ބަންޑުން ޖަހާލި "ނަފާ" ދޯނި އަދިވެސް ނުފެނޭ: އެމްއެންޑީއެފް

ރޭ ބަންޑުން ޖަހާލި "ނަފާ" ދޯނި އަދިވެސް ފެނިފައިނުވާކަމަށް އެމްއެންޑީއެފުން ވިދާޅުވެއްޖެއެވެ.

ބަންޑުންޖަހާލާފައިވާ ދޯންޏެއް އޮޔާދާތީ، ކަނޑުދަތުރުކުރާ ފަރާތްތަކުން މިކަމާ ސަމާލުވުމަށް ރޭގެ ވަގުތެއްގައި އެމްއެންޑީއެފުން ވަނީ އިލްތިމާޒްކުރަށްވާފައެވެ. 

މިގޮތުން މާލެއިން ފުރައިގެން ކ. މާފުށްޓަށް ދަތުރުކުރަމުން ދަނިކޮށް އެ ދޯނި ބަންޑުންޖަހާލާފައި ވަނީ ވަށްމާފުށީގެ އުތުރުން 0.33 ނޯޓިކަލް މޭލު ބޭރުންނެވެ. އެހެންކަމުން، އެ ސަރަހައްދުން ދަތުރުކުރާ ފަރާތްތަކުން މިކަމަށް ސަމާލުކަން ދިނުމަށާއި، ރޭގަނޑު މި ސަރަހައްދުން ދަތުރުކުރާ ފަރާތްތަކުން ދަތުރުކުރެއްވުމުގައި ޚާއްޞަ ސަމާލުކަމެއް ދިނުމަށް ވެސް އެމްއެންޑީއެފުން އިލްތިމާޒްކޮށްފައިވެއެވެ. 

އެ ދޯނި ހޯދުމުގެ މަސައްކަތް އެމްއެންޑީއެފް މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަން އިން ކުރަމުންދާ ކަމަށާއި، މިހާތަނަށް ކުރެވުނު މަސައްކަތުން އެ ދޯނި ފެނިފައި ނުވާ ކަމަށް އެމްއެންޑީއެފުން މިއަދު މަޢުލޫމާތުދެއްވިއެވެ. 

ދޯނި ފެނިފައި ނުވިނަމަވެސް، ދޯނީގެ ސާމާނުކަށް ލަފާކުރެވޭ ބައެއްތަކެތި ކަނޑުމަތިން ފެންނަމުންދާކަމަށް އެމްއެންޑީއެފުން މަޢުލޫމާތުދެއްވިއެވެ.