ޚަބަރު
އޮޕަރޭޝަން ކުރަނގީގެ ހަރަކާތެއް މިއަދު މާލެ ނޯތު ހާބަރުގައި

އޮޕަރޭޝަން ކުރަނގީގެ ތެރެއިން/ ފޮޓޯ: ދަ މޯލްޑިވްސް ޖަރނަލް
މާލެ ނޯތު ހާބަރު ސަރަހައްދުގައި އޮޕަރޭޝަން ކުރަނގީގެ ޚާއްސަ ހަރަކާތެއް މިއަދު ކުރިއަށްގެންދަން ނިންމައިފިއެވެ.
މި އިވެންޓް އޮންނާނީ، ނޯތު ހަބާރުގައި ހުންނަ "ދަ ޝޮޓް ހާބަރ ރެސްޓޯރަންޓް" ސަރަޙައްދުގައެވެ. އެހެންކަމުން މި ސަރަޙައްދުގައި މަސައްކަތްކުރާ ބިދޭސީ މަސައްކަތްތެރިން، މިއިވެންޓުގައި ބައިވެރިކުރުމަށް ވަޒީފާދޭ ފަރާތްތަކަށް ދާޚިލީ ވުޒާރާއިން ވަނީ އެދިފައެވެ.
މާލެ ސަރަޙައްދު ފިޔަވައި މީހުން ދިރިއުޅޭ ރަށްރަށުގައި ވަޒީފާ އަދާކުރާ ބިދޭސީ މަސައްކަތްތެރިންގެ ބައޯމެޓްރިކްސް އަޕްޑޭޓް ކުރުމުގެ މަސައްކަތް އަންނަ މަހުގެ އެއްވަނަ ދުވަހުގެ ކުރިން ނިންމުމަށް ދާޚިލީ ވުޒާރާއިން ވަނީ ދާދި ފަހުން އެދިފައެވެ.
މާލެ ނޯތު ހާބަރު ސަރަހައްދުގައި އޮޕަރޭޝަން ކުރަނގީގެ ޚާއްސަ ހަރަކާތެއް މިއަދު ކުރިއަށްގެންދަން ނިންމާފަވާއިރު، ރިޒޯޓްތަކާއި، ސަފާރީތަކާއި، ދަނޑުވެރިކަން ކުރުމަށް ޚާއްސަކޮށް ދޫކޮށްފައިވާ ރަށްރަށުގަ އާއި، އެހެނިހެން ސިނާއީ މަސައްކަތްކުރާ ރަށްތަކުގައި ވަޒީފާ އަދާކުރާ ބިދޭސީންގެ ބައޯމެޓްރިކްސް އަޕްޑޭޓްކުރުމުގެ މަސައްކަތް 2025 އޭޕްރީލް 15ވަނަ ދުވަހުގެ ކުރިން އެން.ސީ.އައި.ޓީގައި ގާއިމްކޮށްފައިވާ ޖޮއިންޓް އޮޕަރޭޝަން ސެންޓަރ ނުވަތަ އެ ބިދޭސީ މުވައްޒަފަކު ވަޒީފާއަދާކުރާ ސައިޓަކާއި އެންމެ ކައިރީގައިވާ ކައުންސިލް އިދާރާއަކާއި ގުޅިގެން ކުރިއަށް ގެންދިއުމަށް ވެސް އެ ވުޒާރާއިން އެދިފައިވެއެވެ.
މި މުއްދަތުގެ ތެރޭގައި ބައޯމެޓްރިކްސް އަޕްޑޭޓް ނުކުރާ ފަރާތްތައް އެކްސްޕެޓް ސިސްޓަމްއިން ސަސްޕެންޑްކޮށް ޚިދުމަތް މެދުކަނޑާލެވޭނެ ކަމުގައި ވުޒާރާގެ އިއުލާނުގައިވެއެވެ.