ޚަބަރު
މިއަދުވެސް ޕެރިޝެބަލް މުދާ ދޫކުރާނެ: އެމްޕީއެލް

އެމްޕީއެލުން މުދާ އުފުލުން/ ފޮޓޯ: ފޯކަސް
ހުކުރު ދުވަހަކީ އާންމުގޮތެއްގައި ބަންދު ދުވަހަކަށް ވިޔަސް، މި ހުކުރުދުވަހު ވެސް ޕެރިޝެބަލް މުދާ ދޫކުރާނެ ކަމަށް މޯލްޑިވްސް ޕޯރޓްސް ލިމިޓެޑް (އެމްޕީއެލް) އިން ބުނެފިއެވެ.
މީޑިއާތަކަށް އެމްޕީއެލުން ފޮނުވި މެސެޖުގައި ވަނީ، ރަމަޟާން މަހާ ދިމާކޮށް ރާއްޖެއަށް އެތެރެ ކޮށްފައިވާ ޕެރިޝެބަލް މުދާ (ކާބޯތަކެތި) ކަސްޓަމަރުންނަށް ވީ އެންމެ އަވަހަށް ފޯރު ކޮށްދިނުމުގެ ގޮތުން ހާއްސަ އިންތިޒާމްތަކެއް ހަމަޖައްސާފައިވާ ކަމަށެވެ.
އެގޮތުން 28 ފެބްރުއަރީ 2025 ވާ ހުކުރު (މިއަދު) ގެ 14:30 އިން 22:00 އަށް ޕެރިޝެބަލް މުދާ ދޫކުރުމުގެ ޚިދުމަތް ދިނުމަށް ހަމަޖެހިފައިވާކަމަށް އެމްޕީއެލުން ބުނެއެވެ.
ކުރިއަށް އޮތް ރަމަޟާން މަހާ ދިމާކޮށް ރާއްޖޭގެ އެކި ކަންކޮޅުތަކަށް ލޯކަލް ހާބަރ ތަކުން މުދާ ފޮނުވާ ފަރާތްތަކަށް ލުއި ފަސޭހަ ހިދުމަތްތަކެއް ފޯރުކޮށްދިނުމަށް ތައްޔާރުވެފައިވާ ކަމަށްވެސް މީގެ ކުރިން އެމްޕީއެލުން ވަނީ ބުނެފައެވެ.