މޮރޮކޯގައި މިއަހަރު އުލްހިޔާ ކަތިނުލުމަށް ރަސްގެފާނު އިލްތިމާސް ކުރައްވައިފި

މޮރޮކޯގެ ރަސްގެފާނު ކިންގް މުޙައްމަދު 6 ވަނަ ވަނީ މި އަހަރުގެ ޢީދުލް އަޟްޙާގައި ޤުރުބާނީ ކުރުމުގެ ގޮތުން ބަކަރި ކަތިލުމުގެ އާދަކާދައިން އެއްކިބާވުމަށް ރައްޔިތުންނަށް އިލްތިމާސް ކުރައްވާފައެވެ. މިފަދައިން އިލްތިމާސް ކުރެއްވުމުގެ މައިގަނޑު ސަބަބަކީ ވޭތުވެދިޔަ އަހަރުތަކުގައި ކުރިމަތިވި ހަނަފަސްކަމުގެ ސަބަބުން ޤައުމުގެ ޖަނަވާރުގެ އަދަދު މަދުވެފައިވުމެވެ.

ޖޫން މަހުގައި ފާހަގަކުރާ ޢީދުލް އަޟްޙާއަކީ އިބްރާހީމްގެފާނު (ޢަލައިހިއްސަލާމް) ގެ ޤުރުބާނީގެ ހަނދާން އާކުރުމުގެ ގޮތުން ފާހަގަކުރާ ދުވަހެކެވެ. މި ދުވަހު މުސްލިމުން ބަކަރި ނުވަތަ ކަންބަޅި ކަތިލައި، އޭގެ މަސް ޢާއިލާއާއި ފަޤީރުންނާ ހިއްސާކުރެއެވެ.

ރަސްމީ ތަފާސްހިސާބުތަކުން ދައްކާގޮތުގައި ވޭތުވެދިޔަ 9 އަހަރާ އަޅާބަލާއިރު 2025 ވަނަ އަހަރު މޮރޮކޯގެ ގެރި އަދި ބަކަރީގެ އަދަދު ވަނީ 38 އިންސައްތަ ދަށަށް ގޮސްފައެވެ. މިއީ ވިދިވިދިގެން ދިމާވި ހަނަފަސްކަމުގެ ސަބަބުން ކުރިމަތިވި ނަތީޖާއެކެވެ.

ސަރުކާރުގެ ޓީވީ ޗެނަލް އަލް އޫލާގައި ދީނީ ކަންތައްތަކާ ބެހޭ ވަޒީރު އަޙްމަދު ތައުފީޤް ކިޔައިދެއްވި ރަސްގެފާނުގެ ސިޓީގައި ވިދާޅުވެފައިވަނީ، "މި ދީނީ އަޅުކަން އެންމެ ރަނގަޅު ގޮތުގައި އަދާކުރުމަށް ފުރުސަތު ދިނުމާއެކު، އަޅުގަނޑުމެންގެ ޤައުމު ކުރިމަތިލަމުންދާ މޫސުމީ އަދި އިޤްތިޞާދީ ގޮންޖެހުންތަކަށް ރިޢާޔަތްކުރުމަކީ އަޅުގަނޑުމެންގެ ޒިންމާއެކެވެ. މި ގޮންޖެހުންތަކުގެ ސަބަބުން ޖަނަވާރުގެ އަދަދު ވަނީ ބޮޑުތަން ދަށަށް ގޮސްފައެވެ."

ރަސްގެފާނު އިތުރަށް ވިދާޅުވެފައިވަނީ މި އުނދަގޫ ޙާލަތުގައި މި އަޅުކަން އަދާކުރުމުން ރައްޔިތުންގެ ތެރެއިން ގިނަ ބަޔަކަށް، ޚާއްޞަކޮށް މަދުން އާމްދަނީ ލިބޭ ފަރާތްތަކަށް ބޮޑެތި ގެއްލުންތަކެއް ލިބިދާނެ ކަމަށެވެ.

މިދިޔަ 30 އަހަރުގެ އެވަރެޖާ އަޅާބަލާއިރު މިއަހަރު ވާރޭވެހުން ވަނީ 53 އިންސައްތަ ދަށަށް ގޮސްފައެވެ. މީގެ ސަބަބުން ޖަނަވާރަށް ކާންދޭނެ ވިނަ މަދުވެ، މަސް އުފެއްދުން ދަށަށް ގޮސް، ބާޒާރުގައި އަގުތައް މައްޗަށް ގޮސްފައިވެއެވެ. އަދި ދިރޭ ގެރި، ބަކަރި އަދި ރަތް މަހުގެ އިމްޕޯޓް އިތުރުވެފައިވެއެވެ.

މި ޙާލަތާ ގުޅިގެން މޮރޮކޯ ސަރުކާރުން ވަނީ އޮސްޓްރޭލިއާއިން 100,000 ބަކަރި އިމްޕޯޓްކުރުމުގެ އެއްބަސްވުމެއްގައި ސޮއިކޮށްފައެވެ.