ސައުތު އޭޝިއަން ގޭމްސް މިއަންނަ އަހަރަށް ފަސްކޮށްފި

ސައުތު އޭޝިއަން ގޭމްސް މިއަންނަ އަހަރުގެ ޖެނުއަރީގައި ބޭއްވުމަށް ސައުތު އޭޝިއާ އޮލިމްޕިކް ކައުންސިލް (އެސްއޭއޯސީ)އިން ނިންމައިފިއެވެ.

ޕާކިސްތާނުގައި އިއްޔެ ބޭއްވި އެސްއޭއޯސީގެ ބައްދަލުވުމުގައި މުބާރާތް ފަސްކުރުމަށްފަހު އަލަުން ބާއްވަން ނިންމާފައިވަނީ އަންނަ އަހަރުގެ ޖެނުއަރީ 23 އިން 31 އަށް ޕާކިސްތާންގެ ލާހޯރު، ފައިސަލްއާބާދު އަދި އިސްލާމްއާބާދުގައެވެ.

މި މުބާރާތް ބޭއްވުމަށް އެންމެ ފުރަތަމަ މަސައްކަތްކޮށްފައިވަނީ 2023ގައެވެ. ނަމަވެސް އެކި ސަބަބުތަކާ ހުރެ ހަތަރު ފަހަރެއްގެ މަތިން މި މުބާރާތް މިވަނީ ފަސްކޮށްފައެވެ. 

މުބާރާތް ބާއްވާ ޤައުމަކަށް ޕާކިސްތާން ކަނޑައަޅާފައިވާއިރު، އެ ޤައުމަށް މި މުބާރާތް އަނެއްކާ ވެސް މި ދިޔައީ 20 އަހަރު ފަހުންނެވެ. އެ ޤައުމުގައި ސައުތު އޭޝިއަން ގޭމްސް އެންމެ ފުރަތަމަ ބޭއްވީ 1989 ވަނަ އަހަރެވެ. އަދި އޭގެ ފަހުން 2004ގައި ވެސް އެ ޤައުމުގައި ވަނީ މި މުބާރާތް ބާއްވާފައެވެ.

ސައުތު އޭޝިއަން ގޭމްސް އެންމެ ފަހުން ބޭއްވީ 2019 ވަނަ އަހަރު ޑިސެމްބަރު މަހު ނޭޕާލުގެ ކަތުމަންޑޫ އާއި ޕޮކާރާގައެވެ.

އެ ފަހަރު ރާއްޖޭގެ ދުވުންތެރިޔާ ސާއިދު ވަނީ ރަން މެޑަލް ހޯދާފައެވެ.

މިއަންނަ އަހަރުގެ މުބާރަތަށް ޖުމްލަ 27 ކުޅިވަރު ހަރަކާތެއް ވަނީ އެސްއޭއޯސީން މި ވަގުތަށް ފާސްކޮށްފައެވެ. މި ކުޅިވަރުތަކާ ބެހޭ ހުރިހާކަމެއް އެޕްރޫވްކުުރުމަށް މި އަހަރުގެ މާޗް މަހުގެ ނިޔަލަށް ވަނީ މުއްދަތެއް ކަނޑައަޅައިފައެވެ.

މޯލްޑިވްސް އޮލިމްޕިކް ކޮމިޓީން ބުނީ، ސައުތު އޭޝިއަން ގޭމްސްއަކީ ރާއްޖޭގެ ކުޅިވަރު ކުރިއެރުވުމުގަައި މުހިންމު މުބާރާތަކަަށް ވީހިނދު، މި ގޭމްސްގައި ބައިވެރިވާނެ ކުޅިވަރުތައް ފައިނަލް ކުރުމުގައި ހުރިހާ މެމްބަރު އެސޯސިއޭޝަންތަކާ މަޝްވަރާ ކުރައްވާނެކަމަށެވެ.