ޕޮލިސް ބޯޑަށް ކުރިމަތިލި 4 ފަރާތެއްގެ ނަން ދިރާސާ ކުރަން ކޮމިޓީއަށް

ދިވެހި ފުލުހުންގެ ޚިދުމަތުގެ ޤާނޫނުގައި ބަޔާންކޮށްފައިވާ ގޮތުގެމަތިން އެކުލަވާލެވޭ ޕޮލިސް ބޯޑަށް ކުރިމަތިލި ހަތަރު ފަރާތެއްގެ ނަން ދިރާސާ ކުރަން ސަލާމަތީ ޚިދުމަތްތަކާ ބެހޭ ކޮމިޓީއަށް މިއަދު ފޮނުވައިފިއެވެ. 

ދިވެހި ފުލުހުންގެ ޚިދުމަތުގެ ޤާނޫނު ގެ 75 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެމަތިން އެކުލަވާލެވޭ ޕޮލިސް ބޯޑަށް، އެ މާއްދާގެ (ހ) ގެ (3) ވަނަ ނަންބަރުގައި ބަޔާންކޮށްފައިވާ ފަދައިން ޢާންމު ރައްޔިތުންގެ ތެރެއިން ރައްޔިތުންގެ މަޖިލީހުން ކަނޑައަޅާ 2 މެންބަރުން އައްޔަނުކުރަން ޖެހެއެވެ. 

ދިވެހި ފުލިހުންގެ ޚިދުމަތުގެ ޤާނޫނުގައި ބަޔާންކޮށްފައިވާ ގޮތުން ނަމަ، ޕޮލިސް ބޯޑަށް އައްޔަންކުރެވޭ ފަރާތަކީ ދިވެހި ފުލުހުންގެ ޚިދުމަތުގައި ވަޒީފާ އަދާކުރާ މީހެއްކަމުގައި ވެގެންނުވާނެއެވެ. މިގޮތުން، ފެބްރުއަރީ 10 ވަނަ ދުވަހު ޕޮލިސް ބޯޑަށް ކުރިމަތިލުމަށް އިއުލާން ކޮށްފައިވާއިރު، މިއަދުގެ މަޖިލީހުގައި ވަނީ، ކުރިމަތިލި 4 ފަރާތުގެ ވަނަވަރު ހާމަކޮށްފައެވެ.  އެއީ؛ 

1. ދަފްތަރު ނަންބަރު ރސ 6613 މުޙައްމަދު ޞާދިޤް
2. ގއ. ކޮނޑޭ، ފަހިލާ، މުއާވިޔަތު ގާސިލް
3. މއ. ބްލޫޕިން، އަހުމަދު މިޒްމާދު
4. ގދ. މަޑަވެލި ދޭލިޔާގެ މިސްބާޙް ހަސަން

ދިވެހި ފުލުހުންގެ ޚިދުމަތުގެ ޤާނޫނުގައި ބަޔާންކޮށްފައިވާ ގޮތުގައި ޕޮލިސް ބޯޑަކީ، ކޮމިޝަނަރާއި ޑެޕިއުޓީ ކޮމިޝަނަރ ޢައްޔަންކުރުމުގައި، އެ މަޤާމަށް އެކަށޭނެ ފަރާތެއް ވަޒަންކުރުމަށް ކުރަންޖެހޭ އެންމެހައި ކަންތައްތައް ކުރުމަށާއި، އެ ޤާނޫނުގެ 76 ވަނަ މާއްދާގައި ބަޔާންކުރާ މަސްއޫލިއްޔަތުތައް އަދާކުރުމަށާއި، އެ ޤާނޫނުގެ ދަށުން ލަފާދޭންޖެހޭ ކަންކަމުގައި ވަޒީރަށާއި، ޤާނޫނުގައި ލަފާދިނުމަށް ކަނޑައަޅާފައިވާ ފަރާތްތަކަށް ލަފާދިނުމަށް އެކުލަވާލާ 7 މެމްބަރުންގެ ބޯޑެކެވެ.

މި ބޯޑުގައި ރައީސުލްޖުމްހޫރިއްޔާ ޢައްޔަންކުރައްވާ 2 މެންބަރުން؛ ފަންނީ ދާއިރާއަކުން ތަޢުލީމާއި ތަޖުރިބާ ލިބިފައިވާ 3 މެންބަރުން އަދި ޢާންމުކޮށް ހުޅުވާލައިގެން ޢާންމު ރައްޔިތުންގެ ތެރެއިން، ކުރިމަތިލާ 2 މެމްބަރުން ހިމެނިވަޑައިގަންނަވާނެއެވެ.