ބިދޭސީންގެ ބަޔޮމެޓްރިކްސް ނެގުމަށް ޙާއްސަ ޑެސްކެއް ރޯދަ މަސް އެއްކޮށް ނޯތު ހާބަރުގައި

ބިދޭސީންގެ ބަޔޮމެޓްރިކްސް ނެގުމަށް ޙާއްސަ ޑެސްކެއް ރޯދަމަހާއި ޝައްވާލް މަހުގެ 7 ދުވަހު ނޯތު ހާބަރުގައި ބަހައްޓާނެކަމަށް ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާއިން ހާމަކޮށްފިއެވެ. 

ބިދޭސީންގެ ބަޔޯމެޓްރިކްސް އާއި ފޮޓޯ އަޕްޑޭޓްކުރުމަށް، "ކުރަނގި"ގެ ނަމުގައި ދާޚިލީ ވުޒާރާއިން ފަށާފައިވާ މި އޮޕަރޭޝަންގައި ނޯތު ހާބަރުގައި ޑެސްކެއް ބެހެއްޓުމަށް ނިންމީ، ބިދޭސީން ރެޖިސްޓްރީ ކުރުމުގެ ޒިންމާ މަތިކޮށްފައިވާ އެ ބިދޭސީންގެ އެމްޕްލޯޔަރުންނަށް ލުއިފަސޭހަ އިންތިޒާމުތަކެއް ހަމަޖައްސައިދިނުމަށްކަމަށް ވެސް އެ ވުޒާރާއިން ވަނީ ހާމަކޮށްފައެވެ.

އެގޮތުން މި ޑެސްކު ބަހައްޓާފައި ހުންނާނީ ނޯތު ހާބަރުގައި ހުންނަ، ދަ ޝޮޓް ހާބަރ ރެސްޓޯރެންޓު ކައިރީގައެވެ. 

އަދި ދުވާލާއި ރޭގަނޑު، މި ޚިދުމަތް ލިބޭނެ އިންތިޒާމު ހަމަޖައްސާނެކަމަށް ވެސް ދާޚިލީ ވުޒާރާއިން ވަނީ ހާމަކޮށްފައެވެ. 

މި ޑެސްކުގެ ޚިދުމަތް ދުވާލު ލިބިލައްވާނީ 9:30 އިން 16:00 އަށެވެ. އަދި ރޭގަނޑު ލިބިލައްވާނީ 21:30 އިން 23:30 އަށްކަމަށް ވެސް ވަނީ ހާމަކޮށްފައެވެ.

މާލެ ނޯތު ހާބަރު ސަރަޙައްދުގައި މި އޮޕަރޭޝަންގެ ޙާއްސަ ހަރަކާތެއް ކުރިއަށްގެންދިއުމަށް ނިންމާފައިވާއިރު، ރިޒޯޓްތަކާއި، ސަފާރީތަކާއި، ދަނޑުވެރިކަން ކުރުމަށް ޚާއްސަކޮށް ދޫކޮށްފައިވާ ރަށްރަށުގަ އާއި، އެހެނިހެން ސިނާއީ މަސައްކަތްކުރާ ރަށްތަކުގައި ވަޒީފާ އަދާކުރާ ބިދޭސީންގެ ބައޯމެޓްރިކްސް އަޕްޑޭޓްކުރުމުގެ މަސައްކަތް 2025 އޭޕްރީލް 15ވަނަ ދުވަހުގެ ކުރިން ނިންމުމަށް ދާޚިލީ ވުޒާރާއިން ވަނީ އަންގާފައެވެ.

މި މުއްދަތުގެ ތެރޭގައި ބައޯމެޓްރިކްސް އަޕްޑޭޓް ނުކުރާ ފަރާތްތައް އެކްސްޕެޓް ސިސްޓަމްއިން ސަސްޕެންޑްކޮށް ޚިދުމަތް މެދުކަނޑާލުމަށް ވަނީ ނިންމާފައެވެ.