ޢިއްޒުއްދީން ފާލަމުން ރަމްޒުކޮށްދެނީ ދިވެހިންގެ މާޒީއާއި، މުސްތަޤްބަލް އަދި ދިވެހިވަންތަކަން: ރައީސް

ޢިއްޒުއްދީން ފާލަމުން ރަމްޒުކޮށްދެނީ ދިވެހިންގެ މާޒީއާއި، މުސްތަޤްބަލާއި ދިވެހިވަންތަކަންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިފަދައިން ވިދާޅުވީ، ޢިއްޒުއްދީން ފާލަން މަރާމާތުކުރުމަށްފަހު އަލުން ހުޅުވާލެއްވުމަށް ބޭއްވި ރަސްމިއްޔާތުގައި، އެ ފާލަން ހުޅުވައިދެއްވުމަށްފަހު ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ޢިއްޒުއްދީން ފާލަމަކީ މާލޭގެ މަލަމައްޗަށް ރީތިކަން ގެނެސްދޭ އެންމެ މުހިންމު އެއް ބިނާ ކަމަށެވެ. އަދި މި ފާލަމުން ރަމްޒުކޮށްދެނީ ދިވެހިންގެ މާޒީއާއި، މުސްތަޤްބަލާއި، ދިވެހީންގެ ދިވެހިވަންތަކަން ކަމަށް ރައީސް ވަނީ ފާހަގަކުރައްވާފައެވެ. ރައީސް ވިދާޅުވީ، މި މަޝްރޫޢަކީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއާއި މޯލްޑިވްސް ޓްރާންސްޕޯޓް އެންޑް ކޮންސްޓްރަކްޓިންގ ކޮމްޕެނީ، އެމްޓީސީސީ ގެ ބުރަ މަސައްކަތުން ނިންމަވާލެވުނު މަސައްކަތެއް ކަމަށެވެ. އެހެންކަމުން އެ ވުޒާރާއާއި އެމްޓީސީސީއަށް ރައީސް ވަނީ ޝުކުރު ދަންނަވާފައެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ޢިއްޒުއްދީން ފާލަމަކީ މާލޭގައި ދިރިއުޅޭ ރައްޔިތުން ހަވީރު ފިންޏަށް ބޭރަށް ނިކުމެއުޅޭއިރު ބޭނުންހިފޭފަދަ ތަނަކަށްވާނެ ކަމަށެވެ. މީގެ އިތުރުން ރައީސް ވަނީ، ޖުމްހޫރީ މައިޒާނުގައި ހުރި ފެންއަރުވާ ވަޑާމާއި، މާލޭގައި ހުންނަ ސަލްޓަން ޕާކު މަރާމާތުކުރުމުގެ މަސައްކަތްވެސް ވަރަށް އަވަހަށް ނިންމައިދެއްވާނެކަމަށް ވިދާޅުވެފައެވެ. އެގޮތުން ރައީސް ވިދާޅުވީ، މިތަންތަން މަރާމާތުކުރާނީ، ދިވެހިންގެ އައިޑެންޓިޓީއާއި ރާއްޖޭގެ ތާރީޚު ދައްކުވައިދޭ ގޮތަށް ކަމަށެވެ.  

ރައީސް ވިދާޅުވީ، ސަލްޓަން ޕާކު ތަރައްޤީކުރާއިރު އެ ސަރަޙައްދުގައި ކުޅިވަރު ކުޅޭ އައު ވަޞީލަތްތަކެއް ޤާއިމްކުރެވިގެންދާނެ ކަމަށެވެ. އަދި މި ޕާކުގެ މަސައްކަތް ކުރިއަށް އޮތް ހަ މަސް ދުވަހުގެ ތެރޭގައި ނިންމަވައިދެއްވާނެކަމަށް ރައީސް ވަނީ ވިދާޅުވެފައެވެ. މީގެ އިތުރުން އެ މަނިކުފާނު ވިދާޅުވީ، ޢިއްޒުއްދީން ފާލަން އޮތް މަގު ތަރައްޤީކުރުމުގެ މަސައްކަތް މި އަހަރުގެ ރަމަޟާން މަސް ނިމޭ ހިސާބުގައި ފަށާނެ ކަމަށެވެ. އެގޮތުން، އެމްޓީސީސީގެ ފެރީ ޓާމިނަލު ހުންނަ ސަރަޙައްދުން ފެށިގެން އެމްއެމްއޭ ބިލްޑިންގ އާއި ހަމައަށް މަގު ތަރައްޤީކުރުމުގެ މަޝްރޫޢު ކުރިއަށް ދާނެއެވެ. މި މަޝްރޫޢުގެ ދަށުން މަގު އިތުރަށް ފުޅާ ކުރެއްވުމަށް ނިންމަވާފައިވާއިރު، މަގު ހުޅުވާލާނީ އެ މަގުގައި ތާރު އެޅުމަށް ފަހުއެވެ. އަދި މި މަސައްކަތް މި އަހަރު ނިމުމުގެ ކުރިން ނިންމަވާދެއްވާނެކަމަށް ރައީސް ވަނީ ވިދާޅުވެފައެވެ. 

ޢިއްޒުއްދީން ފާލަން ނިސްބަތްވެ ވަޑައިގަންނަވަނީ އައްސުލްޠާން ޙަސަން ޢިއްޒުއްދީން ނުވަތަ ދޮންބަންޑާރައިންނަށެވެ. މިއީ  ހޮޅިންގެ އަޅުވެތިކަމުން ރާއްޖެ މިނިވަންކުރެއްވުމަށްފަހު، ރާއްޖޭގައި ހަތް އަހަރު ވަންދެން ރަސްކަން ކުރެއްވި ރަސްކަލެކެވެ.