ޚަބަރު
ރޯދަމަހު ބަސް ދަތުރުތައް ފަށާނީ ހެނދުނު 7:00 ގައި

އާރުޓީއެލް ބަސް--
ހުލާސާ
ބަސް ދަތުރުތައް ރޭގަނޑު 12 ޖަހަންދެން ކުރިޔަށް ދާނެ.
ފެރީ ދަތުރުތައް ހުކުރު ދުވަހު ނުކުރާނެ.
ރޯދަމަހު ގްރޭޓާ މާލޭ ސަރަޙައްދުގައި ބަސް ދަތުރުތައް ފަށާ ގަޑިތަކަށް ބަދަލު ގެނަސްފައިވާކަމަށް، ބަސް އޮޕަރޭޓްކުރާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
އެގޮތުން ރަމަޟާން މަހުގެ ފުރަތަމަ ދުވަހުން ފެށިގެން މާލެއިން ހުޅުމާލެ 1 އަދި 2 އަށް ދަތުރުތައް ފަށާނީ ހެނދުނު 7:00ގައިކަމަށް އެމްޓީސީސީން ވަނީ ހާމަކޮށްފައެވެ.
އަދި ރޯދަވީއްލާ ގަޑިއަށް ބަސް ދަތުރުތައް މެދުކަނޑާލާނެ ކަމަށާއި، ރޯދަވީއްލުމަށްފަހު ދެން ދަތުރުތައް ފަށާނީ ރޭގަނޑު 7:20ގައިކަމަށް ވެސް އެ ކުންފުނިން ވަނީ ހާމަކޮށްފައެވެ. ދުވަހުގެ ދަތުރުތައް ނިންމާލުމަށް ހަމަޖެހިފައިވަނީ ރޭގަނޑު 12:00ގައެވެ.
މީގެ އިތުރުން، މާލެތެރޭގައި ބަސް ދަތުރުތައް ވެސް ހެނދުނު 7:00ގައި ފެށުމަށް ހަމަޖެހިފައިވާއިރު، މި ބަސް ދަތުރުތައް ރޯދަ ވީއްލާ ގަޑިއަށް މެދުކަނޑާލުމަށްފަހު ދެން ފަށާނީ ރޭގަނޑު 9:00ގައެވެ. އަދި މި ދަތުރުތައް ވެސް ކުރިޔަށް ގެންދާނީ ރޭގަނޑު 12:00 އާ ހަމައަށްކަމަށް އެމްޓީސީސީން ވަނީ ހާމަކޮށްފައެވެ.
އަދި އާރިޓީއެލް ފެރީ ދަތުރުކުރާ ގަޑިތަކަށް ވެސް އެމްޓީސީސީން ވަނީ ބަދަލުގެނަސްފައެވެ. އެގޮތުން ރޯދަމަހުގެ ހުކުރު ދުވަހު އެއްވެސް ދަތުރެއް ނުކުރުމަށް ނިންމާފައިވާއިރު، ހުރިހާ ރޫޓެއްގެ ދަތުރުތަކެއް ވެސް އިރުއޮއްސުމުގެ ކުރިޔަށް ނިންމޭގޮތަށް ބަދަލު ގެނަސްފައިވާނެކަމަށް އެމްޓީސީސީން ވަނީ ހާމަކޮށްފައެވެ.
ފެރީގެ ދަތުރުތަކަށް ގެނެވުނު ބަދަލުތައް ފަސޭހަކަމާއެކު ބައްލަވާލެއްވުމަށް، އެމްޓީސީސީ ވެބްސައިޓަށް (http://mtcc.mv/schedules-2) ޒިޔާރަތްކުރެއްވުމަށް އެ ކުންފުނިން އިރުޝާދުދެއެވެ.