ކާށިދޫ ފުޓްސަލް ޓީމަށް ރަތް ދޫލައިގެ މަރުޙަބާއެއް

ގޯލްޑަން ފުޓްސަލް ޗެލެންޖު 2025ގެ ޗެމްޕިއަންކަން ހޯދި ކ. ކާށިދޫއަށް އެރަށު ރައްޔިތުން ހޫނު މަރުހަބާއެއް ކިޔައިފިއެވެ.

ހުޅުމާލޭ ރެހެންދި ދަނޑުގައި އަންގާރު ދުވަހުގެރޭ ކުޅުނު ފައިނަލް މެޗުގައި ވަރުގަދަ ކުޅުމަކާއެކު ނައިވާދޫ މާޔޫސްކޮށްލުމަށްފަހު، ކާށިދޫން ޗެމްޕިއަންކަން ހޯދީ 4-1ގެ ނަތީޖާއަކުން ކުރި ހޯދައިގެންނެވެ. މިއީ ކާށިދޫން މުބާރާތުގެ ފައިނަލުގައި ވެސް ކުޅުނު ފުރަތަމަ ފަހަރެވެ. ތާރީހީ ކާމިޔާބީއެއް ހޯދައި، ކާށިދޫ ވެފައި ވަނީ ގޯލްޑަން ފުޓްސަލް ޗެލެންޖްގެ ތަށި ހޯދި ހަތްވަނަ ރަށަށެވެ.

ކާށިދޫން ތަށްޓާއެކު ރަށަށް ދިޔައީ އިއްޔެ ހަވީރުއެވެ. އެ ރަށުގެ ރައްޔިތުން ރަތް ދޫލައިގެ މަރުހަބާއެއް ޓީމަށް ކިޔައިފައިވާއިރު، ސަގާފީ ބައެއް ހަރަކާތްތައް ވެސް ކުރިއަށް ގެންގޮސްފައިވެއެވެ.

ކައުންސިލުން އިސްވެ ރަށު ޓީމަށްކީ މަރުހަބާގެ ތެރެއިން ރައްޔިތުން ޓީމާ ދޭތެރޭ ޝުއޫރުފާޅުކޮށްފައިވާ އިރު، ގޯލްޑަން ފުޓްސަލް ޗެލެންޖްގެ ތަށި ހޯދުމަކީ ކާށިދޫގެ ކުޅިވަރު ހަޔާތުގައި ވެސް ހޯދި އެންމެ ފުރިހަމަ އެންމެ ބޮޑު އެއް ކާމިޔާބީއެވެ.