ޚަބަރު
މޫސުން ގޯސްވުމުގެ ސަބަބުން ކުރިމަތިވެދާނެ ތަކްލީފުތައް ކުޑަކުރުމަށް ސަރުކާރުން މަސައްކަތް ފަށައިފި
މާލޭގެ މަގުމަތި، ފޮޓޯ: މިހާރު
މޫސުން ގޯސްވުމުގެ ސަބަބުން ކުރިމަތިވެދާނެ ތަކްލީފުތައް ކުޑަކުރުމަށް މަސައްކަތް ފަށާފައިވާކަމަށް ސަރުކާރުން ހާމަކޮށްފިއެވެ.
ސަރުކާރުން މިހެން ހާމަކޮށްފައި މިވަނީ، ރާއްޖޭގެ ބޮޑު ބަޔަކަށް އަންނަ ހޯމަ ދުވަހާ ހަމައަށް މޫސުން ގޯސްވާނެކަމަށް، މޫސުމާ ބެހޭ އިދާރާއިން ހާމަކުރުމާ ގުޅިގެންނެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު، އަލްފާޟިލާ ޙީނާ ވަލީދު ވިދާޅުވީ، މިކަމުގެ ސަބަބުން ރައްޔިތުންނަށް ދިމާވެދާނެ ތަކުލީފުތައް ކުޑަކުރުމަށް ސަރުކާރުގެ ކަމާގުޅުންހުރި މުއައްސަސާތަކުން މިހާރު ތައްޔާރުވާން ފަށާފައިވާކަމަށެވެ.
ކުރިއަށް އޮތް ދެތިން ދުވަހަށް ރާއްޖޭގެ ބޮޑު ބަޔަކަށް ވާރޭވެހި މޫސުން ގޯސްވާނެ ކަމަށް މޫސުމާބެހޭ އިދާރާއިން ހާމަކޮށްފައިވުމާކު، ރައްޔިތުންނަށް ދިމާވެދާނެ ތަކްލީފުތައް ކުޑަކުރުމަށްޓަކައި ސަރުކާރުގެ ކަމާބެހޭ މުއައްސަސާތަކުން މިހާރުވެސްވަނީ މަސައްކަތް ފަށާފައި.
— Heena Waleed (@MvSpokesperson) February 28, 2025
އަދި މޫސުން…
ގިނަ ވަގުތުތަކަކަށް ހުއްޓާނުލާ ވާރޭ ވެހެފިނަމަ، މާލޭގެ މަގުތަކުގައި ހިނގާބިނގާވެ އުޅުމަށާއި، ދުއްވާ އުޅަނދުތައް ދުއްވުމަށް އުނދަގޫވާ މިންވަރަށް ފެންބޮޑުވެއެވެ. އަދި ފެން ބޮޑުވުމުގެ ސަބަބުން ޕާކުކޮށްފައި ހުންނަ އުޅަނދަށް ގެއްލުން ލިބި، އާންމު ރައްޔިތުންގެ މުދަލަށް ވެސް ގެއްލުންވެއެވެ.
މީގެ އިތުރުން، ފިހާރަފިހާރައަށާއި، ގޭގޭގެ ތެރެއަށް ފެންވަދެ، އާންމު ދިރިއުޅުމަށް އުނދަގޫވާ ހާލަތްތައް މެދުވެރިވެއެވެ.
އެހެންކަމުން މިފަދަ ދުވަސްތަކުގައި، ސަރުކާރުގެ ކަމާގުޅުންހުރި އިދާރާތަކުން އާންމު ރައްޔިތުންނަށް ދިމާވާ އުނދަގޫތައް ކުޑަކުރުމުގެ މަސައްކަތް ކުރެއެވެ. އެގޮތުން ޕަންޕު ޖައްސައިގެން ފެން ހިއްކުމާއި، ފިހާރަތަކާއި ގޭގޭގެ ދޮރުމަތީގައި ވެލިބަސްތާ ޖެއްސުން ހިމެނެއެވެ.
އަދި މޫސުން ގޮސްވާނެކަމަށް މޫސުމާ ބެހޭ އިދާރާއިން މިއަދު ހާމަކުރިއިރު، މިރޭ ހަނދު ފެނިއްޖެނަމަ މާދަމާއަކީ ރަމަޟާން މަހުގެ ފުރަތަމަ ދުވަހެވެ. އެހެންކަމުން، މާދަމާއަކީ ޒަރޫރީ ބޭނުންތަކުގައި ގިނަ ބަޔަކު އާންމުގޮތެއްގައި މަގުމައްޗަށް ނިކުންނަ ދުވަހެކެވެ.
އަދި މޫސުން ގޯސްވުމުގެ ސަބަބުން މުލަ ރޯދަ ދުވަހަށްތައްޔާރު ވުމުގައި ވީހާވެސް ފަސޭހަގޮތަކަށް ރައްޔިތުންނަށް ކަންކަން އިންތިޒާމް ކުރުމަށް މަސައްކަތްކުރާނެ ވާހަކަ ދަންނަވަން.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު، އަލްފާޟިލާ ޙީނާ ވަލީދު ވިދާޅުވިއެވެ.
