ބްރިޖްގައި އެކްސިޑެންޓެއް ހިނގައި އަންހެނަކަށް އަނިޔާވެއްޖެ!

ސިނަމާލެ ބްރިޖް އެއަރޕޯޓް ޓްރެފިކް ލައިޓް ކައިރީގައި އެކްސިޑެންޓެއް ހިނގައި ދިވެހި އަންހެނަކަށް އަނިޔާވެއްޖެއެވެ.

މިކަމާ ގުޅިގެން ދިވެހި ފުލުހުންގެ ޚިދުމަތުން ބުނެފައިވަނީ ބްރިޖް އެއަރޕޯޓް ޓްރެފިކް ލައިޓް ކައިރީގައި އެކްސިޑެންޓެއް ހިނގައިގެން އުޅޭ ކަމުގެ ރިޕޯޓް މިއަދު މެންދުރު 12:57 ހާއިރު ލިބިފައިވާ ކަމަށެވެ.

މިއެކްސިޑެންޓުގައި ދެސައިކަލެއް ޖެހި އެކްސިޑެންޓެއް ހިނގައިފައިވާކަމަށް ފުލުހުން ވަނީ ބުނެފައެވެ. އަދި މިއެކްސިޑެންޓްގައި އެތަނުން އެއްސައިކަލު ދުއްވަން އިން މީހާ އަށް އަނިޔާވެގެން ހުޅުމާޅެ ހޮސްޕިޓަލަށް ގެންގޮސްފައިވާ ކަމަށާއި އަދި އެއީ ދިވެހި އަންހެނެއް ކަމަށްވެސް ވަނީ ބުނެފައެވެ.

އެކްސިޑެންޓުގައި ޝާމިލްވާ މީހުންނަކީ ސައިކަލު ދުއްވުމުގެ ލައިސެންސް އޮންނަ ބައެއް ކަމަށްވެސް ފުލުހުން ވަނީ ހާމަކޮށްފައެވެ. އަދި މިއެކްސިޑެންޓާ ގުޅިގެން ބަލަން ޖެހޭ ކަންކަން ފުލުހުން ދަނީ ބަލަމުންކަމަށްވެސް ފުލުހުން ބުނެއެވެ.