ސަރުކާރުން ކުރައްވާ މަސައްކަތުން ކިޑްނީ ބަލި މީހުންގެ ތަކުލީފުތަކަށް ދަނީ ލުއި ލިބެމުންކަމަށް މެޑަމް ސާޖިދާ ވިދާޅުވެއްޖެ

ރާއްޖޭގެ އެކިހިސާބުތަކުގައި ޑަޔަލިސިސް ޚިދުމަތް ފުޅާކުރުމަށް ސަރުކާރުން ކުރަށްވަމުން ގެންދަވާ މަސައްކަތްތަކުގެ ތެރެއިން، ރާއްޖޭގައި ތިބި ޑަޔަލިސިސް ޚިދުމަތް ބޭނުންވާ ބަލި މީހުންނަށް ގިނަ ލުއިތަކެއް ލިބެމުންދާނެކަމަށް، ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ ވިދާޅުވެއްޖެއެވެ.

މެޑަމް ސާޖިދާ މިހެން ވިދާޅުވެފައި ވަނީ، "އާމިނާދިޔޯ"ގެ ނަމުގައި ހއ. އިހަވަންދޫގައި ޑައިލިސިސް ސެންޓަރެއް ޤާއިމްކޮށް، ރަސްމީކޮށް އެ ރަށުގައި ޑައިލިސިސް ޚިދުމަތް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

މެޑަމް ސާޖިދާ ވިދާޅުވީ، ޑައިލިސިސްގެ ޚިދުމަތަކީ ފުރާނައާއި ގުޅިފައިވާ ފަރުވާއެއްކަމަށެވެ. ހަމައެހެންމެ، އެއީ ކަނޑައެޅިފައި އޮންނަ ވަކި ތަރުތީބަކުން ކުރަންޖެހޭ ކަމެއްކަން ވެސް އެކަމަނާ ފާހަގަކުރެއްވިއެވެ. މީގެއިތުރުން، މި ޚިދުމަތަކީ އަގުބޮޑު ޚިދުމަތެއްކަމަށާއި، ދިގުދެމިގެންދާ ފަރުވާއެއްކަމުން، މި ފަދަ ޚިދުމަތެއް ހޯދަން މާލެ އަންނަންޖެހުމަކީ ބަލިމީހާއަށް ނުއުފުލޭވަރުގެ ތަކުލީފަކަށް ވާނެކަން ވެސް އެކަމަނާ ފާހަގަކުރެއްވިއެވެ. 

އިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން މިހާރު މި ފަހިކޮށްދެއްވި ފުރުސަތުގެ ސަބަބުން އިރާދަކުރެއްވިއްޔާ މިފަދަ އެތައް އުދާސްތަކަކުން ބަލިމީހާ މިންޖުވާނެ. ޚިދުމަތުގެ މަގު ކުރުވާނެ. އަވަސްވާނެ.

މެޑަމް ސާޖިދާ ވިދާޅުވިއެވެ.

މި ވާހަކަކޮޅުގައި ރާއްޖޭގެ އެކި ހިސާބުތަކުގައި ކިޑްނީގެ ބަލިތައް ތަޙައްމަލްކުރާ މީހުންގެ އިޙްސާސްތައް ދެނެގަނެ، އެ ފަރާތްތަކަށް އެންމެ ގާތުން އެހީތެރިކަން ފޯރުކޮށްދިނުމުގެ މުހިންމުކަމަށް މެޑަމް ސާޖިދާ އަލިއަޅުއްވާލައްވާފައިވެއެވެ.