ގެމަނަފުށީގައި ޤާއިމްކޮށްފައިވާ އައު އައިސް ޕްލާންޓް ހުޅުވައިފި

އިންޑިއަން އެކްސިމް ބޭންކް ލައިން އޮފް ކްރެޑިޓް (އެލްއޯސީ) ފެސިލިޓީގެ ދަށުން ގއ. ގެމަނަފުށީގައި އަޅާފައިވާ އައިސް ޕްލާންޓް ހުޅުވައިފިއެވެ.

މަކަމަށްޓަކައި ބޭއްވި ޚާއްސަ ރަސްމިއްޔާތުގައި މި އައިސް ޕްލާންޓު ހުޅުވައިދެއްވާފައި ވަނީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމެވެ. 

މި ރަސްމިއްޔާތުގައި ވާހަކަފުޅު ދައްކަވަމުން މަސްވެރިކަމާ ބެހެ ވަޒީރު ވިދާޅުވެފައި ވަނީ، މަސްވެރި ދުވަސްވަރު ތަކުގައި އައިސް ލިބުމުގައި މަސްވެރިންނަށް ގިނަ ގޮންޖެހުންތަކެއް އަދިވެސް ހުރިކަމަށާއި، މި މައްސަލައަށް ހައްލެއް ހޯދުމަށް ސަރުކާރުން އިތުރު 13 އައިސް ޕްލާންޓެއް އަޅަމުން ގެންދާކަމަށެވެ. ސަރުކާރުގެ އަމާޒަކީ ވިހާވެސް އަވަހަށް، ވީހާވެސް ފަސޭހައިން މަސްވެރިންނަށް އައިސް ލިބޭނެ އިންތިޒާމު ހަމަޖައްސައިދިނުން ކަމަށް ވަޒީރު ވިދާޅުވެފައިވެއެވެ

ގެމަނަފުށީގައި ހުޅުވިގެން މި ދިޔަ އައިސް ޕްލާންޓުން ދުވާލެއްގެ މައްޗަށް 50 ޓަނުގެ ބްލޮކް އައިސް އުފެއްދޭނެކަމަށާއި، މި ޕްލާޏްތުގައި 100 ޓަނުގެ އައިސް ރައްކާކުރާނެ ޖާގަ ހެދިފައިވާކަމަށް ވަޒީރު މަޢުލޫމާތުދެއްވާފައިވެއެވެ. ހަމައެހެންމެ، މި ޕްލާންޓުގައި ކޮންމެ 24 ގަޑިއިރަކު 150 ޓަނުގެ އައިސް މަސްވެރިންނަށް ފޯރުކޮށްދިނުމުގެ ޤާބިލުކަން ހުންނާނެކަމަށް ވެސް ވަޒީރު ވިދާޅުވިއެވެ. 

މީގެ އިތުރުން ވަޒީރު ވިދާޅުވީ މިއަދު ހުޅުވުނު އައިސް ޕުލާންޓުން ދެކުނުގައި މަސްވެރިކަން ކުރާ މަސްވެރިން އައިސް ހޯދުމަށް ކުރަންޖެހޭ މަސައްކަތަށް ލުއި ލިބިގެން ދާނެކަމަށާއި އައިސް ހޯދަން އެކި ރަށްރަށަށް ދުއްވަންޖެހުން މަދުވެގެން ދިއުމާއި ތެލަށްކުރާ ހޭދަ މަދުވެގެން ދާނެކަމަށެވެ. އެއާއެކު މަސްވެރިންގެ އާމްދަނީ ރަގަޅުވެގެން ދާނެކަމަށެވެ.