ދުނިޔެ
އެމެރިކާއިން މަހުޖަނުންނަށް "ގޯލްޑް ކާޑު" ނެރުމަށް ނިންމައިފި - 5 މިލިއަން ޑޮލަރަށް ދާއިމީ ރެސިޑެންސީ
އެމެރިކާއިން މަހުޖަނުންނަށް "ގޯލްޑް ކާޑު" ނެރުމަށް ނިންމުން
އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން "ގޯލްޑް ކާޑް" ގެ ނަމުގައި އާ ވީސާއެއް ތަޢާރަފުކުރުމަށް ނިންމައިފިއެވެ. މި ވީސާ ލިބޭނީ 5 މިލިއަން ޑޮލަރު ދައްކާ ފަރާތްތަކަށެވެ. މި ވީސާއަކީ އެމެރިކާގައި ދާއިމީ ރެސިޑެންސީ ލިބޭ އަދި ރައްޔިތުކަން ހޯދުމުގެ މަގު ފަހިވެގެންދާނެ ވީސާއެކެވެ.
ރައީސް ޓްރަމްޕްގެ މި ދައުރުގެ ފުރަތަމަ ކެބިނެޓް ބައްދަލުވުމުގައި ނޫސްވެރިންނާ ވާހަކަދައްކަވަމުން ވިދާޅުވީ މި ވީސާ މަސައްކަތްކުރާނީ ގްރީން ކާޑު ފަދައިން ކަމަށެވެ. ނަމަވެސް މި ވީސާ ދޫކުރެވޭނީ "މަތީ ފަންތީގެ މީހުންނަށް" ކަމަށް އޭނާ ވިދާޅުވިއެވެ.
5 މިލިއަން ޑޮލަރު ދެއްކޭ މީހުން ވަޒީފާތައް އުފައްދާނެ. މިއީ ވަރަށް ބޮޑަށް ވިއްކޭނެ އެއްޗެއް. މިއީ ވަރަށް ބޮޑު ބާގެއިނެއް
ރައީސް ޓްރަމްޕް
ކޮމާސް ސެކްރެޓަރީ ހަވާޑް ލުޓްނިކް ވިދާޅުވީ މި ވީސާއިން ބޭރުގެ އިންވެސްޓަރުންނަށް މިހާރު ދޫކުރާ ވީސާ ޕްރޮގްރާމް ބަދަލުކުރެވޭނެ ކަމަށެވެ. ނަމަވެސް އިތުރު ތަފްސީލެއް ހާމަކުރައްވާފައެއް ނުވެއެވެ.
ދުނިޔޭގެ އެތައް ޤައުމެއްގައި އިންވެސްޓްމަންޓް މެދުވެރިކޮށް ރައްޔިތުކަން ހޯދުމުގެ ޕްރޮގްރާމްތައް ހިންގައެވެ. މީގެ ތެރޭގައި ޔޫރަޕްގެ ބައެއް ޤައުމުތައްވެސް ހިމެނެއެވެ. މިސާލަކަށް ޕޯޗުގަލްގައި "ގޯލްޑަން ވީސާ" ގެ ނަމުގައި 524,000 ޑޮލަރު އިންވެސްޓްކުރާ ބިދޭސީންނަށް ދާއިމީ ރެސިޑެންސީ ދެއެވެ.
ރައީސް ޓްރަމްޕް ވިދާޅުވީ ކުންފުނިތަކުން މި ރަން ވީސާ ޕްރޮގްރާމް ބޭނުންކޮށްގެން ބިދޭސީން އެމެރިކާގައި މަސައްކަތްކުރުމަށް ގެންނާނެ ކަމަށެވެ. އަދި މި ވީސާއިން ލިބޭ އާމްދަނީ އެމެރިކާގެ ދަރަނި އަދާކުރުމަށް ބޭނުންކުރެވިދާނެ ކަމަށްވެސް އޭނާ ވިދާޅުވިއެވެ.
ލުޓްނިކް ވިދާޅުވީ މި އައު އިނިޝިއޭޓިވްއިން EB-5 ވީސާ ބަދަލުކުރެވޭނެ ކަމަށެވެ. EB-5 ވީސާއަކީ 1 މިލިއަން ޑޮލަރު އިންވެސްޓްކޮށް މަދުވެގެން 10 ފުލްޓައިމް ވަޒީފާ އުފައްދާ ބިދޭސީންނަށް ދާއިމީ ރެސިޑެންސީ ދޭ ވީސާއެކެވެ.
2024 ވަނަ އަހަރުގެ ފިސްކަލް އިޔަރގައި 12,000 އަށްވުރެ ގިނަ EB-5 ވީސާ ދޫކުރެވިފައިވާ ކަމަށް ސްޓޭޓް ޑިޕާޓްމަންޓުން ބުނެއެވެ. މިއީ މި ޕްރޮގްރާމްގެ ތާރީޚުގައި އެންމެ ގިނަ އަދަދެވެ.
