މާދަމާއަކީ ރަމަޟާން މަހުގެ ފުރަތަމަ ދުވަސް ކަމުގައި ކަނޑައަޅައިފި

މާދަމާއަކީ 1446ވަނަ އަހަރުގެ ރަމަޟާން މަހުގެ ފުރަތަމަ ދުވަސް ކަމުގައި އިސްލާމީ ކަންތައްތަކާބެހޭ ވުޒާރާއިން ކަނޑައަޅައިފިއެވެ.

މިކަން އިޢުލާން ކޮށްފައިވަނީ، މިރޭ އިސްލާމީ މަރުކަޒުގައި ހަނދު ސާބިތު ކުރުމަށް ބޭއްވި ޙާއްސަ ރަސްމިއްޔާތުގައެވެ. 

މާދަމާއަކީ ރޯދަ މަހުގެ ފުރަތަމަ ދުވަސް ކަމުގައި ކަނޑައެޅުމުގެ ގޮތުން އިސްލާމީ ކަންތައްތަކާއި ބެހޭ ވަޒީރު، ޑރ.މުޙައްމަދު ޝަހީމް ޢަލީ ސަޢީދު ނެރުއްވި ބަޔާނުގައި ވިދާޅުވީ، މި އަހަރުގެ ރަމަޟާން މަހުގެ ހަނދު އިސްލާމީ ބައެއް ޤައުމުތަކަށް ފެނުނުކަމަށް ޝަރުޢީ ގޮތުން ސާބިތުވާތީ އާއި ރަމަޟާން މަހާއި ޝައްވާލު މަހުގެ ސާބިތު ކުރުމަށް ދިވެހިރާއްޖޭގައި ޢަމަލުކުރުމަށް ހަމަޖެހިފައިވާ އުސޫލުގައިވާގޮތުގެމަތިން މާދަމާއަކީ ރަމަޟާން މަހުގެ ފުރަތަމަ ދުވަސްކަމުގައި ކަނޑައަޅާކަމަށެވެ.

މި ބަޔާނުގައި ރަމަޟާން މަހުގައި އަޅުކަންކުރުމަށް ފަރުވާތެރިވުމަށާއި މާތްﷲގެ ރުއްސެވުން ހޯދުމަށް މަސައްކަތްކުރުމަށް ހުރިހާ ދިވެހި ރައްޔިތުންނަށް ވަޒީރު ވަނީ ނަސޭޙަތްތެރިވެ ވަޑައިގަންނަވާފައެވެ.

އިސްލާމީ ކަންތައްތަކާ ބެހޭ ވުޒާރާގެ މި ނިންމުމާ ގުޅިގެން، މިރޭ ރާއްޖޭގެ ހުރިހާ މިސްކިތެއްގައި ތަރާވީސް ނަމާދުކުރުން އޮންނާނެއެވެ.