ރޯދަމަހު ކަސްޓަމްސްގެ ޚިދުމަތްތައް ދޭނެ ގަޑިތައް އިޢުލާންކޮށްފި

ރަމަޟާން މަހުގެ ފުރަތަމަ 20 ދުވަހު މޯލްޑިވްސް ކަސްޓަމްސް ސާރވިސްގެ ޚިދުމަތްތައް ދިނުމަށް ކަނޑައަޅާފައިވާ  ގަޑިތައް އިޢުލާން ކޮށްފިއެވެ.

އެގޮތުން ކަސްޓަމްސްގެ އިދާރީ ޚިދުމަތްތައްދޭ އޮފިސްތައް ހުކުރާއި ހޮނިހިރު ބަންދުވާނެއެވެ. އެހެންކަމުން، ކަސްޓަމްސް ހެޑް އޮފީހާއި، ހަނިމާދޫ، ލ. ގަން، ގއ. ވިލިނގިލި އަދި ހއ. އުލިގަމުގައި ހުންނަ ކަސްޓަމްސް އޮފީހުން އާދިއްތައިން ބުރާސްފައްޗަށް ޚިދުމަތް ދޭނީ 9:00 އިން 13:00 އަށެވެ. 

އަދި ޕޯސްޓު މެދުވެރިކޮށް އަންނަ ތަކެތީގެ ތެރެއިން ކަސްޓަމްސްއިން ހިފަހައްޓާ ތަކެތި ދޫކުރާނީ  9:00 އިން 14:00 އަށެވެ. މި ޚިދުމަތް މި ގަޑިތަކުގައި ނުލިބޭނީ ހުކުރު ދުވަހު އެކަނިކަމަށް ކަސްޓަމްސްއިން ވަނީ ހާމަކޮށްފައެވެ. މި ތަކެތި ދޫކުރާނީ ޕޯސްޓް ބިލްޑިންގައި ހުންނަ ކަސްޓަމްސްގެ އޮފީހުންނެވެ.

މާލޭގެ ކާގޯ ކްލިއަރެންސްގެ ޚިދުމަތްތައް ދިނުމަށް ހަމަޖެހިފައިވަނީ 9:00 އިން 16:00އަށް، އަދި 21:00 އިން 01:00 އަށެވެ. މީގެ ތެރޭގައި ހިމެނެނީ ސީކާގޯ ޑޮކިއުމެންޝަން ޚިދުމަތާއި ސީކާގޯ އެގްޒެމިނޭޝަން ޚިދުމަތާއި ބަނދަރުގެ ޚިދުމަތްތަކާއި، ފައިސާ ބަލައިގަތުމާއި އަދި ހުޅުމާލޭ ސިކާގޯ އެގްޒެމިނޭޝަން ޚިދުމަތެވެ. އަދި ކަސްޓަމްސްގެ ސަޕޯޓު ސެންޓަރުގެ ޚިދުމަތް ދިނުމަށް ވެސް ކަނޑައަޅާފައި ވަނީ މި ވަގުތުތަކުގައެވެ.

މީގެ އިތުރުން ބޮންޑެޑް ވެއަރ ހައުސްގެ ޚިދުމަތާއި، ސ. ގަން، ސ. ހިތަދޫ އަދި ހދ. ކުޅުދުއްފުށީ ކަސްޓަމްސްގެ ސީ ކާރގޯ ޑޮކިއުމެންޓޭޝަނާއި އެގްޒެމިނޭޝަންގެ މަސައްކަތްތައް ކުރިޔަށްދާނީ 9:00 އިން 13:00 އަށެވެ.

އަދި ނ. މާފަރުގައި ހުންނަ ކަސްޓަމްސް އޮފީހުގެ ޚިދުމަތްތައް ކޮންމެ ދުވަހެއްގެ 9:00 އިން 13:00 އަށް ދޭން ނިންމާފައިވާއިރު، އެއާރ ކާގޯ ޑޮކިއުމެންޓޭޝަންގެ ޚިދުމަތްތައް ދޭން ހަމަޖެހިފައިވަނީ ކޮންމެ ދުވަހެއްގެ 6:30 އިން 02:00 އަށެވެ. 

އަދި އެއަރ ކާގޯ އެގްޒެމިނޭޝަންގެ ޚިދުމަތްތައް ދޭނީ 06:00 އިން 02:00 އަށް ކަމަށް ވެސް ކަސްޓަމްސްއިން ވަނީ ހާމަކޮށްފައެވެ.