އަމިއްލަ ނަފްސުތައް އިސްލާޙު ނުކުރާނަމަ ޤައުމަށް ލިބޭނެ ކުރިއެރުމެއް ނެތްކަމަށް ރައީސް ވިދާޅުވެއްޖެ

އަމިއްލަ ނަފްސުތައް އިސްލާޙު ނުކުރާނަމަ ޤައުމަށް ލިބޭނެ ކުރިއެރުމެއް ނެތްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ  އެވެ.

ރައީސުލްޖުމްހޫރިއްޔާ މިފަދައިން ވިދާޅުވީ، ޢިއްޒުއްދީން ފާލަން މަރާމާތުކުރުމަށްފަހު އަލުން ހުޅުވާލެއްވުމަށް ބޭއްވި ރަސްމިއްޔާތުގައި، އެ ފާލަން ހުޅުވައިދެއްވުމަށްފަހު ދެއްކެވި ވާހަކަފުޅުގައެވެ.

ރައީސް ވިދާޅުވީ، މިފެށޭ ރަމަޟާން މަހަކީ، އަމިއްލަ ނަފްސުތައް އިސްލާޙުކޮށް ދޭދޭ ގުޅުންތައް ރަނގަޅުކުރުމަށް ލިބޭ ރަނުގެ ފުރުސަތެއް ކަމަށެވެ. އެގޮތުން، އަމިއްލަ ނަފްސުތައް ޠާހިރުކޮށް މުސްލިމަކަށް ވީތީ ފަޚުރުވެރިވާންޖެހޭ ކަމަށް ރައީސް ވިދާޅުވިއެވެ. ހަމަ އެހެންމެ، ގުޅުންތަކާއި އުޅުން އިސްލާޙުކޮށް މަޢާފްކުރުމުގެ ރިވެތި ސިފަ އިސްކުރެއްވުމަށް ރައީސް ވަނީ އެދިވަޑައިގެންފައެވެ. މީގެ އިތުރުން ރައީސް ވިދާޅުވީ، ޢާއިލާތަކާއި އޮފީހުގެ މުވައްޒަފުންނާއި، ސިޔާސީ މާޙައުލުގައި އެކަކު އަނެކަކާއި ޖެހިފައިވާ މައްސަލަތައް ޙައްލުކުރަންޖެހޭ ކަމަށެވެ. 

ރައީސް ވިދާޅުވީ، އެއްވެސް މީހަކަށް މާޒީގައި ހިނގާފައިވާ ކަންކަމުގައި ހިފައިގެން ކުރިއެރުމެއް ނުލިބޭނެ ކަމަށެވެ. އަދި އިސްލާމީ ރިވެތި އަޚްލާޤުގެ މަތީގައި ދެމިތިބުމަށް ރައީސް ވަނީ އިލްތިމާސްކުރައްވާފަ އެވެ.