ދުނިޔެ
ސުދާންގެ އަސްކަރީ ފްލައިޓެއް ވެއްޓި، ގިނަ އަދަދެއްގެ މީހުން މަރުވެއްޖެ
ސުދާންގެ ވެއްޓުނު ފްލައިޓު/ ފޮޓޯ: އެލްއެން24
ސުދާންގެ އަސްކަރީ ފްލައިޓެއް ވެއްޓި ގިނަ އަދަދެއްގެ މީހުން މަރުވެއްޖެއެވެ.
ރިޕޯޓުތަކުން މަޢުލޫމާތު ލިބޭ ގޮތުގައި، މި ޙާދިސާ ހިނގާފައި ވަނީ ސޫދާނުގެ ވެރި ރަށް ޚާރްޠޫމް ސްޓޭޓްގެ ދެވަނައަށް އެންމެ ބޮޑު ސިޓީކަމުގައިވާ އޮމްދުރްމާނުގައި އަންގާރަ ދުވަހުގެ ވަގުތެއްގައެވެ.
ދިމާވި ޓެކްނިކަލް މައްސަލައަކާ ހުރެ ވެއްޓިފައިވާ މި ފްލައިޓު، ވެއްޓިފައި ވަނީ ސެއިޑްނާ އެއާ ބޭސް ކައިރިން އޮމްދުރްމާނުގައި ހުންނަ ސިފައިންގެ އެންމެ ބޮޑު އަސްކަރީ ހަބް ކައިރިއަށްކަމަށް ވީއިރު، މިހާތަނަށް ލިބިފައިވާ މަޢުލޫމާތުތަކުން 46 މީހުން ވަނީ ނިޔާވެފައެވެ. މި އަދަދު އިތުރުވާނެކަމަށް ބެލެވޭ ވާހަކަ ރިޕޯޓުތަކުގައި ބަޔާންކޮށްފައިވެއެވެ.
މި ހާދިސާ ދިމާވުމާއެކު، ފްލައިޓުގައި ތިބި ގިނަ ބަޔަކާއި، ފްލައިޓު ވެއްޓުނު އިރު ބިންމަތީގައި ޒަހަމްވި މީހުން ވަނީ އޮމްދުރުމާނުގެ އަލް ނައޯ ހޮސްޕިޓަލަށް ގެންގޮސްފައެވެ. މި ފަރާތްތަކަށް އެ ހޮސްޕިޓަލުގައި ފަރުވާ ދެވެމުން ދާކަމަށް ރިޕޯޓުތަކުގައިވެއެވެ.
މަޢުލޫމާތު ލިބޭގޮތުގައި ފްލައިޓު ވެއްޓުމާއެކު ބާރު ގޮވުމެއް ގޮވާފައިވެއެވެ. މި ގޮވުމުގެ ސަބަބުން ވަށައިގެން ހުރި ގެތަކަށް ވެސް ގިނަ ގެއްލުންތަކެއް ލިބިފައިވާކަމަށް ރިޕޯޓުތަކުގައި ހާމަކަށްފައިވެއެވެ.
