ހައުސިންގ ފްލެޓްތައް ދިނުމުގައި ޒައްރެއްގެ މިންވަރުގެ ނުފޫޒެއް ވެސް ފޯރުވާފައެއް ނުވާނެ: ރައީސް

ހައުސިންގ ފްލެޓްތައް ދިނުމުގައި ޒައްރެއްގެ މިންވަރުގެ ނުފޫޒެއް ވެސް ފޯރުވާފައި ނުވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިފަދައިން ވިދާޅުވީ، ޢިއްޒުއްދީން ފާލަން މަރާމާތުކުރުމަށްފަހު އަލުން ހުޅުވާލެއްވުމަށް ބޭއްވި ރަސްމިއްޔާތުގައި، އެ ފާލަން ހުޅުވައިދެއްވުމަށްފަހު ދެއްކެވި ވާހަކަފުޅުގައެވެ.

ރައީސް ވިދާޅުވީ، ކުރީ ސަރުކާރުން ޢާންމުކުރި 4000 ފްލެޓު ލިބޭ މީހުންގެ ލިސްޓުގެ ވެރިފިކޭޝަން މަސައްކަތްތައް ނިންމައި، މިއަދު ލިސްޓު ޢާންމުކޮށްފައިވާއިރު އޭގެ ތެރެއިން އެއްވެސް މަސައްކަތަކަށް ޒައްރެއްގެ މިންވަރުގެ ނުފޫޒެއް ވެސް ފޯރުވާފައިނުވާނެ ކަމަށެވެ. އަދި މިއީ ސަރުކާރާއި، އިސް ވެރިންގެ ނުފޫޒަކާއި ނުލައި ފްލެޓް ދޫކޮށްފައިވާ ފުރަތަމަ ފަހަރު ކަމަށް ރައީސް ވަނީ ފާހަގަކުރައްވާފައެވެ. މީގެ އިތުރުން ރައީސް ވިދާޅުވީ، ފްލެޓް ލިސްޓުން އެއްވެސް ފަރާތެއް ގަސްތަކާއިލައިގެން އުނިކޮށްފައި ނުވާނެ ކަމަށެވެ. 

ރައީސުލްޖުމްހޫރިއްޔާ ވިދާޅުވީ، ހައުސިންގ ޔުނިޓްތައް ދިނުމުގައި މަސައްކަތްކޮށްފައިވާނީ ޢަދުލުވެރިކަމާއި، އިންސާފުވެރިކަމާއި، ދެފުށްފެންނަ ގޮތަށް ކަމަށެވެ. އަދި އޭސީސީ އިން ބަލަންޖެހޭ އެންމެހާ ކަމެއް ބެލުމަށްފަހު، ދޫކޮށްފައިވާ މި ފްލެޓްތަކާއި ގުޅޭގޮތުން އެއްވެސް ޝަކުވާއެއް ހުށައަޅަން ބޭނުންވާނަމަ 30 ދުވަހުގެ ތެރޭގައި އެކަން ކުރެއްވުމަށް ރައީސް ވަނީ އިލްތިމާސްކުތައްވާފައެވެ. 

ރައީސް ވިދާޅުވީ، ރާއްޖޭގެ ހުރިހާ ހިސާބަކަށް ވެސް މި ވަޤުތު އެންމެ މުހިންމީ ބޯޙިޔާވަހިކަމުގެ މައްސަލައަށް ޙައްލެއް ގެނައުމަށް ކަމަށެވެ. އެގޮތުން، އެމަނިކުފާނުގެ ވަޢުދުފުޅާއި އެއްގޮތަށް މި ފަސް އަހަރު ނިމޭއިރު ބޯހިޔާވަހިކަން ކަށަވަރުނުވާ މީހެއް ނުހުންނާނެ ކަމުގެ ޔަޤީންކަން ރައީސް ވަނީ މިރޭވެސް ދެއްވާފަ އެވެ. ރައީސް ވިދާޅުވީ، މި މައްސަލައަށް ޙައްލެއް ގެނައުމުގެ މަޤްސަދުގައި ހުޅުވާލާފައިވާ އިސްލާމިކް ފައިނޭންސް ލޯނަށް މިހާރު ވެސް ގިނަ ޢަދަދެއްގެ މީހުން ކުރިމަތިލާފައިވާ ކަމަށެވެ. އަދި މި ލޯނު މިއަހަރުގެ މެދު ތެރޭގައި ދޫކުރަން ފައްޓަވާނެ ކަމަށް އެމަނިކުފާނު ވަނީ ވިދާޅުވެފައެވެ. 

ރައީސް އެދިވަޑައިގެންނެވީ، އިޢުލާންކުރި ހައުސިންގ ޔުނިޓުގެ ލިސްޓުގައި ނަން ނެތް ބޭފުޅުން ވެސް އެކަމާއި މެދު ކަންބޮޑުނުވުމަށެވެ. ސަބަބަކީ، ބޯހިޔާވަހިކަމަށް ޙައްލެއް ހޯއްދުމަށް މިހާރު ފަށާފައިވާ ގިނަ މަޝްރޫޢުތަކެއް ހުރުމެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މާލެ، ވިލިމާލެ، ހުޅުމާލެ، ގުޅީފަޅުން އަދިވެސް ރައްޔިތުންނަށް ގެދޮރުލިބިގެންދާނެ ކަމަށެވެ. ހަމަ އެހެންމެ ރައީސް ވަނީ، އުތުރު ތިލަފަޅާއި، ގިރާވަރު ފަޅާއި، ރަސްމާލޭ ބިން ހިއްކުމުގެ މަޝްރޫޢުގެ ދަށުން ވެސް ބޯހިޔާވަކަން ކަށަވަރުވެގެންދާނެކަމަށް ވިދާޅުވެފައެވެ. 

ގެދޮރުވެރިޔާ ސްކީމްގެ ދަށުން ދޫކުރާ 4000 ފްލެޓަށް ޝަރުތުހަމަވާ މީހުންގެ ލިސްޓު މިހާރު ސަރުކާރުން އިޢުލާންކުރައްވާފާވާއިރު، މި ލިސްޓުގައި ވާގޮތުން ފޯމު ހުށައަޅާފައިވާ މީހުންގެ ތެރެއިން ޝަރުތު ހަމަވަނީ 1820 މީހުންނެވެ.