ޚަބަރު
މިނިސްޓަރު ހައިދަރަށް ލިބުނު ފްލެޓު ދޫކޮށްލަން ނިންމަވައިފި

ހަޔަރ އެޑިއުކޭޝަން މިނިސްޓަރ ޢަލީ ހައިދަރު
ގެދޮރުވެރިޔާ ސްކީމްގެ ދަށުން ޢިމާރާތްކޮށްފައިވާ ފްލްޓްތަކަށް ޝަރުތުހަމަވެފައިވާ 1820 މީހުންގެ ތެރޭގައި ހަޔާ އެޑިޔުކޭޝަން މިނިސްޓަރު ޑރ. އަލީ ހައިދަރު އަހުމަދު ހިމެނިފައި އޮތްނަމަވެސް، އެ ފްލެޓް ދޫކޮށްލުމަށް އެ މަނިކުފާނު ނިންމަވައިފިއެވެ.
މިކަމާ ގުޅިގެން "އެކްސް"ގައި ވަޒީރު ކުރެއްވި ޕޯސްޓެއްގައި ހާމަކޮށްފައިވާ ގޮތުން، އެ މަނިކުފާނު އޮތީ، އެ މަނިކުފާނުގެ އަނބިކަނބަލުން، މްރިޔަމް ތައުފީޤާ ހުށަހެޅުއްވި އެޕްލިކޭޝަންގެ ކޯއެޕްލިކެންޓެއްގެ ގޮތުގައެވެ.
އެގޮތުން އެ ކަމަނާއަށް 3 ކޮޓަރީގެ އެޕާޓްމެންޓެއް ލިބޭކަމަށް އިވިއުކުރި ލިސްޓުގައި އޮތްނަމަވެސް، އެ މަނިކުފާނު މިހާރު ހުންނެވި މަޤާމުގެ ގޮތުން، އެ ފްލެޓު ލިބިގަތުމަށް އުޒުރުވެރިވާކަމަށް ވަނީ ވިދާޅުވެފައެވެ.
އަޅުގަނޑު ދެކޭގޮތުގައި އަޅުގަނޑުމެން ދެމަފިރިންނަށްވުރެ މި ސްކީމުން ފްލެޓެއް ޙައްޤުވާ އެތައް ޢާއިލާއެއް ތިބޭނެއެވެ. ވީމާ، މި ސްކީމުން އަޅުގަނޑުމެންށް ލިބޭ ފްލެޓު ދޫކޮށްލަން ޤަސްތުކުރާ ވާހަކަ ނުހަނު ޠާޢަތާއި އިޙްތިރާމާއެކު ދެންނެވީމެވެ.
މިނިސްޓަރު ޙިއްސާ ކުރެއްވެވި މެސެޖުގައި ވެއެވެ.
މިނިސްޓަރު މިކަން ހާމަކޮށްފައި މިވަނީ، އެ މަނިކުފާނުގެ ނަން މި ލިސްޓުގައި އޮތުމުން ގިނަ ބައެއްގެ ފާޑުކިއުން އަމާޒުވެފައި ވަނިކޮށެވެ. އެއީ ގެދޮވެރިޔާ ސްކީމްގެ ދަށުން ފްލެޓު ލިބޭ ފަރާތްތައް ކަނޑައެޅުމުގައި 15 އަހަރު މެދުނުކެނޑި މާލޭގައި ދިރިއުޅެފައިވުމަކީ އަސާސީ ޝަރުތަކަށްވެފައި އޮތްނަމަވެސް، މިނިސްޓަރު ގިނަ ދުވަސްތަކެއް ވަންދެން ރާއްޖެއިން ބޭރުގައި ދިރިއުޅުއްވާފައިވުމުންނެވެ.
ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ، އެ ވުޒާރާއިން ކުރިއަށްގެންދިޔަ ވެރިފިކޭޝަން މަރުޙަލާގެ ނަތީޖާއަށް ބަލާއިރު، 3 ކޮޓަރީގެ ލިސްޓުގައި ހިމެނޭ 3721 މީހުންގެތެރެއިން ޝަރުތު ހަމަވެ 75 ޕޮއިންޓު ލިބިފައިވަނީ 1423 މީހުންނަށްކަމަށެވެ. އަދި 2 ކޮޓަރީގެ ލިސްޓުގައިވާ 1218 މީހުންގެ ތެރެއިން ޝަރުތުހަމަވެ 73 ޕޮއިންޓު ލިބިފައިވަނީ 397 މީހުންނަށްކަމަށެވެ.