ސައިންސް / ދުނިޔެ
ބައިނަލްއަޤްވާމީ ޖައްވީ ސްޓޭޝަނުގައި ފަޓްލޫނުލާ ގޮތުގެ ވީޑިއޯއެއް ނާސާއިން ދައްކައިފި
ޖައްވީ ސްޓޭޝަނުގައި ފަޓްލޫނު ލަނީ ފޮޓޯ: ނާސާ
ފެބްރުއަރީ 21 ވަނަ ދުވަހު ނާސާއިން ޝާއިޢުކުރި ވީޑިއޯއެއްގައި، ބައިނަލްއަޤްވާމީ ޖައްވީ ސްޓޭޝަނުގައި ފަޓްލޫންލާ ގޮތް ދައްކައިފިއެވެ. މި ވީޑިއޯގައި ނާސާގެ ކެމިކަލް އިންޖިނިއަރ ޑޮން ޕެޓިޓް ވަނީ ބައިނަލްއަޤްވާމީ ޖައްވީ ސްޓޭޝަނުގައި ހުންނަވައިގެން ފަޓްލޫންލާ ގޮތް ދައްކުވައިދީފައެވެ.
އާންމުކޮށް ދުނިޔޭގައި ފަޓްލޫންލާ ގޮތާއި ޚިލާފަށް، ޕެޓިޓް ވަނީ ދެ ފައި އެއްފަހަރާ ފަޓްލޫންނަށް ވައްދަވާފައެވެ. އޭނާ އިޖްތިމާއީ މީޑިއާއަށް ދޫކޮށްލި ވީޑިއޯއާއެކު ލިޔުއްވާފައިވަނީ "ދެ ފައި އެއްފަހަރާ" މިހެންނެވެ.
މި ވީޑިއޯއަށް ގިނަ ބަޔަކު ވަނީ ތާއީދުކޮށްފައެވެ. އަދި ވީޑިއޯގެ ދަށުގައި ގިނަ ކޮމެންޓްތަކެއް ކޮށްފައިވެއެވެ. އެގޮތުން އެއް ބޭފުޅަކު ވިދާޅުވެފައިވަނީ "އަހަރެން ހިތަށްއެރީ ކުއްލިއަކަށް ފަޓްލޫންތެރެއަށް ފުންމާލަނީ ކަމަށް. ހަހަ. އެކަން ކޮށްލަން ރަނގަޅުވާނެ" މިހެންނެވެ.
OK; you all asked if this was possible….. pic.twitter.com/sMmJJtQNMy
— Don Pettit (@astro_Pettit) February 23, 2025
އަނެއް ބޭފުޅަކު މަޖާރާގަކަށް ވިދާޅުވެފައިވަނީ "މިއީ އަހަރެންނަށް ބޭނުންވެފައި އޮތް ކޮންޓެންޓް! އަހަރެން ދުނިޔޭގައި މިކަން ކުރަން މަސައްކަތްކޮށްލިން. އެކަމަކު... ރަނގަޅަކަށް ނުވި" މިހެންނެވެ.
ޑޮން ޕެޓިޓްއަކީ އެމެރިކާގެ ވަރަށް މަޝްހޫރު އެސްޓްރޯނޯޓެކެވެ. އޭނާ ވަނީ ގިނަ ދުވަސްތަކެއް ވަންދެން ބައިނަލްއަޤްވާމީ ޖައްވީ ސްޓޭޝަނުގައި ހޭދަކުރައްވާފައެވެ. އޭނާ ވަނީ ޖުމްލަ 370 ދުވަސް ޖައްވުގައި ހޭދަކުރައްވާފައެވެ.
