ޚަބަރު
ޒަކިއްޔާގެ މަރުގެ މައްސަލައިގައި ހޯމް މިނިސްޓަރާއި ސީޕީ، ހޮޅުދޫ ރައްޔިތުންނާ ބައްދަލުކުރައްވައިފި

މިނިސްޓަރާއި ސީޕީ ހޮޅުދޫ ރައްޔިތުންނާ ބައްދަލުކުރެއްވުން--
މިދިޔަ އަހަރުގެ ސެޕްޓެންބަރު މަހު ނ. ހޮޅުދޫއިން ޒަހަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލައިގައި އެ ރަށު ރައްޔިތުންގެ ގިނަ ކަންބޮޑުވުންތަކެއް ހުރުމުން، ހޯމް މިނިސްޓަރ ޢަލީ އިޙްސާނާއި، ކޮމިޝަނަރ އޮފް ޕޮލިސް، ޢަލީ ޝުޖާއު ހޮޅުދޫއަށް ވަޑައިގެން އެ ރަށު ރައްޔިތުންނާ ބައްދަލުކުރައްވައިފިއެވެ.
މި ބައްދަލުކުރެއްވުމުގައި އެ ރަށުގެ ގިނަ ރައްޔިތުންތަކެއް ބައިވެރިވެވަޑައިގެންނެވިއިރު، އޭގެ ތެރެއިން ގިނަ ބަޔަކު ވަނީ މި މައްސަލައިގައި އެ ރަށު ރައްޔިތުންގެ ފަރާތުން ކަންބޮޑުވުންތައް ފާޅުކުރައްވާފައެވެ.
އެގޮތުން، އެ ރަށު ރައްޔިތުންގެ އެންމެ ބޮޑު ޝަކުވާއަކަށްވީ ޒަކިއްޔާގެ އޮޓޮޕްސީ ނުހެދުމަށް ނިންމުމެވެ. މީގެ އިތުރުން، ޒަކިއްޔާ އަމިއްލައަށް މަރުނުވާކަމަށާއި، އޭނާ ވަނީ މަރާލާފައިކަމަށް އެ ރަށު ރައްޔިތުން ދިޔައީ ބުނަމުންނެވެ. މިކަމަށް ބާރުއަޅައި، ގިނަ ވާހަކަތަކެއްވެސް އެ ބައްދަލުކުރެއްވުމުގައި ރައްޔިތުން ވަނީ ޙިއްސާކުރައްވާފައިވެއެވެ. ރައްޔިތުންގެ އުދާސްތައް ހުށަހެޅި ބޭފުޅުންގެ ތެރޭގައި އެ ރަށުގެ އިމާމަކާއި، ހާދިސާ ހިނގި ދުވަހު ޒަކިއްޔާ ދިރިއުޅެމުން ދިޔަ ގެޔަށް ކުނިނަގަން ދިޔަ މީހަކާއި، ޒަކިއްޔާގެ އާއިލާގެ މީހަކު ވެސް ހިމެނެއެވެ.
އަދި މިއްސަލައިގެ ތަޙުޤީޤުގައި މިހާރު 6 މަހަށް ވުރެން ގިނަ ދުވަސް ހޭދަވެފައިވާއިރު، މި ކަމުގައި ފުލުހުންގެ އިޙުމާލު އޮތްކަމަށް ވެސް އެ ރަށުން އަންނަނީ ތުހުމަތުކުރަމުންނެވެ.
ހޮޅުދޫގެ ރައްޔިތުންނާ މުޙާތަބު ކުރައްވަމުން ޕޮލިސް ކޮމިޝަނަރ ވިދާޅުވީ، ފުލުހުންގެ އިޙުމާލެއް އޮތްނަމަ އެކަން ބައްލަވާނެކަމަށެވެ. މީގެ އިތުރުން މާދަމާ އެރަށު ބައެއް ރައްޔިތުންނާ ބައްދަލުކޮށް، މައްސަލައާ ގުޅޭ އިތުރު މަޢުލޫމާތު އެއްކުރައްވާނެކަމަށް ވެސް ސީޕީ ވިދާޅުވިއެވެ.
މި މައްސަލައާ ގުޅިގެން ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން އާއި ނޭޝަނަލް އިންޓެގްރިޓީ ކޮމިޝަނުން ވެސް ވަނީ ތަޙުޤީޤެއް ފަށާފައެވެ.