މުލަ ރޯދަ ދުވަހު މަސްދަޅު ކޭސް ދޫނުކުރާނެ

މުލަ ރޯދަ ދުވަސްކަމުގައި ކަލަންޑަރުގައި ކަނޑައަޅާފައިވާ ހޮނިހިރު ދުވަހު، ރޯދަ ހަދިޔާގެ ގޮތުގައި ދޫކުރާ މަސްދަޅު ކޭސް ދޫނުކުރާނެކަމަށް ސްޓޭޓް ޓްރޭޑިން އޯގަނައިޒޭޝަން، އެސްޓީއޯއިން ހާމަކޮށްފިއެވެ.

އެސްޓީއޯއިން ހާމަކޮށްފައިވާ ގޮތުގައި، މާދަމާއިން ފެށިގެން މަސްދަޅު ކޭސް ދޫކުރާ ގަޑިތަކަށް ވެސް ވަނީ ބަދަލުގެނަސްފައެވެ. އެގޮތުން މާދަމާއިން ފެށިގެން މިކަން ކުރިޔަށްދާނީ ރޭގަނޑު 9:30 އިން 11:30 އަށެވެ. އަދި އާދިއްތަ ދުވަހުން ފެށިގެން ވެސް މަސް ދަޅު ކޭސް ދޫކުރާނީ ހަމަ އެ ގަޑިތަކުގައިކަމަށް އެސްޓީއޯއިން ވަނީ ހާމަކޮށްފައެވެ.

މާލޭގައި މަސްދަޅު ކޭސް ބަހަން ފަށާފައިވަނީ މިދިޔަ ބުރާސްފަތިދުވަހެވެ. 

އެސްޓީއޯއިން ހާމަކޮށްފައިވާ ގޮތުގައި މަސްދަޅު ކޭސް ލިބޭނީ ހަމައެކަނި ދިވެހީންނަށެވެ. އަދި މަސްދަޅު ކޭސް ބަލާ ދާ މީހާގެ އައިޑީ ކާޑާއި ކަރަންޓް ބިލުގެ ކޮޕީއެއް ގެންދިއުން މުހިންމުކަމަށް އެސްޓީއޯއިން ވަނީ ހާމަކޮށްފައެވެ.

ރޯދަ ހަދިޔާ 2025ގެ ގޮތުގައި ސަރުކާރުން އަންނަނީ ކޮންމެ ގޭބީސީއަކަށް 180 ގްރާމްގެ 48 ދަޅުގެ މަސްދަޅު ކޭހެއް ދޫކުރަމުންނެވެ.