އައްޑޫ ހަންކެޑެ ބްރިޖްގައި ނުރައްކާތެރި އެކްސިޑެންޓެއް ހިނގައި މީހަކު މަރުވެއްޖެ

އައްޑޫސިޓީ ހަންކެޑެ ބްރިޖްގައި ހިނގި ނުރައްކާތެރި އެކްސިޑެންޓެއްގައި މީހަކު ނިޔާވެއްޖެއެވެ. ފުލުހުން ވިދާޅުވީ މި އެކްސިޑެންޓުގެ މައްސަލަ ފުލުހުންނަށް ރިޕޯޓުކޮށްފައި ވަނީ މިއަދު ހެނދުނު 9:49 ހައިއިރު ކަމަށެވެ. 

މި އެކްސިޑެންޓުގައި ނިޔާވެފައި ވަނީ، މާލެ، ގ.ނައިޓްޑްރީމް، ލީވާން އަބްދުއްސައްތާރް (24 އަހަރު) އެވެ. ފުލުހުން މަޢުލޫމާތު ދެއްވާފައިވާ ގޮތުގައި، ނިޔާވި މީހާ އައްޑޫގެ އިކުއިޓޯރިއަލް ހޮސްޕިޓަލަށް ގެންދިޔައިރު ވެސް ވަނީ ވަރަށް ބޮޑަށް ހާލު ސީރިއަސްވެފައެވެ. އޭނާ މަރުވެފައި ވަނީ ހޮސްޕިޓަލުގައި ފަރުވާ ދެމުން ދަނިކޮށްކަމަށް ވެސް ފުލުހުން ވިދާލުވިއެވެ. 

އައްޑޫ ސިޓީ ހަންކެޑެ ބްރިޖްގެ މަސައްކަތް ނިމި، އެ ބްރިޖު ބޭނުންކުރަންފަށާފައި ވަނީ ދާދި ފަހުންނެވެ. މިއެކްސިޑެންޓް ހިނގާފައި ވަނީ ބާރު ސްޕީޑުގައި މަރަދޫއިން ހިތަދޫއަށް ދުއްވާފައި ދިޔަ ސައިކަލެއް ކޮންޓްރޯލް ނުވެ ގޮސް ބްރިޖުގެ ފެންސުގައި ޖެހިންގެން ކަމަށް ފުލުހުން ވިދާޅުވެއެވެ.

މިމައްސަލަ ފުލުހުން ގެންދަނީ ތަހުގީގުކުރަމުންނެވެ.