ޚަބަރު
އދ. ގައި ކުދި ޤައުމުތަކުގެ ބައިވެރިވުން އިތުރުކުރުމަށް ރާއްޖެއިން ގިނަ މަސައްކަތްތަކެއް ކޮށްފައިވޭ: ވަޒީރު މޫސާ ޒަމީރު
އދ.ގެ ސެކްރެޓަރީ ޖެނެރެލް އާއި އެކު ވަޒީރު މޫސާ ޒަމީރު.
އދ.ގައި ކުދި ޤައުމުތަކުގެ ބައިވެރިވުން އިތުރުކުރުމަށް ރާއްޖެއިން ގިނަ މަސައްކަތްތަކެއް ކޮށްފައިވާ ކަމަށް ރާއްޖޭގެ ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.
ވަޒީރު މޫސާ ޒަމީރު މިހެން ވިދާޅުވީ އދ.ގެ މެމްބަރަކަށް ރާއްޖެ ވިތާ 59 އަހަރުގެ މުނާސަބަތުގައި ނެރުއްވި ބަޔާނުގައެވެ.
ވަޒީރު މޫސާ ޒަމީރު ވިދާޅުވެފައިވަނީ ދުނިޔެ ބަވަނަވަމުން އަންނައިރު، ކުދި ޤައުމުތަކަށް މާލީ އަދި އިޤްތިޞާދީ ގޮތުން ދަތިތަކާ ކުރިމަތިވަމުންދާކަމަށެވެ. އަދި މޫސުމީ ބަދަލުތަކުގެ ސަބަބުން ނާޒުކު ޤައުމުތަކަށް ބޮޑެތި ގެއްލުންތައް ކުރިމަތިވަމުންދާ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، ދުނިޔޭގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތަކުގެ ސަބަބުން ދޭދޭ ޤައުމުތަކުގެ ގުޅުންތަކަށް އަސަރުކުރަމުންދާކަންވެސް ވަޒީރު ފާހަގަކުރެއްވިއެވެ.
އދ. އިން ކަނޑައަޅާފައިވާ ސިޔާސަތުތަކަށް ރާއްޖެއިން އަބަދުވެސް ތާއީދުކުރާކަމަށް ޚާރިޖީ ވަަޒީރު ވިދާޅުވިއެވެ.
އދ. ގައި ކުދި ޤައުމުތަކުގެ ބައިވެރިވުން އިތުރުކުރުމަށް ރާއްޖެއިން ގިނަ މަސައްކަތްތަކެއް ކޮށްފައިވާކަމަށާއި، އދ. ގެ މަތީ މަޖިލިސްތަކުގައި ރާއްޖެއިން އަޑު އުފުލާފައިވާކަންވެސް ވަޒީރު މޫސާ ޒަމީރު ފާހަގަކުރެއްވިއެވެ.
ޒަމީރު އިތުރަށް ވިދާޅުވެފައިވަނީ، ދުނިޔޭގެ ކޮންމެ ޤައުމެއްގައި އަމާންކަން ޤާއިމްކުރުމަށާއި ދެމެހެއްޓެނިވި ތަރައްޤީއަށް އަޑުއުފުލުމުގައި ރާއްޖެއިން ދެމިތިބޭނެ ކަމަށެވެ.
