް އެމަނިކުފާނު ވިދާޅުވިއެވެ.
މީގެއިތުރުން، ސުޕްރީމް ކޯޓުގެ ފަނޑިޔާރުންތަކެއް މަގާމުން ވަކި ކުރަން ހުށަހަޅާފައި އޮތް ބިލަށް، ވެރިކަން ކުރާ ޕީއެންސީއިން ނެރުނު ވިޕާ ޚިލާފަށް އެ ޕާޓީގެ ބައެއް މެންބަރުން ވޯޓު ނުދެއްވާ ކަމަށް ބައެއް މީޑިޔާތަކުން ވަނީ ރިޕޯޓްކޮށްފައެވެ.