އަލްއަޤްޞާ މިސްކިތުގައި ފުރަތަމަ ތަރާވީޙް ނަމާދަށް 60،000 އަށްވުރެ ގިނަ މުސްލިމުން ޖަމާވެއްޖެ

ޖެރޫސަލަމްގެ އަލްއަޤްޞާ މިސްކިތުގައި ރަމަޟާން މަހުގެ ފުރަތަމަ ތަރާވީޙް ނަމާދު އަދާކުރުމަށް 60،000 އަށްވުރެ ގިނަ މުސްލިމުން އެއްވެއްޖެއެވެ. މިއީ އިސްރާއީލުން އިޢުލާންކޮށްފައިވާ ސަލާމަތީ ފިޔަވަޅުތަކާ ފިއްތުންތަކާއި އެކުވެސް ނަމާދަށް ޖަމާވި މުސްލިމުންގެ އަދަދެވެ.

ހަނދު ފެނި، ރަމަޟާން މަހުގެ ފުރަތަމަ ދުވަސް  އިޢުލާންކުރުމާއެކު، އިސްލާމްދީނުގެ ފުރަތަމަ ޤިބްލަ ކަމުގައިވާ އަލްއަޤްޞާ މިސްކިތަށް ޒިޔާރަތްކުރުމަށް ގިނަ އަދަދެއްގެ މުސްލިމުން އެއްވިއެވެ. ޤިބްލާ މިސްކިތާއި، ޤުއްބަތުއްޞަޚްރާ މިސްކިތާއި، މިސްކިތުގެ ގޯތިތެރެ ފުރި، އަލްއަޤްޞާގެ އިމާމު ޚަތީބު ޝައިޚް ޔޫސުފް އަބޫ ސިނާގެ ފަހަތްޕުޅުގައި ޢިޝާ ނަމާދާއި ތަރާވީޙް ނަމާދު އަދާކުރިއެވެ.

ހަނގުރާމަ ހުއްޓާލާފައިވީ ނަމަވެސް، ޣައްޒާގެ ހާލަތާއި އިސްރާއީލުން ކަނޑައަޅާފއިވާ ހިސާބުތަކަށް ދެމުންދާ ހަމަލާތަކުގެ ސަބަބުން، ފަލަސްތީނުގެ ރައްޔިތުން ރަމަޟާން މަހާ ކުރިމަތިލަނީ ބިރުވެރިކަމާއި ހިތާމައިގެ ޝުޢޫރުތަކާ އެކުގައެވެ. އިސްރާއީލުން ވަނީ މިދިޔަ އަހަރެކޭ އެއްފަދައިން މިއަހަރުވެސް ރަމަޟާން މަހު އަލްއަޤްޞާ މިސްކިތުގައި "ސަލާމަތީ" ފިޔަވަޅުތަކެއް ތަންފީޒުކުރާނެކަމަށް އިޢުލާންކޮށްފައެވެ.

މިގޮތަށް އިސްރާއީލުން ހުރަސްތަކެއް ކުރިމަތިކޮށްފައިވީ ނަމަވެސް، ހަރުކަށިފިޔަވަޅު އަޅާފައިވާ އިރުމަތީ ޖެރޫސަލަމްގެ ބައިތުލް މަޤްދިސްގައި ހުންނަ އަލްއަޤްޞާ މިސްކިތުގައި ފުރަތަމަ ތަރާވީޙް ނަމާދު އަދާކުރުމަށް 60،000 އަށްވުރެ ގިނަ މުސްލިމުން ބައިވެރިވެފައިވާކަން ފާހަގަކުރެވެއެވެ.