އައިޖީއެމްއެޗް، ދަރުމަވަންތަ، ހުޅުމާލެ، ވިލިމާލެ ހޮސްޕިޓަލްގެ އޯޕީޑީ މިއަދު ބަންދު

މޫސުން ގޯސްވުމުގެ ސަބަބުން، އައިޖީއެމްއެޗް، ދަރުމަވަންތަ، ހުޅުމާލެ، ވިލިމާލެ ހޮސްޕިޓަލްގެ އޯޕީޑީ ބަންދުކޮށްފިއެވެ. 

މާލެ ސަރަހައްދަށް އިއްޔެ ހަވީރުން ފެށިގެން ރޭ ފަތިސް ވަންދެން މެދުނުކެނޑި ބޯކޮށް ވެހުނު ވާރޭގެ ސަބަބުން މަގުތަކުގައި ފެން ބޮޑުވެ، ހިނގައިބިނގާވެ އުޅުމަށް ވަނީ ވަރަށް ބޮޑަށް ދަތިވެފައެވެ. މި ދަތިތަކާ ހުރެ، މިއަދަކީ ސަރުކާރު ބަންދު ދުވަހެއް ގޮތުގައި ވެސް ރައީސުލްޖުމްހޫރިއްޔާ ވަނީ ކަނޑައަޅުއްވާފައެވެ. 

ހޮސްޕިޓަލު ސަރަހައްދުގައ ފެންބޮޑުވެ، ޚިދުމަތް ހޯދާ ފަރާތްތަކަށް ހޮސްޕިޓަލުން ވަދެ ނިކުމެ ހެދުމަށް ދަތިތަކާ ކުރިމަތިވާނެތީ އޯޕީޑީ ޚިދުމަތް ދިނުން ހުއްޓާލާފައި ވީނަމަވެސް، އައިޕީޑީ އަދި އިމަޖެންސީގެ ޚިދުމަތްތައް މެދުނުކެނޑި ކުރިއަށްދާނެކަމަށް އެ ހޮސްޕިޓަލުން ވިދާޅުވެއެވެ.

ވިއްސާރަޔާ ގުޅިގެން ރައްޔިތުންނަށް ކުރިމަތިވަމުންދާ ގެއްލުންތަކަށް ހައްލު ހޯދައިދިނުމަށް ސަރުކާރުން ދަނީ ކެނޑިނޭޅި ގިނަ މަސައްކަތްތަކެއް ކުރަމުންނެވެ.