އޮސްޓްރޭލިއާގެ އުތުރު ސަރަހައްދުގައި ފެންބޮޑުވެ އެކަކު މަރުވެއްޖެ

އޮސްޓްރޭލިއާގެ އުތުރު-އިރުމަތީ ސަރަހައްދުގައި ރެކޯޑު އަދަދަކަށް ވެހުނު ވާރޭގެ ސަބަބުން ފެންބޮޑުވެ، މިހާތަނަށް އެކަކު މަރުވެއްޖެއެވެ. އަދި ހާލަތު އިތުރަށް ގޯސްވެދާނެ ކަމަށް ބުނެ، އެ ސަރަހައްދުގެ ރައްޔިތުންނަށް އިތުރު ނުރައްކަލަކަށް ތައްޔާރުވުމަށް އިންޒާރު ދީފައިވެއެވެ.

ކުއީންސްލޭންޑްގެ ގޮނޑުދޮށާ ކައިރި ސަރަހައްދުތަކުގައި ދިރިއުޅޭ ގިނަ ރައްޔިތުން ވަނީ އެ ސަރަހައްދުތައް ދޫކޮށް ދިއުމަށް އަންގާފައެވެ. މިއީ އާންމުކޮށް ހޫނުގަދަ މޫސުމެއްގައި ވެހޭ ވާރޭ، މަދު ދުވަސްކޮޅެއްގެ ތެރޭގައި ވެހުމުގެ ސަބަބުން ކުރިމަތިވި ހާދިސާއެކެވެ.

ކެއިންސް އިން ފެށިގެން މެކޭ އާ ހަމައަށް 735 ކިލޯމީޓަރުގެ ސަރަހައްދެއްގައި މި ހާދިސާގެ އަސަރު ކޮށްފައިވެއެވެ. ޚާއްޞަކޮށް ޓައުންސްވިލް ސިޓީ، އިންގަމް އަދި ކާޑްވެލް ސަރަހައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ.

ކުއީންސްލޭންޑްގެ ޕްރިމިއަރ ޑޭވިޑް ކްރިސަފުއްލީ ވިދާޅުވީ، "އިންގަމްގެ ހާލަތު ވަރަށް ދެރަ. ގޭގެއާއި، ވިޔަފާރިތަކާއި، ދަނޑުވެރިކަމުގެ ދާއިރާއަށް ވަރަށް ބޮޑެތި ގެއްލުންތަކެއް ވަނީ ލިބިފައި. މިފަދަ ބޮޑު ހާދިސާތައް ވަރަށް މަދުން މެނުވީ ނުފެނޭ."

އޮސްޓްރޭލިއާގެ މޫސުމާބެހޭ އިދާރާއިން ވަނީ އިތުރު ސަރަހައްދުތަކަކަށް ނުރައްކާތެރި މޫސުމުގެ އިންޒާރު ދީފައެވެ. ބައެއް ސަރަހައްދުތަކަށް މިދިޔަ ހަފްތާގައި 1 މީޓަރަށް ވުރެ ގިނައިން ވާރޭ ވެހިފައިވާ ކަމަށް އެ އިދާރާއިން ބުނެއެވެ.

އިންގަމްގައި 60 އަހަރުގެ އަންހެނަކު މަރުވެފައިވަނީ އޭނާ ސަލާމަތްކުރަން ދިޔަ ބޯޓެއް ގަހެއްގައި ޖެހިގެން ބޯޓު  ބަންޑުންވުމުންނެވެ. އެ ބޯޓުގައި ތިބި އެހެން ފަސް މީހުން ވަނީ ސަލާމަތްކުރެވިފައެވެ.

ޕްރައިމް މިނިސްޓަރ އެންތަނީ އަލްބަނީޒް ވިދާޅުވީ މި ހާދިސާއަކީ ހިތާމަވެރި ޚަބަރެއް ކަމަށާއި، މި ކާރިސާއާ ގުޅިގެން ބޭނުންވާ ހުރިހާ އެހީތެރިކަމެއް ފެޑެރަލް ސަރުކާރުން ފޯރުކޮށްދޭނެ ކަމަށެވެ.